ជាតិ
កញ្ញា ម៉េង សុវណ្ណលីលីន ពន្យល់ពីផលប៉ះពាល់នៃការប្រើស៊ីម៉ងត៍ជួសជុលប្រាសាទបាយ័ន កញ្ញា ម៉េង សុវណ្ណលីលីន ស្ថាបត្យករជួសជុលប្រាសាទ នាពេលផ្តល់បទសម្ភាសជាមួយកញ្ញា ជឿន ស្រីណយ នៃ ThmeyThmey25
× សៀមរាប៖ អាជ្ញាធរជាតិអប្សរា បានបញ្ចប់ការជួសជុលរួតទី៣ និងបន្តជួសជុលផ្នែកផ្សេងទៀត នៃប្រាសាទបាយ័ន ដែលមានសភាពទ្រុឌទ្រោម។ ស៊ីម៉ងត៍ដែលបារាំង ប្រើប្រាស់ដើម្បីជួសជុលកាលអំឡុងឆ្នាំ១៩៣០ អស់គុណភាពនឹងធ្វើឱ្យប៉ះពាល់ដល់គ្រឹះប្រាសាទ។
សូមអញ្ជើញលោក អ្នកនាង ទស្សនាបទសម្ភាសជាមួយកញ្ញា ជឿន ស្រីណយ អ្នកសារព័ត៌មាន ThmeyThmey25 និងកញ្ញា ម៉េង សុវណ្ណលីលីន ស្ថាបត្យករជួសជុលប្រាសាទ នៃអាជ្ញាធរជាតិអប្សរា ដូចតទៅ៖
ឆ្លងកាត់បាតុភូតធម្មជាតិជាច្រើនសតវត្ស ផ្នែកខ្លះនៃប្រាសាទបាយ័ន នាពេលបច្ចុប្បន្ន មានសភាពទ្រុឌទ្រោម។ ថ្មប្រាសាទខ្លះ បានជ្រុះធ្លាក់ដល់ដី និងបំណែកខ្លះទៀត ត្រូវបានបាក់បែកបាត់តែម្ដង។ នាអំឡុងឆ្នាំ១៩៣០ បារាំងបានប្រើប្រាស់ស៊ីម៉ងត៍ ក្នុងការជួសជុល និងបិទភ្ជិតផ្នែកដែលខូចខាត ឬបាត់ថ្ម នៅប្រាសាទបាយ័ន។ បន្ទាប់ពីការជួសជុលពេលនោះ គឺមានរយៈពេលប្រមាណ៩០ឆ្នាំហើយ ហើយស៊ីម៉ងត៍ទាំងនោះ ក៏ពុកផុយអស់គុណភាពដែរ។
ស្ថាបត្យករវ័យក្មេង កញ្ញា ម៉េង សុវណ្ណលីលីន បានពន្យល់ពីមូលហេតុនៃការជួសជុលឡើងវិញនៃរួតទី៣នេះ ថារួតនេះ ជាទីតាំងដែលប្រឈមនឹងអាកាសធាតុភ្លៀង ខ្យល់ខ្លាំងជាងគេ ទើបធ្វើឱ្យស៊ីម៉ងត៍ នៅទីនោះអស់គុណភាព។ ឈរនៅរួតទី៣ នៃប្រាសាទបាយ័ន ដែលអាជ្ញាធរជាតិអប្សរា ទើបជួសជុលរួចកាលពីខែកក្កដាកន្លងទៅ កញ្ញាលីលីន ពន្យល់ដូច្នេះ៖«តាមការសន្និដ្ឋានរបស់ក្រុមការងារ កម្រាលនេះ(កម្រាលថ្មនៅរួតទី៣) ខូចហើយ តែគាត់(បារាំង)មិនបានរើកម្រាលនេះចោលទេ គឺគាត់ចាក់ស៊ីម៉ងត៍កន្លែងមានចន្លោះ។ជិត១០០ឆ្នាំហើយ ស៊ីម៉ងត៍អស់គុណភាព អ៊ីចឹងវាធ្វើឱ្យទឹកហូរចូលគ្រឹះប្រាសាទ ហើយធ្វើឱ្យជញ្ជាំងប្រាសាទបែកចេញពីគ្នា»។
បើតាមស្ថាបត្យករវ័យក្មេងរូបនេះ ការជួសជុលប្រាសាទបាយ័ននេះ ក្រុមការងាររើតែស៊ីម៉ងត៍ ដែលអស់គុណភាពតែប៉ុណ្ណោះ ព្រោះវាធ្វើឱ្យប៉ះពាល់ដល់ប្រាសាទ ចំណែកស៊ីម៉ងត៍ដែលនៅមានគុណភាព គឺរក្សាទុកដដែល។
កញ្ញា ម៉េង សុវណ្ណលីលីន ក៏បានពន្យល់ពីផលប៉ះពាល់របស់ស៊ីម៉ងត៍ នៅពេលវាអស់គុណភាពទៀតថា៖«បើសិនស៊ីម៉ងត៍នៅមានគុណភាព អ៊ីចឹងវាធ្វើឱ្យទឹកចូលគ្រឹះប្រាសាទតិច។ តែបើស៊ីម៉ងត៍អស់គុណភាព វាធ្វើឱ្យមានប្រហោង អ៊ីចឹងទឹកហូរចូលច្រើន។ ទឹកហូរចូលច្រើន មិនមែនតាមធម្មជាតិរបស់វា។ តែយើងមិនហ៊ានសន្និដ្ឋានទេថា ការយកស៊ីម៉ងត៍មកជួសជុលប្រាសាទនេះខុស ព្រោះនៅអង្គរវត្ត ក៏មានស៊ីម៉ងត៍ដែរ។ ស៊ីម៉ងត៍នោះឥឡូវ នៅតែល្អ អ៊ីចឹងវាស៊ីសងលើស្ថានភាពថ្មប្រាសាទដែរ។ បើថ្មនោះគុណភាពមិនសូវល្អខ្លួនឯង ហើយប៉ះជាមួយស៊ីម៉ងត៍វាឆាប់ប៉ះពាល់»។
ការជួសជុលប្រាសាទបាយ័ននេះ ក្រុមការងារបានរើស៊ីម៉ងត៍អស់គុណភាពទាំងនោះចេញនិងត្រូវរើថ្មចាស់ៗដែលឃ្លាតគ្នាដាក់ឱ្យជាប់គ្នាវិញ។ បើតាមស្ថាបត្យករ កញ្ញាលីលីន ប្រាសាទទាំងអស់ នៅតំបន់អង្គរ ការដាក់យកថ្មថ្មីមកជួសជុលប្រាសាទ មានតិចតួចបំផុត ព្រោះដើម្បីរក្សាតម្លៃនៃប្រាសាទ។
ក្រៅពីរួតទី៣នេះ អាជ្ញាធរជាតិអប្សរា នឹងជួសជុលខឿនជុំវិញប្រាសាទបាយ័ន ដើម្បីទប់ខ្សាច់គ្រឹះ និងជួសជុលខឿនដែលមានហានិភ័យ ព្រមទាំងរួតទី២បន្តទៀត៕
© រក្សាសិទ្ធិដោយ thmeythmey.com