អន្តរជាតិ
ការសិក្សានៅអាហ្រ្វ៊ិកខាងត្បូង៖ វីរុសអូមីក្រុងអាចយកឈ្នះប្រសិទ្ធភាពវ៉ាក់សាំងដូសជំរុញ រូបថត Xinhua
× ការសិក្សាខ្នាតតូចមួយនៃករណីឆ្លងជំងឺកូវីដ-១៩ ចំនួន៧ករណីដែលបង្កដោយវីរុសបំប្លែងខ្លួនថ្មីអូមីក្រុងបង្ហាញថា វីរុសទម្រង់ថ្មីនេះអាចយកឈ្នះប្រសិទ្ធភាពវ៉ាក់សាំងបង្ការជំងឺកូវីដ-១៩ ដូសជំរុញបាន។ នេះបើតាមអ្នកវិទ្យាសាស្ត្រ Wolfgang Preiser ដែលរៀបចំការសិក្សានេះ។
ការសិក្សាខ្នាតតូច បានសិក្សាពីភ្ញៀវទេសចរអាល្លឺម៉ង់ចំនួន៧នាក់ដែលបានធ្វើដំណើរទៅកាន់ទីក្រុង Cape Town ។ ពួកគេមានអាយុចន្លោះ២៥ឆ្នាំទៅ៣៩ឆ្នាំ ហើយត្រូវបានរកឃើញថា ឆ្លងជំងឺកូវីដ-១៩ បង្កដោយវីរុសអូមីក្រុងកាលពីចុងខែវិច្ឆិកា ឬដើមខែធ្នូ។ លទ្ធផលនៃការសិក្សាបញ្ជាក់ថា ពួកគេទាំង៧នាក់នោះមានរោគសញ្ញាស្រាលទៅមធ្យម ហើយមិនតម្រូវឱ្យចូលសម្រាកព្យាបាលនៅមន្ទីរពេទ្យនោះទេ។ នេះបើតាមទីភ្នាក់ងារព័ត៌មាន Reuters។
បន្ថែមពីនេះ ក្នុងចំណោម៧នាក់នេះ មនុស្ស៦នាក់បានចាក់វ៉ាក់សាំងពេញលេញជាមួយវ៉ាក់សាំងក្រុមហ៊ុន Pfizer។ ៥នាក់ក្នុងចំណោម៦នាក់នោះ ក៏បានទទួលដូសជំរុញរបស់វ៉ាក់សាំងក្រុមហ៊ុន Pfizer ហើយម្នាក់ក្នុងចំណោមនោះបានទទួលដូសជំរុញនៃវ៉ាក់សាំងក្រុមហ៊ុន Moderna ផងដែរ។ ម្នាក់ផ្សេងទៀតក្នុងចំណោម៧នាក់បានទទួលដូសទីមួយនៃវ៉ាក់សាំងក្រុមហ៊ុន AstraZeneca ហើយទទួលដូសទីពីរ និងដូសជំរុញដោយវ៉ាក់សាំងក្រុមហ៊ុន Pfizer។
ពួកគេទាំង៧នាក់នេះមិនដែរធ្លាប់ឆ្លងជំងឺកូវីដ-១៩ពីមុនមកនោះទេ ហើយការឆ្លងខាងលើនេះបានកើតឡើងចន្លោះពីមួយទៅពីរខែបន្ទាប់ពីពួកគេបានទទួលដូសជំរុញ។
ជុំវិញរឿងនេះ អ្នកជំនាញខាងមេរោគវិទ្យានៅសាកលវិទ្យាល័យ Stellenbosch និងជាសហអ្នក និពន្ធម្នាក់នៃការសិក្សាខាងលើលោក Wolfgang Preiser ប្រាប់ទីភ្នាក់ងារព័ត៌មាន Reuters ថា ការសិក្សានេះកំពុងស្ថិតក្រោមការត្រួតពិនិត្យ។ លោកបន្តថា លទ្ធផល នៃការសិក្សាបច្ចុប្បន្នបង្ហាញថា ទោះបីបុគ្គលណាមួយបានទទួលដូសជំរុញហើយក្ដីក៏ ករណីឆ្លងជំងឺកូវីដ-១៩ នៃទម្រង់អូមីក្រុងនៅតែអាចកើតមាន ប៉ុន្តែវ៉ាក់សាំងនៅតែអាចមានប្រសិទ្ធភាពការពារពីការឈឺធ្ងន់ និងការស្លាប់។
«លទ្ធផលដែលចេញមកបង្ហាញថា មេរោគនេះមានសមត្ថភាពខ្លាំងក្នុងការបំផ្លាញការឆ្លើយតបនៃ ប្រព័ន្ធភាពស៊ាំ ដូចច្នេះនេះច្បាស់ណាស់ដែលយើងត្រូវបង្កើនប្រសិទ្ធភាពវ៉ាក់សាំងបន្ថែមទៀត»។ អ្នកជំនាញខាងលើបន្តបែបនេះ។
កាលពីសប្តាហ៍មុន ទីភ្នាក់ងារសន្តិសុខសុខភាពរបស់ចក្រភពអង់គ្លេសបាន អះអាងថា ការសិក្សខ្នាតធំជាក់ស្តែងចំពោះចំនួនមនុស្ស៥៨១នាក់ក្នុងចក្រភពអង់គ្លេស បានបង្ហាញថាវ៉ាក់សាំងដែលមានស្រាប់អាចប្រឆាំងនឹងជំងឺស្រាលដែលបង្កឡើងដោយវីរុសអូមីក្រុង។ កន្លងមក អ្នកវិទ្យាសាស្ត្រ ព្រមទាំងអង្គការសុខភាពពិភពលោកព្រមានថា ប្រទេសទាំងអស់មិនគួរសន្និដ្ឋានលឿនពេកចំពោះភាពធ្ងន់ធ្ងរដែលបង្កដោយវីរុសអូមីក្រុងនេះឡើយ៕
© រក្សាសិទ្ធិដោយ thmeythmey.com