ជាតិ
នយោបាយជាតិ
លោក ជា សុផារ៉ា បើកកិច្ចប្រជុំបន្ទាន់ទាំងយប់ ក្រោយបញ្ជាសម្ដេច ហ៊ុន សែន លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានដឹកនាំកិច្ចប្រជុំទាំងយប់ថ្ងៃទី២៨ វិច្ឆិកា ស្តីពីវិធានការទប់ស្កាត់និងបង្ក្រាបជាបន្ទាន់ នូវការកាប់ព្រៃលិចទឹក និងការទន្ទ្រានដីបឹងទន្លេសាប។ (រូបពីហ្វេសប៊ុកផ្លូវការរបស់រដ្ឋមន្ត្រីដែនដី)
× ភ្នំពេញ៖ ៦ម៉ោងក្រោយបញ្ជារបស់សម្ដេចនាយករដ្ឋមន្ត្រី ហ៊ុន សែន នោះ លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានបើកកិច្ចប្រជុំទាំងយប់ថ្ងៃទី២៨ វិច្ឆិកា ស្តីពីវិធានការទប់ស្កាត់និងបង្ក្រាបជាបន្ទាន់ នូវការកាប់ព្រៃលិចទឹក និងការទន្ទ្រានដីបឹងទន្លេសាប។
តាមរូបភាព ដែលបានបង្ហោះនៅលើហ្វេសប៊ុកលោក ជា សុផារ៉ា នៅម៉ោង៩យប់នេះ មានការចូលរួមកិច្ចប្រជុំពីសំណាកស្ថាប័នពាក់ព័ន្ធជាច្រើន ក្នុងនោះរួមមាន លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម, លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ , លោក សាយ សំអាល់ រដ្ឋមន្ត្រីក្រសួងបរិស្ថាន , លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ, លោក នេត សាវឿន អគ្គស្នងការដ្ឋាននគរបាលជាតិ និងលោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងជាប្រធានគណៈកម្មការជាតិ ដើម្បីទប់ស្កាត់ និងបង្ក្រាបបទល្មើសធនធានធម្មជាតិ រួមទាំងអភិបាល និងថ្នាក់ដឹកនាំខេត្តជាប់បឹងទន្លេសាបទាំងអស់។
សម្ដេច ហ៊ុន សែន តាមរយៈសារសំឡេងពិសេស ពាក់ព័ន្ធនឹងបញ្ហាបឹងទន្លេសាប នៅរសៀលថ្ងៃទី២៨ វិច្ឆិកា បានបញ្ជាឱ្យដកហូតយកដីព្រៃលិចទឹក ដែលត្រូវបានអ្នកមានអំណាច និងជនខិលខូច កាប់ទន្ទ្រានខុសច្បាប់យកមកវិញទាំងអស់។
«ទោះបីជាត្រូវលះបង់អី ដោយតម្លៃណាយើងត្រូវយកដីទាំងនោះ មកវិញឱ្យបាន…។ឯចំពោះអ្នកប្រព្រឹត្តត្រូវតែទទួលខុសត្រូវចំពោះតាមច្បាប់ ដោយខានមិនបាន។ ខ្ញុំបានបញ្ជាក់ហើយ មានតែផ្លូវច្បាប់ប៉ុណ្ណោះ ដែលអាចដោះស្រាយបានបញ្ហាពួកអ្នកទាំងនេះ។ យើងបានអប់រំពួកគេរាប់សិបឆ្នាំមកហើយ អំពីផលវិបាកលើបញ្ហានេះ ហេតុអ្វីក៏នៅមានមន្ត្រីបែបនេះតទៅទៀត»។ នេះជាការបញ្ជាក់របស់ប្រមុខរដ្ឋាភិបាល។
សម្ដេច ហ៊ុន សែន ទុកឱកាសឱ្យមន្ត្រីប្រព្រឹត្តខុស ចេញសារភាពមុនគេចាត់វិធានការដែរ។«ខ្ញុំសូមប្រាប់មន្ត្រីទាំងឡាយ ដែលអនុវត្តខុស បើចង់បានការបន្ធូបន្ថយទោស ត្រូវចេញមកសារភាពបន្ទាន់ បើមិនចេញសារភាពជាបន្ទាន់ ខ្ញុំសូមឱ្យអ្នកដែលចេញមកអនុវត្ត ចាត់វិធានការយ៉ាងម៉ឺងមាត់បំផុត គឺការចាប់ខ្លួនតែម្ដង សម្រាប់ផ្ដន្ទាទោសតាមច្បាប់។ ហើយឈានទៅរឹបអូស មិនត្រឹមតែដីធ្លីនៅហ្នឹងកន្លែង ទ្រព្យសម្បត្តិដែលពួកគេមាន ដែលបានមកពីដីធ្លីដែលពួកគេបានបំផ្លាញនេះ ត្រូវតែធ្វើការដកហូត»។ នេះជាការបញ្ជាក់របស់សម្ដេច ហ៊ុន សែន ដែលបានសង្កត់ធ្ងន់ថា អភិបាលខេត្ត និងអភិបាលស្រុក ដែលប្រព្រឹត្តិខុសត្រូវចេញសារភាព ដើម្បីទទួលបានការបន្ធូរបន្ថយទោស ប៉ុន្តែពួកគេនៅជាប់ពិរុទ្ធភាព។
Tag:
ហ៊ុន សែន
ជា សុផារ៉ា
ដីព្រៃលិចទឹក
© រក្សាសិទ្ធិដោយ thmeythmey.com