ដោយ៖ គឹម មករា
អតីតគ្រូបង្វឹក សញ្ជាតិអេស្ប៉ាញរបស់ក្លិបអង្គរថាយហ្គឺរ លោក Oriol Segura បានបន្សល់ទុកនៅសមិទ្ធ ផលជាច្រើនសម្រាប់ក្លិបដែលមានមូលដ្ឋាននៅខេត្តសៀមរាប បើទោះបីជាមិនបានឈ្នះពានក៏ដោយ។ ពីឆ្នាំ២០១៧ ដល់ឆ្នាំ២០២១ លោកបានដឹកនាំរហូតដល់១០០ប្រកួត ក្នុងនោះឈ្នះ ៤៨ដង ចាញ់ ២៧ដង និងស្មើ ២៥ដង ។ ការដឹកនាំក្រុមចុងក្រោយចាញ់ ព្រះខ័នរាជស្វាយរៀង ៥-២ ក្នុងទឹកដីសៀមរាប ។
បើគិតតាមតារាងពិន្ទុផ្លូវការ ក្លិបអង្គរថាយហ្គឺរ ចាត់ថាជាក្លិបដែលខ្លាំងមួយ តាមរយៈការដឹកនាំរបស់ លោក Oriol Segura បើទោះជា៥ឆ្នាំនេះ មិនទាន់បានពានឬជោគជ័យណាធំដុំក៏ដោយ ព្រោះរយៈពេល ប៉ុន្មានឆ្នាំចុងក្រោយ ក្រុមនេះស្ថិតនៅ ចន្លោះលេខ៦-៧នៅក្នុងតារាង ក្រុមលីគកំពូលកម្ពុជា ។ កាលពីឆ្នាំ ២០១៨ ក្លិបនេះ ក៏ទទួលបានលេខ៣ ពានសម្ដេច ហ៊ុន សែន ផងដែរ ។
ក្រៅពីដឹកនាំការប្រកួត លោកបានបណ្ដុះយុវជនជំនាន់ក្រោយ សម្រាប់ក្លិប បច្ចុប្បន្ន ក្រុមយុវជន ខ្លះត្រូវបានជ្រើសរើស ឲ្យលេងក្នុងឈុតធំប្រចាំក្លិប ។ គ្រូសញ្ជាតិអេស្ប៉ាញរូបនេះ បានបន្សល់ទុកនៅឃ្លា ចុងក្រោយ ដែលមានន័យក្នុងការជំរុញទឹកចិត្តដល់កីឡាករ និងក្រុមយុវជនរបស់ក្លិប ។ «នៅពេលដែល ចក្ខុវិស័យ និងមហិច្ឆិតាដើរទន្ទឹមគ្នា គ្រប់គម្រោងទាំងអស់ គឺនឹងជោគជ័យ» លោកបានលើកឡើងយ៉ាងដូច្នេះ។
ជាមួយនឹងពាក្យ «Vamos Tiger» ដែលមានអត្ថន័យជាភាសាខ្មែរថា «ទៅមុខថាយហ្គឺរ» លោក Oriol ចាត់ទុកការរួមរស់៥ឆ្នាំជាមួយក្លិបដែលមានម្ចាស់ជាជនជាតិជប៉ុន ជាបទពិសោធន៍ដ៏អស្ចារ្យ។ លោកបានលើកឡើងថា៖ «ចាប់តាំងពីឆ្នាំ២០១៧ មក ខ្ញុំបានជួបប្រទះរឿងរ៉ាវអស្ចារ្យជាច្រើនទាំងក្នុងជីវិតបាល់ទាត់ និងនៅក្នុងការរីកចម្រើនផ្ទាល់ខ្លួន។ ខ្ញុំពិតជាសប្បាយរីករាយដែលនៅក្នុងពេលវេលាទាំងអស់នេះ ខ្ញុំបានជួបបុគ្គលល្អជាច្រើននៅក្នុងក្លិប»។
យោងតាមគេហទំព័រផ្លូវការរបស់លោក (omsfootball.com) លោកបានចាប់ផ្តើមធ្វើជាជំនួយការគ្រូបង្វឹកនៅក្លិបយុវជនអេស្ប៉ាញ Gimnastic de Tarragona ពីឆ្នាំ២០១១ ដល់ឆ្នាំ២០១៤។ ពីឆ្នាំ២០១៤ ដល់ឆ្នាំ២០១៥ លោកជាប្រធានផ្នែកវិភាគ និងជាគ្រូបង្វឹក U18 នៃក្លិប Servette FC នៅប្រទេសស្វីស។
បន្ទាប់មក លោកបានក្លាយជាគ្រូបង្វឹកក្លិបភ្នំពេញក្រោន ដែលជាអាជីពដំបូងរបស់លោកក្នុងការដឹកនាំឈុតធំពីខែមករា ដល់ខែមេសា ឆ្នាំ២០១៦។ «វាមិនមែនជាពេលវេលាងាយស្រួលនោះឡើយនៅក្លិបនេះ ប៉ុន្តែខ្ញុំមានអនុស្សាវរីយ៍យ៉ាងជ្រាលជ្រៅលើការអនុវត្តរបៀបលេងបែបអេស្ប៉ាញ និងការរបៀបក្រុមដ៏ក្មេងខ្ចីនៅក្នុងក្របខណ្ឌខេមបូឌានលីគ»។
ក្រោយចាកចេញពីកម្ពុជា លោកបានទៅធ្វើជាគ្រូជំនួយនៅក្លិបហ្វាំងឡង់ SJK Seinajoki ពីខែមេសា ឆ្នាំ២០១៦ ដល់ខែកុម្ភៈ ឆ្នាំ២០១៧ ដោយក្លិបឈ្នះជើងឯកពាន Suomen Cup និងឈានវគ្គជម្រុះ UEFA Europa League 2017។
ចាប់ពីខែមេសា ឆ្នាំ២០១៧ លោក Oirol បានដឹកនាំក្លិបអង្គរថាយហ្គឺរដែលមានមូលដ្ឋាននៅខេត្តសៀមរាប។ នៅរដូវកាល២០១៨ ថាយហ្គឺរស្ថិតក្នុងចំណោមក្លិបដែលមានអ្នកគាំទ្រច្រើនជាងគេ និងទទួលបានលេខ៣ពានរង្វាន់សម្តេច ហ៊ុន សែន។ នៅឆ្នាំ២០១៩ អង្គរថាយហ្គឺរបានលេខ៥ក្នុងក្របខណ្ឌមិត្តហ្វូនខេមបូឌានលីគ ដែលជាចំណាត់ថ្នាក់ខ្ពស់បំផុតរបស់ក្លិប៕