សម្ដេច ហ៊ុន សែន បានផ្ដល់ទឹកប្រាក់ចំនួន ៤០លានរៀល របស់ក្រសួងអប់រំ យុវជន និងកីឡា បូករួមជាមួយថវិកាផ្ទាល់ខ្លួន សម្ដេច ១០,០០០ដុល្លារ ដល់កីឡាការិនី អ៊ុក ស្រីមុំ នាព្រឹកថ្ងៃទី៥ មករា ២០២២។ ក្រៅពីទឹកប្រាកនេះ ក៏មានការដំឡើងឋានន្ដរស័កជាឧត្តមសេនីយ៍ត្រី ដល់កីឡាការិនី អ៊ុក ស្រីមុំ ។ សម្ដេច បានបញ្ជាក់ថា ការដំឡើងឋានន្តរស័ក «មួយថ្នាក់»ទៀត ដល់កីឡាករ កីឡាការិនី ដែលបម្រើការងារក្នុងជួរមន្ត្រីរាជការនេះ ដើម្បីលើកទឹកចិត្តពួកគេ។
 

សម្ដេច បានបន្ថែមថា ការប្រកួតនៅឆាកអន្ដរជាតិ មិនមែនជាការប្រកួតផ្ទាល់ខ្លួនទេ តែគឺជាការប្រកួតតំណាងឲ្យកម្ពុជាទាំងមូល ។ «មិនមែនបញ្ហាផ្ទាល់ខ្លួនទេ ប៉ុន្តែតំណាងឲ្យជាតិទាំងមូល» ។ នេះបើតាមប្រមុខរដ្ឋាភិបាល។
 

ដោយឡែកលោក សុខ ម៉ុង គ្រូបង្វឹកកីឡាប៉េតង់  ក៏ទទួលបានថវិកា៤០,០០០,០០០រៀលដែរ។ ការឧបត្ថម្ភទាំងនេះ ជាផ្នែកមួយជំរុញឲ្យវិស័យកីឡាកម្ពុជាមានការវិវឌ្ឍទៅមុខ ។ 
 

កន្លងមកកីឡាករ និងកីឡាការិនី ដែលសម្រេចបានមេដាយមាសពិភពលោកនេះ នឹងទទួលបានទឹកប្រាក់១២០លានរៀល។ ប៉ុន្តែទឹកប្រាក់ទាំងនេះ ត្រូវបានកែតម្រូវមកត្រឹម៤០លានរៀលវិញ តាមរយៈការប្រកាសអន្តរក្រសួង របស់ក្រសួងអប់រំ យុវជន និងកីឡា និងក្រសួងសេដ្ឋកិច្ច ហិរញ្ញវត្ថុ។ នេះបើតាមលោក វ៉ាត់ ចំរើ់ន អគ្គលេខាគណៈកម្មាធិការជាតិអូឡាំពិកកម្ពុជា ។
 

ថ្លែងប្រាប់សារព័ត៌មានថ្មីៗ លោក វ៉ាត់ ចំរើន បានបន្ថែមថា៖«កាលពីមុននឹង យើងយកតាមប្រាក់រង្វាន់[១២០លានរៀល]មេដាយអូឡាំពិក។ មេដាយមាសអូឡាំពិក និង[មេដាយមាស]កម្រិតពិភពលោកហ្នឹង យកដូចគ្នា ១២០លានរៀល ក្រោយមកយើងបានវាយតម្លៃលក្ខណៈបច្ចេកទេស រាជរដ្ឋាភិបាល ក៏បានកែសម្រួលប្រាក់រង្វាន់ឲ្យទៅតាមកម្រិតបច្ចេកទេស ឲ្យវាដាច់ពីគ្នា គឺមេដាយមាសពិភពលោកផ្សេង និងមេដាយកម្រិតអូឡាំពិកផ្សេង »។
 

បើតាមអនុក្រឹត្យរដ្ឋាភិបាលកន្លងមក មេដាយមាសក្នុងព្រឹត្តិការអូឡាំពិក បានទឹក១២០លានរៀល មេដាយប្រាក់ បាន៨០លានរៀល និងមេដាយសំរឹទ្ធ បាន៦៤លានរៀល។ ចំណែកមេដាយមាស ក្នុងព្រឹត្តិការណ៍កីឡាអាស៊ីរដូវក្តៅ ឬរដូវរងារវិញ បានទឹកប្រាក់ ៨០លានរៀល ខណៈមេដាយប្រាក់ បាន៤០លានរៀល និងមេដាយសំរឹទ្ធ បាន២៤លានរៀល។ សម្រាប់មេដាយមាស ក្នុងការប្រកួតកីឡាអាស៊ានប៉ារ៉ាហ្គេម បាន៤០លានរៀល , មេដាយប្រាក់បាន៣០លានរៀល និងមេដាយសំរឹទ្ធ ១៦លានរៀល។ ទឹកប្រាក់ទាំងនេះ សម្រាប់ជ័យលាភីឯកត្តជន និងជនពិការឯកត្តជន។
 

បន្ថែមពីនេះ ក្រសួងអប់រំយុវជន និងកីឡា និងក្រសួងសេដ្ឋកិច្ចហិរញ្ញវត្ថុ ក៏បានចេញប្រកាសអន្ដរក្រសួង ស្ដីពីគោលការណ៍ឧបត្ថម្ភ ដល់ការប្រមូលផ្ដុំកីឡាករ និងកីឡាការិនីជម្រើសជាតិ និងការផ្ដល់ប្រាក់រង្វាន់ជ័យលាភី ក្នុងការប្រកួតក្នុងប្រទេស និងក្រៅប្រទេស ដោយបានបង្កើនប្រាក់ឧបត្ថម្ភប្រចាំខែ ជា៣កម្រិត ។ កម្រិត១ គ្រូបង្វឹក បង្ហាត់កីឡាករ និងកីឡាការិនី ទទួលមេដាយស៊ីហ្គេម បាន១៧០០០០០រៀល ក្នុងមួយខែ ខណៈកីឡាករ និងកីឡាការិនី ទទួលមេដាយស៊ីហ្គេម បាន១៦០០០០០រៀល ក្នុងមួយខែ ។ កម្រិត២ គ្រូបង្វឹក បង្ហាត់កីឡាករ និងកីឡាការិនី ទទួលមេដាយស៊ីហ្គេម បាន១៥០០០០០រៀល ក្នុងមួយខែ ស្របពេលកីឡាករ និងកីឡាការិនី ទទួលមេដាយស៊ីហ្គេម បាន១៤០០០០០រៀល ក្នុងមួយខែ។ 
 

ដោយឡែកកម្រិត៣ គ្រូបង្វឹក បង្ហាត់កីឡាករ និងកីឡាការិនី ពុំទទួលបានមេដាយ ទទួលបាន១១០០០០០រៀល ក្នុងមួយខែ ហើយកីឡាករ និងកីឡាការិនី ពុំទទួលបានមេដាយ បាន ១០០០០០០រៀល ក្នុងមួយខែ ។ 
 

ក្រៅពីនេះ គ្រូបង្វឹកជម្រើសជាតិទាំងអស់ ក៏ទទួលបានរបបអាហារប្រចាំថ្ងៃ ដែលស្មើរ៤៤០០០រៀល ក្នុងមួយថ្ងៃ។ គ្រូបង្វឹក និងកីឡាករ កីឡាការិនី ហ្វឹកហាត់នៅក្រៅប្រទេស ដែលទទួលបានមេដាយស៊ីហ្គេមឡើងទៅ បានទឹកប្រាក់ ២៨០០០០០រៀល ក្នុងមួយខែ ។ ចំពោះ គ្រូបង្វឹក និងកីឡាករ និងកីឡាការិនី និងអនុរ័ក្ស ដែលមិនទាន់ទទួលបានមេដាយ បានបៀវត្ស ២០០០០០០រៀល ក្នុងមួយខែ ៕