នៅក្នុងឆ្នាំ២០១៨ លោកគីម បានជួបជាមួយប្រធានាធិបតីអាម៉េរិក លោក ដូណាល់ ត្រាំ។ ស្របគ្នានឹងព្រឹត្តិការណ៍នោះ កូរ៉េខាងជើងមិនសូវធ្វើតេស្តមីស៊ីលបាលីស្ទិក ដើម្បីបង្ហាញសាច់ដុំខ្លួនឡើយ។ ប៉ុន្តែរដ្ឋាភិបាលក្រុងព្យុងយ៉ាង បានចាប់សាកល្បងមីស៊ីលបាលីស្ទិកឡើងវិញ បន្ទាប់ពីជំនួបរវាងកូរ៉េខាងជើង និងអាម៉េរិក ទាក់ទិននឹងការរំសាយកម្មវិធីនុយក្លេអ៊ែរ បរាជ័យនៅក្នុងឆ្នាំ ២០១៩។ ថ្មីៗនេះ កូរ៉េខាងជើង បានប្រកាសថា ខ្លួនទទួលជោគជ័យលើការសាកល្បងមីស៊ីលមានល្បឿនលឿនជាងសំឡេងថែមទៀត។  

 

 

ក្រោមគោលនយោបាយពង្រឹងសព្វាវុធ និងអាវុធនុយក្លេអ៊ែរ ដើម្បីការពារការគំរាមកំហែងពីប្រទេសខាងក្រៅ ប្រជាជនកូរ៉េខាងជើងជាច្រើនម៉ឺននាក់ បានប្រឈមបញ្ហាសេដ្ឋកិច្ច។ ការពង្រឹងវិស័យការពារជាតិដ៏ខ្លាំងក្លាបែបនេះ បានធ្វើឱ្យកូរ៉េខាងជើងរងទណ្ឌកម្មជាច្រើនពីអង្គការសហប្រជាជាតិ អាម៉េរិក និងសហភាពអឺរ៉ុប។ 

 

ទណ្ឌកម្មនេះ បានធ្វើឱ្យប៉ះពាល់ដល់ប្រជាជនយ៉ាងខ្លាំង ខណៈពេលទំនិញជាច្រើនមុខ មិនអាចនាំចេញ និងនាំចូលកូរ៉េខាងជើងបាន។ ចាប់ពីឆ្នាំដែលលោកគីមឡើងកាន់អំណាចមក ក្រុមប្រឹក្សាសន្តិសុខ បានដាក់ទណ្ឌកម្មយ៉ាងហោចណាស់៥លើក្រុងព្យុងយ៉ាង ខណៈអាម៉េរិក និងសហភាពអឺរ៉ុប បានដាក់ទណ្ឌកម្មជាច្រើនទៀត។ 

 

បន្ទាប់ពីកាន់អំណាចចាប់ពីឆ្នាំ២០១១ កំណើនសេដ្ឋកិច្ច មានភាពល្អប្រសើរ មុននឹងរងទណ្ឌកម្មអង្គការសហប្រជាជាតិនៅក្នុងឆ្នាំ២០១៣ និងឆ្នាំ២០១៧។ ក្នុងឆ្នាំ២០១២ កូរ៉េខាងជើង បាននាំចេញទៅកាន់ប្រទេសចិន ដែលជាសម្ព័ន្ធមិត្តដ៏សំខាន់មួយ ក្នុងទំហំ ២,៤៨ពាន់លានដុល្លារ និងនាំចូល៣,៤៥ពាន់លានដុល្លារ។ ប៉ុន្តែទណ្ឌកម្មកាន់តែធ្វើឱ្យកូរ៉េខាងជើង ក៏ដូចជាប្រជាជនជាច្រើនម៉ឺននាក់ ត្រូវរងគ្រោះ ខណៈរដ្ឋាភិបាល ផ្តោតលើការអភិវឌ្ឍសព្វាវុធ។ នៅក្នុងឆ្នាំ២០២០ កូរ៉េខាងជើងនាំចេញទៅចិនមានទំហំ ៤៨លានដុល្លារ និងនាំចូលពីចិនក្នុងទំហំ ៧១២លានដុល្លារប៉ុណ្ណោះ។ 

 

ស្របពេលពិភពលោកផ្ទុះឡើងនៃជំងឺកូវីដ-១៩ សេដ្ឋកិច្ចកូរ៉េខាងជើង កាន់តែពិបាក ដោយសារប្រទេសមួយនេះ បានបិទព្រំដែនទាំងអស់ ដើម្បីបង្ការករណីឆ្លងនៅក្នុងប្រទេស។ នៅខែតុលា ឆ្នាំ២០២០ លោកគីម បានចេញមុខសំទោសជាសាធារណៈ ដោយលាយឡំជាមួយទឹកភ្នែក ដោយសារលោកដឹកនាំប្រទេសទទួលបរាជ័យ ក្នុងស្ថានភាពដ៏លំបាក។