ការបន្តកិច្ចសហប្រតិបត្តិការខាងលើនេះ ធ្វើឡើងក្នុងកិច្ចប្រជុំត្រីភាគី តាមប្រព័ន្ធអនឡាញ កាលពីថ្ងៃទី៥ ខែមករា ឆ្នាំ២០២២ ក្រោមវត្តមានសម្តេច ស ខេង ឧបនាយករដ្ឋមន្រ្តី-រដ្ឋមន្រ្តីក្រសួងមហាផ្ទៃកម្ពុជា លោក តូ ឡាំ រដ្ឋមន្រ្តីក្រសួងនគរបាលវៀតណាម និង លោក វិឡៃ ឡាខាំផុង រដ្ឋមន្រ្តីក្រសួងសន្តិសុខសាធារណៈឡាវ។ 
 

ក្រសួងមហាផ្ទៃកម្ពុជា បានផ្សព្វផ្សាយលទ្ធផលនៃកិច្ចប្រជុំរវាងរដ្ឋមន្រ្តីប្រទេសទាំង៣ តាមរយៈសេចក្តីប្រកាសព័ត៌មាន។ ក្រៅពីកិច្ចសហប្រតិបត្តិការបង្ក្រាបបទល្មើសតាមព្រំដែន រដ្ឋមន្រ្តីប្រទេសទាំង៣ បន្តលើកកម្ពស់កិច្ចសហប្រតិបត្តិការប្រយុទ្ធប្រឆាំងនឹងជំងឹកូវីដ ជំងឺផ្សេងៗ និង គ្រោះធម្មជាតិ តាមបណ្តាខេត្តជាប់ព្រំដែន។  
 

បន្ថែមពីនេះ រដ្ឋមន្រ្តីប្រទេសទាំង៣ សុទ្ធតែបានសាទរ ចំពោះទំនាក់ទំនងល្អរវាងមេដឹកនាំប្រទេសទាំង៣ ហើយបានកោតសរសើរកងកម្លាំង ដែលនៅតែបន្តរក្សាកិច្ចសហប្រតិបត្តិការ ក្នុងការរក្សាសន្តិសុខ សណ្តាប់ធ្នាប់ និង សុវត្ថិភាពសង្គមបានល្អ ពិសេសតាមព្រំដែន ទោះបីជាមានជំងឺកូវីដ-១៩ក៏ដោយ៕