ជាតិ
សហគមន៍តាំងបំពុងរកចំណូលបាន១០លានរៀល នៃបុណ្យអុំទូក រូបភាពពី លោក រស់ សុខ ប្រធានមន្ទីរស្ដីទីនៃមន្ទីរទេសចរណ៍ខេត្តកំពង់ស្ពឺ
× រយៈពេល ៣ថ្ងៃនៃពិធីបុណ្យអុំទូក ខ្នងផ្សានៃសហគមន៍តាំងបំពុង ទទួលភ្ញៀវទេសចរចំនួន ៣៨០នាក់ប៉ុណ្ណោះ។ បើតាមលោក ហ៊ុន សៅ ប្រធានសហគមន៍តាំងបំពុង ទិន្នន័យភ្ញៀវទេសចរនេះ បានផ្ដល់ចំណូលដល់សហគមន៍ប្រមាណ ១០លានរៀលផងដែរ។
លោក ហ៊ុន សៅ ប្រធានសហគមន៍តាំងបំពុង បានប្រាប់សារព័ត៌មានThmeyThmey25 ថា ភ្ញៀវទេសចរប្រមាណ ៣ទៅ៥ក្រុម បានលុបចោលការកក់ជាមួយសហគមន៍ សម្រាប់ការនាំពួកគេឡើងភ្នំវិញ ព្រោះបារម្ភខ្លាចមានមនុស្សច្រើនពេក ទើបធ្វើឱ្យអ្នកឡើងភ្នំខ្នងផ្សានាពិធីបុណ្យអុំទូកនេះ មានត្រឹម៣៨០នាក់ប៉ុណ្ណោះ។
«ភ្ញៀវទេសចរមួយរយៈចុងក្រោយនេះធ្លាក់ចុះ តែយ៉ាងណា យើងទទួលបានចំណូលប្រមាណ ១០លានរៀលដែរ តាមរយៈភ្ញៀវជួលគោយន្ត ជួលមគ្គទ្ទេសក៍ទេសចរ និងប្រជាជនគាត់លក់ដូរ»។ នេះជាការបញ្ជាក់បន្ថែមរបស់ប្រធានសហគមន៍តាំងបំពុង។
យ៉ាងណាមិញ ភ្ញៀវទេសចរដើរកម្សាន្តនាឱកាសឈប់សម្រាកពិធីបុណ្យអុំទូក នៅខ្នងផ្សានេះមិនបានបង្ករបញ្ហាបរិស្ថាននោះទេ។ លោក ហ៊ុន សៅ លើកឡើងថា ភ្ញៀវទេសចរមានការយល់ដឹងពីការគ្រប់គ្រងសំរាមរបស់ពួកគេ ។
សូមជម្រាបដែរថា រយៈពេល៣ថ្ងៃនៃពិធីបុណ្យអុំទូកនេះ មានភ្ញៀវទេសចរដើរលេងទូទាំងប្រទេស សរុប ៩១០ ១៥០នាក់ ក្នុងនោះភ្ញៀវបរទេសផ្ទៃក្នុងចំនួន១០ ២៨១នាក់។ គោលដៅទេសចរណ៍សំខាន់ៗរួមមាន រាជធានីភ្នំពេញ សៀមរាប និងតំបន់សមុទ្រ ៕
Tag:
ThmeyThmey25
ហ៊ុន សៅ
ខ្នងផ្សា
កំពង់ស្ពឺ
© រក្សាសិទ្ធិដោយ thmeythmey.com