ដោយ៖ ហេង ស្រីលីន
 

 

ខេត្តមណ្ឌលគិរីនៅតែជាទិសដៅទេសចរណ៍ពេញនិយម រាល់ឱកាសបុណ្យទាននានា។ ភ្ញៀវទេសចរភាគច្រើននិយម ទៅកម្សាន្តនៅក្រុងសែនមនោរម្យ ទឹកជ្រោះប៊ូស្រា ភ្នំដោះក្រមុំ និងតំបន់ទេសចរណ៍ធម្មជាតិដទៃទៀត។ លោក ងិន សុវិមានbប្រធានមន្ទីរទេសចរណ៍ខេត្តមណ្ឌលគីរី បានប្រាប់សារព័ត៌មានថ្មីៗ២៥ សម្រាប់ថ្ងៃឆ្លងឆ្នាំខាងមុខនេះ ភ្ញៀវទេសចរក៏សម្រុកទៅកម្សាន្តនៅខេត្តមណ្ឌលគិរីដូចរាល់ឆ្នាំផងដែរ។ ភ្ញៀវទេសចរ ដែលមានបំណងទៅលេងខេត្តមណ្ឌលគិរី ក៏អាចបោះតង់សម្រាកតាមរីសត និងតំបន់ធម្មជាតិផ្សេងៗដែរ។ 

 

លោកបញ្ជាក់ដូច្នេះ៖ «សម្រាប់ឆ្លងឆ្នាំខាងមុខនេះ បើតាមខ្ញុំដឹង ពួកគាត់(ភ្ញៀវ) ចាប់ផ្តើមកក់ទុកតាំងពី ខែ១០ មក  បើគិតមកទល់ពេលនេះពេញ ស្ទើរតែ១០០ភាគរយ ទៅហើយ ។ ភ្ញៀវខ្លះរកកន្លែងស្នាក់នៅមិនបានផង »។
 

បច្ចុប្បន្នខេត្តមណ្ឌលគិរី មានកន្លែងស្នាក់នៅសម្រាប់ទទួលភ្ញៀវទេសចរប្រមាណ ១ ៥០០បន្ទប់។ ស្របតាមកំណើនភ្ញៀវទេសចរនេះដែរ អាជីវករក៏កំពុងសាងសង់កន្លែងស្នាក់នៅបន្ថែមទៀត នៅក្នុងខេត្ត និងតាមគោលដៅទេសចរណ៍នីមួយៗ។
 

មន្ទីរទេសចរណ៍ខេត្តមណ្ឌលគីរី កំពុងរៀបចំសណ្ដាប់ធ្នាប់ក្នុងខេត្ត ហេដ្ឋារចនាសម្ព័ន្ធ និងពង្រឹងសេវាកម្មបន្ថែម នៅតាមគោលដៅទេសចរណ៍ពេញនិយមទាំងអស់ ក្រោយអាក់ខានទទួលភ្ញៀវទេសចរ ដោយសារជំងឺកូវីដ-១៩ ។

 

មន្ទីរទេសចរណ៍ នឹងរៀបចំកម្មវិធីសម្រាប់ថ្ងៃឆ្លងឆ្នាំខាងមុខនេះដូចជា ការបាញ់កាំជ្រួច និងការបញ្ចាំងរូបភាព និងវីដេអូ អំពីសក្តានុពលខេត្តនៅតាមទីប្រជុំជន ដើម្បីឱ្យខេត្តមួយនេះ ក្លាយជាគោលដៅពិសេសមួយ ក្នុងចំណោមតំបន់ទេសចរណ៍ដទៃទៀត។ សូមជម្រាបដែរថា ក្នុងពិធីបុណ្យឆ្លងឆ្នាំ២០២០-២០២១កន្លងមក ភ្ញៀវទេសចរដើរកម្សាន្តទូទាំងប្រទេសមានប្រមាណ ១លាន ២០ម៉ឺននាក់។​ ខេត្តមណ្ឌលគិរីទទួលបានភ្ញៀវទេសចរជាង ១ម៉ឺននាក់៕