ជាតិ
គ្រប់គ្នាអាចធ្វើដំណើរកម្សាន្តដោយភ្ជាប់នឹងសកម្មភាពមនុស្សធម៌
× ពលរដ្ឋ៥គ្រួសារដែលបានរៀបចំដំណើរកម្សាន្តរួមគ្នាក្នុងអំឡុងពេលថ្ងៃឈប់សម្រាកបុណ្យអុំទូក បាននាំអំណោយមនុស្សធម៌ជូនមណ្ឌលកុមារកំព្រា២កន្លែងនៅក្នុងក្រុងសៀមរាប។
«ដំណើរកម្សាន្តនាំសប្បាយមែនហើយ ប៉ុន្តែបើយើងបាននាំយកអំណោយមនុស្សធម៌ផ្តល់ជូនដល់អ្នកខ្វះខាត សកម្មភាពនេះកាន់តែធ្វើឱ្យដំណើរកម្សាន្តរបស់យើងរឹតតែមាន័យ និងមានប្រយោជន៍។ អ្នកដើរកម្សាន្តជ្រះថ្លារីករាយក្នុងចិត្ត អ្នកខ្វះខាតបានទទួលការទំនុកបម្រុងបន្ថែម។»។ នេះជាការយល់ឃើញរបស់ពលរដ្ឋ៥គ្រួសារដែលរួមមាន៖ គ្រួសារលោក ម៉ៅ ស្រេង, គ្រួសារលោក ម៉ក់ ងយ, គ្រួសារ លោក ជ្រិន សុធា, គ្រួសារលោក សោម រតនា និងគ្រួសារលោក លាង ដឺលុច។ អំណោយសប្បុរសធម៌ដែល រួមមាន សម្ភារៈសិក្សា មួកសុវត្ថិភាព ដបទឹកអនាម័យ ដែលជាឧបត្ថម្ភដោយមជ្ឈមណ្ឌលអូស្ត្រាលីសម្រាប់ការអប់រំ (ACE) និងអង្ករ ត្រីខកំប៉ុង និងមី ដែលជាវិភាគទានរួមគ្នា ត្រូវបាននាំយកទៅជូនមណ្ឌលកុមារកំព្រាខេត្តសៀមរាប និងព្រះវិហាគ្រឹស្ត «ពួកជំនុំខ្មែរដំណឹងល្អទាំងបួន» ដែលកំពុងជួយចិញ្ចឹមកុមារកំព្រា។
ក្នុងឱកាសនៃជំនួបជាមួយប្រធានមណ្ឌលកុមារកំព្រាទាំងពីរ លោក ម៉ៅ ស្រេង នាយកប្រចាំប្រទេសនៃ IDP Cambodia និង ACE បានពិចារណាអំពីលទ្ធភាពនៃការផ្តល់ជូនវគ្គបណ្តុះបណ្តាលភាសាអង់គ្លេសដល់កុមារកំព្រាទាំងនោះ។ លោកបានបញ្ជាក់ប្រាប់អ្នកគ្រប់គ្រងនៅមណ្ឌលកុមារកំព្រាទាំងពីរថា ជំនួយឧបត្ថម្ភទាំងនោះតំណាងឱ្យទឹកចិត្តរបស់គ្រួសារទាំង៥ដែលបានគិតគូរដល់កុមារកំព្រារបស់កម្ពុជា។
លោក សោម រតនា ជាអ្នកតំណាងគ្រួសារមួយដែលបាននាំកូនប្រុស៣នាក់ទៅជាមួយ បានយល់ឃើញថាកិច្ចការសប្បុរសធម៌នេះបានបង្រៀនកូនរបស់លោកឱ្យយល់អំពីកាតព្វកិច្ចនៃការសងត្រឡប់ទៅសង្គមវិញ ហើយក៏បានផ្តល់ក្ដីសង្ឃឹមដល់កុមារកំព្រាទាំងនោះដែរ។
លោក ជ្រិន សុធា ដែលបាននាំកូនប្រុសម្នាក់ក្នុងដំណើរធ្វើកិច្ចការមនុស្សធម៌ដែរនោះ បាននិយាយប្រាប់កុមារកំព្រាទាំងនោះថា ពួកគេមិនឯកោឡើយ ដោយមានសប្បុរសជនជាច្រើននៅចាំជួយទំនុកបម្រុងពួកគេ ហើយថាពួកគេត្រូវខិតខំរៀនសូត្រដើម្បីកែប្រែវាសនា និងជីវិតរបស់ពួកគេ។
លោក ម៉ក់ ងយ ដែលរួមដំណើរជាមួយភរិយា បាននិយាយទៅកាន់កុមារកំព្រាទាំងនោះថា ដើម្បីអនាគតរុងរឿង ពួកគេត្រូវប្រឹងប្រែងរៀនសូត្រដើម្បីក្រេបយកវិជ្ជា ដែលជាទ្រព្យមិនចេះរីងស្ងួត និងរៀនធ្វើពលកម្មនៅពេលទំនេរពីការសិក្សា ដូចជាការចូលរួមដាំបន្លែបង្ការដើម្បីផ្គត់ផ្គង់ជីវភាព និងធ្វើឱ្យរាងកាយ និងស្មារតីមានសុខភាពល្អ។ ជាមួយគ្នានោះ លោក ម៉ក់ ងយ បានទូន្មានឱ្យពួកគេត្រូវស្រឡាញ់គ្នាដូចបងប្អូនរួមផ្ទៃ និងផ្តល់ភាពកក់ក្តៅឱ្យគ្នាទៅវិញទៅមក ជាពិសេសក្មួយៗដែលជារៀមច្បងត្រូវចេះមើលថែប្អូនៗឱ្យបានល្អ។
ពលរដ្ឋខ្មែរកាន់តែច្រើនមានលទ្ធភាពរៀបចំដំណើរកម្សាន្តទៅរមណីយដ្ឋាននានានៅក្នុងប្រទេស។ បើសិនដំណើរកម្សាន្តទាំងនោះ មានភ្ជាប់នឹងសកម្មភាពសង្គម ឬកិច្ចការមនុស្សធម៌នៅតាមតំបន់ដែលពួកគាត់ធ្វើដំណើរកម្សាន្ត ការចែករំលែកនេះនឹងកាន់តែមានវិសាលភាពធំ និងបានជាប្រយោជន៍ និងផ្តល់ក្ដីសង្ឃឹមកាន់តែច្រើនដល់ពលរដ្ឋ និងសហគមន៍អ្នកខ្វះខាតទាំងឡាយ។
© រក្សាសិទ្ធិដោយ thmeythmey.com