បណ្តាប្រទេសអឺរ៉ុបជាច្រើន កំពុងផ្ទុះឡើងនៃករណីឆ្លងជំងឺកូវីដ-១៩ និងកំពុងស្ថិតក្រោមការគំរាមកំហែងនៃវីរុសបំប្លែងខ្លួនអូមីក្រុង។ ការគំរាមកំហែងបែបនេះ បានធ្វើឱ្យហូឡង់ប្រកាសបិទប្រទេសរហូតដល់ថ្ងៃទី១៤ ខែមករា ខណៈពេលបារាំងលុបចោលពិធីបាញ់កាំជ្រួចអបអរពិធីឆ្លងឆ្នាំសកលខាងមុខ។ 

 

ស្របពេលពេលហូឡង់ប្រកាសបែបនេះ រដ្ឋមន្រ្តីសុខាភិបាលអាល្លឺម៉ង់ លោក Karl Lauterbach បានលើកឡើងថា អាល្លឺម៉ង់នឹងមិនបិទខ្ទប់មុនថ្ងៃបុណ្យណូអែលឡើយ។ បើទោះគ្មានការបិទខ្ទប់ក៏ដោយ ប៉ុន្តែរដ្ឋមន្រ្តីសុខាភិបាលរូបនេះ បានព្រមានថា អាល្លឺម៉ង នឹងប្រឈមរលកឆ្លងជំងឺកូវីដ-១៩​ លើកទី៥។ 

 

«យើងបានឆ្លងចូលដំណាក់កាលឆ្លងវីរុសបំប្លែងខ្លួនអូមីក្រុងដ៏សំខាន់មួយ»។ លោក Lauterbach បានសង្កត់ធ្ងន់បែបនេះទៅកាន់ប្រព័ន្ធផ្សព្វផ្សាយ ARD មុនបន្ថែមថា រលកឆ្លងលើកនេះ មិនអាចបញ្ឈប់បានទាំងស្រុងឡើយ។ 

 

ក្នុងកិច្ចសម្ភាសមួយទៀតជាមួយសារព័ត៌មាន BILD រដ្ឋមន្រ្តីសុខាភិបាលអាល្លឺម៉ង់ បានបន្តថា លោក មិនរំពឹងឡើយ ថានឹងមានការបិទខ្ពស់ដ៏តឹងរ៉ឹង បន្ទាប់ពីថ្ងៃឈប់សម្រាក។ ដើម្បីទប់ស្កាត់ជំងឺកូវីដ-១៩ ក៏ដូចជាករណីឆ្លងវីរុសបំប្លែងខ្លួនអូមីក្រុង អាល្លឺម៉ង់ កន្លងមក បានដាក់ចេញវិធានការហាមឃាត់ប្រជាជនដែលមិនទាន់ទទួលវ៉ាក់សាំងបង្ការជំងឺកូវីដ-១៩ ចូលកន្លែងដែលមិនចាំបាច់។

 

បើតាមលោករដ្ឋមន្រ្តីសុខាភិបាល វិធានការមួយចំនួន អាចនឹងក្នុងអំឡុងពេលឈប់សម្រាកចុងឆ្នាំ ក្នុងគោលបំណងទប់ស្កាត់ករណីឆ្លងវីរុសអូមីក្រុង។ យ៉ាងណាមិញ លោក Lauterbach មិនបានបញ្ជាក់ពីវិធានការនោះឱ្យបានច្បាស់លាស់ឡើយ ព្រោះកំពុងស្ថិតនៅក្នុងការពិភាក្សា។ 

 

សូមបញ្ជាក់ថា អាល្លឺម៉ង់នៅថ្ងៃទី១៩ ខែធ្នូ​ បានរាយការណ៍ករណីឆ្លងជំងឺកូវីដ-១៩​ ចំនួនជិត ៣ម៉ឺនករណី និងអ្នកស្លាប់មានចំនួន ១៨០នាក់។ ករណីឆ្លងជំងឺកូវីដ-១៩ សរុបមានចំនួន ៦,៨លានករណី និងអ្នកស្លាប់សរុបមានជាង ១០ម៉ឺននាក់៕