សៀមរាប៖ លោក សែម វេ ជាជនមានពិការភាពជើងតាំងពីកំណើត។ ទោះមានពិការភាព ដើរប៉ាក់ប៉ើកៗ តែបុរសវ័យ៣០ឆ្នាំរូបនេះ នៅតែតស៊ូស៊ីឈ្មួលធ្វើស្គរឱ្យគេ ដើម្បីរកប្រាក់ចិញ្ចឹមម្ដាយជរាវ័យ៧០ឆ្នាំម្នាក់ និងកូនតូចម្នាក់ទៀតជាបន្ទុក។ តាមរយៈការងារធ្វើស្គរ អាចផ្ដល់ចំណូលឱ្យលោក បាន២ម៉ឺនរៀលក្នុងមួយថ្ងៃ ប៉ុន្តែបើស្គរគេលក់មិនដាច់លោក ក៏គ្មានចំណូលដូចគ្នា។
សូមអញ្ជើញលោក អ្នកនាង ទស្សនា វីដេអូពីដំណើរជីវិតលោក សែម វេ ដូចតទៅ៖
ចាប់កំណើតក្នុងគ្រួសារខ្សត់ខ្សោយ ជាមួយកាយសម្បទាមិនពេញលក្ខណៈដូចមនុស្សទូទៅ លោក សែម វេ មិនបានទទួលការអប់រំច្រើននោះទេ។ រស់នៅភូមិរហាល ស្រុកអង្គរធំ ដែលប្រជាជនភាគច្រើនប្រកបរបរធ្វើស្គរលក់ លោក សែម វេ ក៏បានរៀនចំណេះជំនាញនេះពីអ្នកជិតខាង និងបងថ្លៃរបស់លោក។ រហូតដល់វ័យ ១៥ឆ្នាំ លោកក៏បានស៊ីឈ្នួលធ្វើស្គរ ឱ្យពូរហូតមកដល់សព្វថ្ងៃ។
អង្គុយចាំងឈើ នៅក្រោមម្លប់ដើមទឹកដោះគោបណ្ដើរ ជូតញើសដែលហូរដោយការនឿយហត់បណ្ដើរ បុរសសម្បុរស្រអែមរូបនេះមិនត្អូញត្អែរពីរបរធ្វើស្គរនោះទេ។ « ថាទៅយើងនៅកន្លែងម្លប់ថាពិបាក ក៏មិនពិបាក ថាស្រួលក៏មិនស្រួលពេក។ ណាមួយយើងអាចធ្វើនៅជិតផ្ទះ មិនពិបាកទៅឆ្ងាយ »។ នេះជាការលើកឡើងរបស់ លោក សែម វេ។
ដើម្បីបានស្គរ ដែលមានសំឡេងពិរោះ លោក សែម វេ ត្រូវធ្វើស្គរដោយផ្ចិតផ្ចង់ និងច្រើនដំណាក់កាល។ ដំបូង លោកត្រូវយកដើមឈើ ដែលទិញបានពីអ្នកភូមិ យកមកអារជាកង់ៗ តូចធំ តាមប្រភេទទំហំស្គរ។ បន្ទាប់មកលោកត្រូវយកកំណាត់ឈើទាំងនោះ មកចាំងសំបកឈើចេញ រួចយកទៅក្រឡឹងយកសាច់ឈើខាងក្នុងចេញ និងធ្វើឱ្យមានរាងជាស្គរ។ លោក សែម វេ ត្រូវបន្តយកឈើរូបរាងស្គរនោះ ទៅដេរ ស្បែកពស់ថ្លាន់ បិទមាត់ស្គរ ទើបស្គរនោះ អាចវាយទៅមានសំឡេង។
ដ្បិតមានពិការភាព តែក្នុងមួយថ្ងៃលោក សែម វេ អាចធ្វើស្គរបានចំនួន ៤ ទៅ ៥ មិនចាញ់ អ្នកមានកាយសម្បទាគ្រប់គ្រាន់នោះទេ។ តាមរយៈការងារពីម៉ោង៧ឬ៨ព្រឹក ដល់ល្ងាចប្រហែលម៉ោង ៥ ល្ងាច បុរសវ័យ៣០ឆ្នាំរូបនេះអាចទទួលបានថ្លៃឈ្នួល ២ម៉ឺនរៀលប៉ុណ្ណោះ ខណៈមិនទាន់មានជំងឺកូវីដ-១៩ លោកអាចទទួលបានថ្លៃឈ្នួល ២៨០០០រៀល។ នោះក៏ព្រោះតែបច្ចុប្បន្នខេត្តសៀមរាប មិនសូវមានទេសចរអន្តរជាតិ ទើបធ្វើឱ្យស្គរលក់មិនសូវដាច់។
បច្ចុប្បន្នកន្លែងធ្វើស្គរនេះ ជួលតែលោក សែម វេ ប៉ុណ្ណោះ ដោយសារម្ចាស់ទីតាំងធ្វើស្គរលក់នេះ អាណិតរូបលោក មិនអាចទៅធ្វើការអ្វីនៅឆ្ងាយ ឬ ធ្ងន់ៗបាន។ បុរសចំណាស់ ដែលជាម្ចាស់ទីតាំងផលិតស្គរ និងជាពូរបស់លោក សែម វេ បាននិយាយថា៖« ខ្ញុំឱ្យថ្លៃឈ្នួល គាត់មួយថ្ងៃ២ម៉ឺន កាលមានភ្ញៀវច្រើនខ្ញុំឱ្យមួយថ្ងៃ ៧ដុល្លារ។ កាលណារកឈើបាន ទើបហៅមកធ្វើ។ រាល់ថ្ងៃឱ្យនៅធ្វើតែម្នាក់ហ្នឹងទេ ព្រោះអាណិតក្មួយ គ្នាមិនដឹងទៅធ្វើការកន្លែងណាផ្សេង ទៅធ្វើសំណង់ឱ្យគេក៏មិនកើត។ ជីវភាពគ្នាក៏ដុនដាបណាស់ដែរ ចិញ្ចឹមម្ដាយ៧០ឆ្នាំ និងប្រពន្ធកូនតូច »។
អំឡុងពេលរីករាលដាលនៃជំងឺកូវីដ-១៩ និងមានការបិទខ្ទប់ លោក សែម វេ បានបាត់បង់ការងារជាអ្នក ធ្វើស្គរឱ្យគេមួយរយៈ ដែលនាំឱ្យលោកគ្មានប្រាក់សម្រាប់ផ្គត់ផ្គង់គ្រួសារ។ បុរសរូបនេះក៏ត្រូវទៅធ្វើកម្មករ ធ្វើកូនជ្រូកដីសន្សំលុយ នៅសង្កាត់ជ្រាវ ខេត្តសៀមរាប។ លោកឡើងដូច្នេះ៖ « ជីវភាពប៉ះពាល់ខ្លាំង ហើយក៏សម្រេចទៅធ្វើការឱ្យគេ នៅជ្រាវ។ និយាយទៅពិបាកដែរព្រោះយើង ត្រូវនៅឆ្ងាយពីផ្ទះ»។
ក្រោយរដ្ឋាភិបាលសម្រេចឱ្យខេត្តសៀមរាបទទួលទេសចរ ឡើងវិញ លោក សែម វេ ក៏បានត្រឡប់មកធ្វើស្គរវិញ តែមិនសូវមានការងារធ្វើជាប្រចាំនោះទេ ព្រោះមិនមានគេបញ្ជាទិញច្រើននៅឡើយ។ តែទោះជាយ៉ាងនេះក្ដី បុរសវ័យ៣០ឆ្នាំរូបនេះ នៅតែមានក្ដីរីករាយព្រោះអាចត្រឡប់មកធ្វើការងារ ដែលខ្លួនស្រឡាញ់ និងនៅជិតផ្ទះ ហើយអាចមើលមុខកូនតូច និងម្ដាយជរារាល់ថ្ងៃវិញ។
ការងារជាអ្នកធ្វើស្គរ ពិតជាមានសារសំខាន់ណាស់សម្រាប់ជនមានពិការភាពរូបនេះ។ លោក សែម វេ ថ្លែងប្រាប់សារព័ត៌មានThmeyThmey25 ទាំងសប្បាយរីករាយដូច្នេះថា៖ « របរនេះសំខាន់សម្រាប់ជីវិតរបស់ខ្ញុំ ចេះជំនាញនេះខ្ញុំអាចចិញ្ចឹមឆ្នាំងបាយប្រចាំថ្ងៃ។ ជួយឱ្យជីវភាពធូរដែរ យើងបានម៉ាហូបៗស្រួល វាមិនសូវពិបាក។ ខ្ញុំស្រឡាញ់របរនេះណាស់ ព្រោះពេលធ្វើបានស្អាតមានចាស់ៗសសើរ » ៕