ភ្នំពេញ៖ មនុស្សចាស់ជរាជួបបញ្ហា សេវាសុខភាព បញ្ហាផ្លូវចិត្ត និងបញ្ហាប្រាក់ចំណូល ពិសេសក្នុងបរិបទកូវីដ-១៩ កន្លងមក។ ទោះបីជារដ្ឋាភិបាលមានគោលនយោបាយផ្សេងៗ លើការលើកកម្ពស់សុខុមាលភាពរបស់មនុស្សវ័យចាស់ក៏ដោយ ប៉ុន្តែសេវាគាំពារសង្គម មិនទូលំទូលាយឡើយ។ មន្ត្រីអង្គការសង្គមស៊ីវិលមើលឃើញថា មានតែអតីតមន្ត្រីរាជការ និងអតីតយុទ្ធជនប៉ុណ្ណោះ ដែលទទួលបានប្រាក់សោធននិវត្ត ដោយក្រុមមនុស្សចាស់ចំនួនតិចតួចនៅឡើយ ដែលទទួលបានជំនួយតាមរយៈកម្មវិធីជំនួយសង្គមដែលផ្ដោតលើជនក្រីក្រ និងជនងាយរងគ្រោះ។
ទោះវ័យឈានដល់ពី៦០ទៅជាង៨០ឆ្នាំក៏ដោយ ក៏នៅតែមានតួនាទីរកចំណូល
មិនមែនមនុស្សគ្រប់រូប សុទ្ធតែនឿយមុនស្រណុកក្រោយនោះឡើយ។ មនុស្សចាស់ ពិសេស ស្រី្តចំណាស់មួយចំនួននៅដើរតួនាទីយ៉ាងសំខាន់ក្នុងការរកចំណូលចិញ្ចឹមគ្រួសារ បើទោះបីជាឈានដល់វ័យពី៦០ទៅជាង៨០ឆ្នាំ ក៏ដោយ។
អ្នកស្រី ឈន់ ង៉ែត អាយុ៦២ឆ្នាំ ជាអ្នកដាំបន្លែលក់ ហើយមើលថែកូនចៅៗ៤នាក់។ រូបពី HAC
វ័យ៦២ឆ្នាំ អ្នកស្រី ឈន់ ង៉ែត រស់នៅឃុំព្រៃគុយ ស្រុកកំពង់ស្វាយ ខេត្តកំពង់ធំ រ៉ាប់រងមើលថែទាំចៅរហូតដល់៤នាក់ ក្នុងនោះ២នាក់ មានឪពុកម្តាយរស់នៅភ្នំពេញ និង២នាក់ទៀត រស់នៅក្នុងភូមិជាមួយគ្នា។
ស្រី្តរូបនេះ រកចំណូលបានពីការដាំបន្លែលក់ និងប្រាក់ដែលកូនផ្ញើឲ្យ។ នាអំឡុងពេលកូវីដ-១៩ ប្រាក់ដែលកូនធ្លាប់តែផ្ញើ៤០០ដុល្លារក្នុងមួយខែ គឺធ្លាក់ត្រឹមតែ២០០ដុល្លារ ហើយបន្លែដែលដាំលក់ក៏ចុះថោក។
មិនត្រឹមតែបារម្ភពីបញ្ហាហិរញ្ញវត្ថុនោះទេ អ្នកស្រីក៏ភ័យខ្លាចក្នុងការប្រាស្រ័យទាក់ទងគ្នាក្នុងមូលដ្ឋានដែរ ដោយតែការរីករាលដាលកូវីដ-១៩។ អ្នកស្រី ង៉ែត បានរៀបរាប់ថា៖ «ខ្ញុំចាស់ហើយ តែត្រូវមើលថែទាំចៅ៤នាក់…ខ្ញុំគ្មានពេលគ្រប់គ្រាន់សម្រាកផ្ទាល់ខ្លួនឡើយ ហើយដើរលក់បន្លែដើម្បីផ្គត់ផ្គង់គ្រួសារទៀត»។
យោងតាមរបាយការណ៍ស្រាវជ្រាវរបស់អង្គការមនុស្សចាស់កម្ពុជា (HAC) មនុស្សចាស់៦៧ភាគរយ មានបញ្ហាទំនាក់ទំនងនាអំឡុងពេលរីករាលដាលកូវីដ-១៩។ បញ្ហាទាំងនោះរួមមាន ទំនាក់ទំនងជាមួយអ្នកដទៃ ជាពិសេសពួកគាត់មិនអាចទៅវត្តអារាម និងពិធីបុណ្យនានា។
លោកតា សាង សាត វ័យ៨៤ឆ្នាំ ជាអ្នកដាំស្លឹកគ្រៃលក់។ រូបពី HAC
លោកតា សាង សាត នៅភូមជំការឡាហុង ឃុំសាស្តា ស្រុកសំពៅលូន ខេត្តបាត់ដំបង ពោលថា វ័យកាន់តែចាស់ សុខភាពលោកកាន់តែខ្សោយ គឺឈឺខ្នង និងសន្លាក់ឆ្អឹងជើង ស្ទើររាល់ថ្ងៃ។ ស្ថិតក្នុងវ័យ៨៤ឆ្នាំ លោកតាបានត្រឹមដាំស្លឹកគ្រៃក្បែរផ្ទះលក់ប៉ុណ្ណោះ ដោយក្នុងមួយខែគាត់ប្រមូលផលស្លឹកគ្រៃ៥ដង ហើយរាល់ពេលប្រមូលផលគឺលក់បានប្រមាណ២ម៉ឺនរៀល។
បុរសវ័យចំណាស់រូបនេះ ក៏មានជំនាញជាអាចារ្យដែរ ដែលអាចមានចំណូលបន្ថែមម្ដងកាលបានប្រមាណ៣ម៉ឺនរៀល។ ក្រៅពីនេះ លោកបានទទួលជំនួយខ្លះពីសមាគមនុស្សចាស់ និងការឧបត្ថម្ភសាច់ប្រាក់តាមរយៈប័ណ្ណក្រីក្រ។
«ខ្ញុំអាយុ៨៤ឆ្នាំហើយ ប៉ុន្តែនៅបន្តធ្វើការដូចសព្វដង ដើម្បីរកប្រាក់ផ្គត់ផ្គង់គ្រួសារ ទោះបីស្ថានភាពសុខភាពខ្ញុំយ៉ាប់យ៉ឺនយ៉ាងណាក៏ដោយ…គ្រួសារខ្ញុំនៅតែពឹងផ្អែកលើខ្ញុំទាំងការសម្រេចចិត្តលើកិច្ចការផ្ទះ និងការដោះស្រាយបញ្ហាផ្សេងៗ»។ នេះបើតាមការលើកឡើងរបស់លោកតា សាង សាត។
របាយការណ៍ HAC ដែលបានចុះសិក្សាក្នុងខេត្ត-រាជធានីចំនួនបី មានខេត្តបាត់ដំបង កំពង់ធំ និងរាជធានីភ្នំពេញ បង្ហាញថា ក្នុងចំណោមក្រុមមនុស្សចាស់៦០នាក់ មានជាង៧០ភាគរយពឹងផ្អែកលើចំណូលពីសមាជិកគ្រួសារផ្ដល់ឲ្យ។ នៅអំឡុងពេលកូវីដ-១៩ ស្ថានភាពរបស់ពួកគាត់កាន់តែពិបាក ពោលគឺមាន៥៥ភាគរយរងផលប៉ះពាល់ក្នុងជីវិតរស់នៅប្រចាំថ្ងៃ។
លោក ទុំ វីរ៉ា នាយកប្រតិបត្តិអង្គការមនុស្សចាស់កម្ពុជា(HAC)
លោក ទុំ វីរ៉ា នាយកប្រតិបត្តិអង្គការមនុស្សចាស់កម្ពុជា (HAC) ថ្លែងប្រាប់ ThmeyThmey ថា ក្រុមមនុស្សចាស់ ពិបាកក្នុងការទៅទទួលសេវាពិនិត្យសុខភាព ដោយសារមានបញ្ហាផ្លូវចិត្តច្រើន និងធ្លាក់ចុះប្រភពចំណូល។
លោកបានបញ្ជាក់ថា៖ «ពួកគាត់ពិបាកក្នុងការធ្វើដំណើរទៅមកមន្ទីរពេទ្យ។ អ្វីដែលគួរឲ្យកត់សម្គាល់ទៀតនោះ ពេលរីករាលដាលកូវីដ-១៩ ពួកគាត់គិតច្រើនបារម្ភឆ្លង និងពិបាកព្យាបាល ពិសេសខ្លាចឆ្លងបន្តដល់សមាជិតគ្រួសារ ហើយចំណូលភាគច្រើនដែលធ្លាប់បានពីសាច់ញាតិក៏ពុំសូវមានដូចមុន»។
យោងតាម HAC មនុស្សចាស់គ្មានប័ណ្ណក្រីក្រ និងប្រាក់សោធនិវត្តន៍ ត្រូវកាជំនួយសម្រាប់រស់នៅ ពិសេសពេលមានជំងឺ។ ក្នុងចំណោមមនុស្សចាស់ជាច្រើន ខ្លះខ្វះស្បៀងអាហារ ខ្លះមិនមានផ្ទះ គ្មានដី ឬរស់នៅតាមវត្ត។ លើសពីនេះ មនុស្សចាស់មួយចំនួនត្រូវទុកចោល ដោយសារកូនៗមិនមើលថែ។
«ចាស់ខ្លះទោះបីនៅជាមួយកូនៗមានជីវភាពប្រសើរក៏នៅតែជួបបញ្ហាដែរ គាត់គិតច្រើន ហើយពេលឈឺ ថែមទាំងមិនហ៊ានសុំប្រាក់កូនៗ ឬ ចៅៗទៀត។ ពួកគាត់ជួបភាពតានតឹងនិងថប់បារម្ភច្រើន»។ នេះបើតាមការលើកឡើងរបស់លោក វីរ៉ា។
គួរពង្រឹងគោលនយោបាយ គាំពារដល់ក្រុមមនុស្សចាស់
រដ្ឋាភិបាលប្រារព្ធអបអរទិវាមនុស្សចាស់កម្ពុជា និងទិវាមនុស្សចាស់អន្តរជាតិ រៀងរាល់ថ្ងៃទី១ ខែតុលា ជារៀងរាល់ឆ្នាំ ដោយកាលពីឆ្នាំ២០២១ កន្លងមក ត្រូវបានរៀបចំឡើងក្រោមប្រធានបទ «ចូលរួមគាំទ្រថែទាំសុខុមាលភាពមនុស្សចាស់ គឺជាកត្តាដ៏សំខាន់ក្នុងការអនុវត្តប្រព័ន្ធគាំពារសុខុមាលភាពមនុស្សគ្រប់វ័យក្នុងសង្គមជាតិនៅកម្ពុជា»។
ក្នុងសារលិខិតរបស់ខ្លួន សម្តេចនាយករដ្ឋមន្ត្រី ហ៊ុន សែន បានបង្ហាញពីឆន្ទៈ និងបុព្វហេតុក្នុងការគោរពដឹងគុណមនុស្សវ័យចាស់ និងលើកកម្ពស់មនសិការជនរួមជាតិស្គាល់ពីគុណតម្លៃឥតគណនារបស់មនុស្សវ័យចាស់។
«ព្រឹទ្ធឱវាទ និងដំបូន្មានចាស់ទុំ គឺជាផ្នែកមួយនៃមូលដ្ឋានគ្រឹះដ៏រឹងមាំក្នុងការអប់រំសីលធម៌ និងចរិយាធម៌របស់សង្គមជាតិយើង»។ ប្រមុខរដ្ឋាភិបាល បានគូសបញ្ជាក់យ៉ាងដូច្នេះ ដោយបានលើកឡើងពីសារសំខាន់នៃការបង្កើតគណៈកម្មាធិការជាតិកម្ពុជាដើម្បីមនុស្សចាស់ ដែលជាយន្តការសម្រាប់អនុវត្តគោលនយោបាយជាតិស្តីពីមនុស្សចាស់២០១៧-២៣០ និងគម្រោងកម្មវិធីគាំទ្រផ្សេងៗ។
ទោះបីជាយ៉ាងណាក៏ដោយ នាយកប្រតិបត្តិអង្គការមនុស្សចាស់កម្ពុជា(HAC) វាយតម្លៃថា កិច្ចគាំពារផ្ទាល់ទៅដល់មនុស្សចាស់នៅកម្ពុជានៅមានកម្រិត។ លើសពីនេះ លោកកត់សម្គាល់ឃើញថា សមាគមចាស់ជរាតាមមូលដែលផ្ដួចផ្ដើមដោយរដ្ឋាភិបាលជាង១៦០០កន្លែង គឺប្រមាណ៨០ភាគឥតដំណើរការ។
លោក គុណ ជាស៊ីន ប្រធាននាយកដ្ឋានសុខុមាលភាពមនុស្សចាស់ នៃក្រសួងសង្គមកិច្ច អតីតយុទ្ធជន និងនីតិសម្បទា។ រូបពី នាយកដ្ឋានសុខុមាលភាពមនុស្សចាស់
ពាក់ព័ន្ធនឹង សមាគមនេះ លោក គុណ ជាស៊ីន ប្រធាននាយកដ្ឋានសុខុមាលភាពមនុស្សចាស់ នៃក្រសួងសង្គមកិច្ច អតីតយុទ្ធជន និងនីតិសម្បទា ទទួលស្គាល់ថាសមាគមជាង១៦០០កន្លែនៅតាមឃុំសង្កាត់ ឥតដំណើរការច្រើន ពោលគឺប្រមាណតែ៤០ភាគប៉ុណ្ណោះដំណើរការ។ ចំណែក សមាគមជាង៥០ភាគរយទៀត ដែលគ្មានដំណើរការដោយសារតាមសមាគមមូលដ្ឋានខ្វះធនធាន។
លោកថ្លែងប្រាប់សារព័ត៌មានថ្មីៗយ៉ាងដូច្នេះថា៖ «សមាគមបង្កើតហើយអត់ដំណើរការ គឺមានកត្តាច្រើន ទី១មកពីប្រធានសមាគមគាត់គ្មានឆន្ទៈធ្វើការ។ ទី២ សមាគម ខ្វះធនធានហិរញ្ញវត្ថុ»។
ដោយពិនិត្យបែបនេះ លោកអះអាងថា ក្រុមការងារក្រសួងសង្គមកំពុងសិស្សា និងរៀបចំផែនការដោះស្រាយបញ្ហាសមាគម រួមកិច្ចគាំពារបន្ថែមដល់ក្រុមមនុស្សចាស់។ គម្រោងផែនការនេះ គឺសម្រាប់អនុវត្តបន្តចាប់ឆ្នាំ២០២១ដល់២០២៥ ហើយក៏មានអន្តរក្រសួងចូលផងដែរ។
កត្តាសំខាន់ដែលរដ្ឋាភិបាលគួរគិតគូរ គឺជំរុញឲ្យមានប័ណ្ណចាស់មនុស្ស នីតិវិធីឧបត្ថម្ភគ្រប់មធ្យោបាយ និងការថែទាំសុខភាព ជាពិសេសការបណ្ដុះបណ្ដាលការងារថែទាំមនុស្សចាស់។ លោក វីរ៉ា បានសង្កត់ធ្ងន់ថា៖ «រដ្ឋត្រូវគិតគូរតាក់តែងច្បាប់ និងគោលនយោបាយសម្រាប់មនុស្សចាស់ ដើម្បីឲ្យពួកគាត់រស់នៅរីករាយ ឥតមានការភ័យខ្លាចពេលវ័យចាស់ជរា»។
ទន្ទឹមនឹងនេះ លោកពន្យល់ថា ការជួយគាំពារឲ្យមនុស្សចាស់រស់បានសមរម្យ និងប្រសើរឡើង គឺជាការដឹងគុណ រួមទាំងជាការវិនិយោគរយៈពេលវែង។ ព្រោះក្រុមមនុស្សចាស់ ជាអ្នកបណ្ដុះក្មេងជំនាន់ក្រោយ ហើយក៏បានសាងសមិទ្ធផលកន្លងមកជាច្រើន។
ច្បាប់និងគោលនយោបាយរបស់កម្ពុជា ដែលជួយដល់មនុស្សចាស់
ដើម្បីកាត់បន្ថយភាពក្រីក្រ រដ្ឋាភិបាលបានជួយគាំទ្រដល់មន្រី្តរាជ អតីតយុទ្ធជន ជនពិការ និងនិយោជិត។ កម្ពុជាអនុម័តច្បាប់ស្ដីពី របបសន្តិសុខសង្គមរបស់ក្រុមទាំងនេះ កាលពីឆ្នាំ២០០២ ហើយបង្កើតឲ្យមានសោធននិវត្តន៍ ហានិភ័យការងារ និងធានារ៉ាប់រងសង្គមជាដើម។ បទប្បញ្ញត្តិនេះ ក៏មានវិសាលភាពដល់កម្មករសាធារណៈ និងឯកជនដែរ កាលពីឆ្នាំ២០១៩។ បន្ទាប់កម្ពុជាក៏មានគោលនយោបាយគាំពារសង្គមសម្រាប់ជនក្រីក្រ និងងាយរងគ្រោះ។
ផ្អែកតាមបទប្បញ្ញត្តិទាំងនេះ នាយកប្រតិបត្តិអង្គការមនុស្សចាស់កម្ពុជាថា ច្បាប់និងគោលនយោបាយខាងលើរួមចំណែកតែមួយផ្នែកតូចប៉ុណ្ណោះដល់មនុស្សចាស់។ លោកបញ្ជាក់ថា បច្ចុប្បន្នកម្ពុជានៅខ្វះច្បាប់ឬគោលនយោបាយដែលចែកឲ្យចំ ឬទៅដល់ផ្ទាល់ ដល់ក្រុមមនុស្សចាស់ផ្ទាល់។
របាយការណ៍ជំរឿនប្រជាជនកម្ពុជាឆ្នាំ២០១៩ បានបង្ហាញថា កម្ពុជាមានប្រជាជនសរុបជាង១៥លាននាក់ ក្នុងនោះមាន៨,៩ភាគរយ មានអាយុចាប់ពី៦០ឆ្នាំឡើងទៅ ដែលទិន្នន័យនេះបានកើនឡើង៥,២៥ភាគរយ ក្នុងពេលពីរទសវត្សរ៍កន្លងទៅ។ ជាមួយគ្នាដែរ តួលេខនេះត្រូវបានរំពឹងថា នឹងកើនឡើងដល់២១ភាគរយក្នុងឆ្នាំ២០៥០៕