លោក សុខ លូ អភិបាលខេត្តបាត់ដំបង បានលើកឡើងថា ការដាំកូនឈើឡើងវិញនេះ គឺដើម្បីចូលរួមទប់ស្កាត់ការកាប់ទន្ទ្រានខុសច្បាប់នៅតំបន់ដីព្រៃលិចទឹកបឹងទន្លេសាប។  លោកបានបន្ថែមថា សកម្មភាពដាំកូនឈើចម្រុះនេះ និងបន្តទៅលើតំបន់ផ្សេងៗទៀត ដែលកំពុងរងការគំរាមកំហែង ដោយសារសកម្មភាពនៃការបំផ្លាញកន្លងមក។

« យើងមិនមែនដាំតែពេលនេះទេ គឺស្រុកចំនួន៤ ដែលរងការកាប់ទន្រ្ទានខុសច្បាប់ គឺមានស្រុកឯកភ្នំ ថ្មគោល សង្កែ និងស្រុកមោងឬស្សី នឹងបន្តដាំបន្ថែមទៀត ទាំងក្រុមការងារខេត្តទទួលបន្ទុកស្រុកទាំង៤ និងអាជ្ញាធរស្រុក ត្រូវទទួលខុសត្រូវក្នុងការដាំ និងថែទាំបន្ត»។ នេះជាការលើកឡើងរបស់ លោក សុខលូ។ 

 

លោក ជួង សុភា នាយខណ្ឌរដ្ឋបាលជលផលខេត្តបាត់ដំបង បានឱ្យដឹងថា យុទ្ធនាការដាំកូនឈើនេះ អាជ្ញាធរ បានដាំដើមឈើនៅចន្លោះបង្គោលព្រំប្រទល់លេខ២៨៦ដល់២៨៧ និង ២៨៦ ទៅ ២៨៥ ដែលដាំលាយគ្នាមានដូចជា កូនរាំង និងដើមរំដេញ សរុប១០៥៤ដើម និង គ្រាប់ត្នោត ១០៥៤ គ្រាប់។
 

តាមរបាយការណ៍របស់គណកម្មាធិការទប់ស្កាត់និងបង្រ្កាបបទល្មើស ឬទន្រ្ទាន ដីព្រៃលិចទឹក នៅតំបន់បីនៅខេត្តបាត់ដំបង មានការរុករានដីព្រៃលិចទឹក សរុបចំនួន១២២២៥.៨ហិកតា ចំនួន២៩ទីតាំង នៅស្រុកមោងឬស្សី ស្រុកសង្គែ ស្រុកឯកភ្នំ និង ស្រុកថ្មគោល ៕