ជាតិ
បទសម្ភាសន៍
ក្រឡានដំណើបខ្មៅដុតក្នុងដូងក្រអូប មានសក្តានុពលក្នុងទីផ្សារ តែខ្វះអ្នកផ្គត់ផ្គង់វត្ថុធាតុដើម អ្នកស្រី លី ច័ន្ទធូ អាជីវករអ្នកច្នៃក្រឡានដុត ក្នុងដូងក្រអូប
×
ដោយ៖ សុង សុធាវី
អ្នកស្រី លី ច័ន្ទធូ បានចាប់ផ្តើមអាជីវករដុតក្រឡានដំណើបខ្មៅក្នុងដូងក្រអូប នៅក្នុងខេត្តពោធិ៍សាត់ រយៈពេលប្រមាណ២ឆ្នាំមកហើយ។ អ្នកស្រី លី ច័ន្ទធូ បានឱ្យកម្មវិធី«គំនិតថ្មី» ដឹងថា ក្នុងមួយថ្ងៃអ្នកស្រីអាចចែកចាយទៅឱ្យអតិថិជន នៅតាមបណ្តាខេត្តពី ៦០០-៨០០ នំក្នុងមួយថ្ងៃៗ។ ដ្បិតទទួលបានការគាំទ្រច្រើន ប៉ុន្តែអ្នកស្រី ច័ន្ទធូ មិនសូវសប្បាយចិត្តឡើយ ព្រោះសព្វថ្ងៃ អ្នកស្រីត្រូវបង្ខំចិត្តទិញដូងក្រអូបពីប្រទេសថៃ។ ស្ត្រីវ័យ ៣៨ឆ្នាំរូបនេះ សង្ឃឹមថា ខ្លួននឹងអាចរកអ្នកផ្គត់ផ្គង់ក្នុងស្រុកបាន ហើយអ្នកស្រី ក៏អាចជួយដល់ម្ចាស់កសិដ្ឋានដូងក្រអូបក្នុងស្រុកបានមួយចំណែកដែរ។
ដើម្បីជ្រាបកាន់តែច្បាស់ សូមលោកអ្នកនាងទស្សនាបទសម្ភាសន៍រវាងកញ្ញា សុង សុធាវី អ្នកសម្របសម្រួល កម្មវិធី «គំនិតថ្មី» និង អ្នកស្រី លី ច័ន្ទធូ ដូចតទៅ៖
អ្នកស្រី លី ច័ន្ទធូ ជាអ្នកធ្វើនំក្រឡានអង្ករដំណើបខ្មៅដុត ក្នុងដូងក្រអូប។ ក្រឡានមួយតម្លៃ៨ពាន់រៀល ហើយអ្នកស្រី លី ច័ន្ទធូ បានថ្លែងប្រាប់កម្មវិធី «គំនិតថ្មី» នៃសារព័ត៌មានថ្មីៗ ថា
ខ្លួនអាចផ្គត់ផ្គង់ក្រឡានដ៏ប្លែកនេះ បានប្រមាណពី៦០០ ទៅ៨០០គ្រាប់(នំ)ឯណោះ ក្នុងមួយថ្ងៃៗ។ ក្រៅពីក្រឡានដូងក្រអូប ស្ត្រីវ័យ៣៧រូបនេះ បានកែច្នៃប្រភេទក្រឡានដែលមានស្នូលត្រាវ និងល្ពៅបន្ថែមទៀតដែរ ដើម្បីផ្តល់ជម្រើសកាន់តែច្រើនទៅឱ្យអតិថិជន។
អ្នកស្រី លី ច័ន្ទធូ អាជីវករអ្នកច្នៃក្រឡានដុត ក្នុងដូងក្រអូប
ដ្បិតតែទទួលបានការពេញនិយម ប៉ុន្តែអ្នកស្រី ច័ន្ទធូ មិនសូវសប្បាយចិត្តព្រោះសព្វថ្ងៃ អ្នកស្រី ត្រូវបង្ខំចិត្តទិញដូងក្រអូប ដែលជាវត្ថុធាតុដើមដ៏សំខាន់មួយសម្រាប់ដុតក្រឡាននេះ ពីប្រទេសថៃ ខណៈអង្ករដំណើបខ្មៅ សណ្តែកគ្រប់ប្រភេទ និងដូងទុំ អ្នកស្រីអាចរកអ្នកផ្គត់ផ្គង់នៅក្នុងស្រុកបាន។ ស្ត្រីរូបនេះ បញ្ជាក់បន្ថែមថា៖«បច្ចុប្បន្ន បើក្នុងស្រុកខ្មែរយើង មានអ្នកផ្គត់ផ្គង់ដូងក្រអូបបកសំបករួចស្រេច ខ្ញុំនឹងទិញរបស់ខ្មែរយើងវិញ ព្រោះចង់គាំទ្ររបស់ខ្មែរដូចគ្នា តាមលទ្ធភាពដែលអាចធ្វើទៅបាន»។
បើតាមស្រ្តីវ័យ៣៧ឆ្នាំរូបនេះ វិបត្តិកូវីដ-១៩ មិនបានប៉ះពាល់របរខ្លួនប៉ុន្មាននោះទេ ព្រោះអ្នកស្រី ទទួលបានការបញ្ជាទិញ តិច ច្រើន ពីអតិថិជនជាប្រចាំ ប៉ុន្តែផលលំបាកមួយ គឺភាពយឺតយ៉ាវនៃការដឹកជញ្ជូនក្រឡានទៅឱ្យអតិថិជន ដែលនៅតាមខេត្ត៕
Tag:
ក្រឡានដំណើបខ្មៅ
ក្រឡានដូងក្រអូប
SME
លី ច័ន្ទធូ
ពោធិ៍សាត់
© រក្សាសិទ្ធិដោយ thmeythmey.com