លោក អ៊ីម៉ាហ្គាវ៉ា យូគិអុ (Yukio Imagawa) អតីតឯកអគ្គរាជទូតជប៉ុនប្រចាំកម្ពុជាដំបូងបំផុតក្រោយរបបខ្មែរក្រហម បានទទួលមរណភាពក្នុងអាយុ៩០ឆ្នាំនៅប្រទេសជប៉ុនកាលពីថ្ងៃទី ៣០ ខែធ្នូ ឆ្នាំ២០២១។ នេះបើតាមការផ្សាយរបស់ស្ថានទូតជប៉ុនប្រចាំកម្ពុជា។
លោក អ៊ីម៉ាហ្គាវ៉ា បានចូលបម្រើការងារនៅក្រសួងការបរទេសជប៉ុនក្នុងឆ្នាំ ១៩៥៦ ហើយត្រូវបានចាត់បញ្ជូនមករាជធានីភ្នំពេញ ប្រទេសកម្ពុជា ក្នុងឋានៈជាសិក្ខាកាមភាសាខ្មែរ នៅឆ្នាំ១៩៥៧។ លោកបានបម្រើការនៅកម្ពុជារហូតដល់ឆ្នាំ១៩៦៥ ពោលគឺអស់រយៈពេល៨ឆ្នាំ។
បន្ទាប់ពីការបើកស្ថានទូតជប៉ុនឡើងវិញ ក្រោយរបបខ្មែរក្រហម លោក អ៊ីម៉ាហ្គាវ៉ា បានធ្វើជាឯកអគ្គរាជទូតពីឆ្នាំ១៩៩១ ដល់ឆ្នាំ១៩៩៦។ «ក្នុងឋានៈជាអ្នកការទូតមួយរូប ដែលមានការយល់ដឹងយ៉ាងជ្រៅជ្រះអំពីប្រវត្តិសាស្ត្រ នយោបាយ សេដ្ឋកិច្ច សង្គម និងវប្បធម៌កម្ពុជា»។ នេះជាការគូសបញ្ជាក់របស់ស្ថានទូត។
លោក អ៊ីម៉ាហ្គាវ៉ា ត្រូវបានចាត់ទុកជាមិត្តដ៏ជិតស្និទ្ធរបស់សម្តេចព្រះវររាជបិតា នរោត្តម សីហនុ ហើយមានចំណេះដឹងភាសាខ្មែរយ៉ាងជ្រៅជ្រះ និងបានសរសេរសៀវភៅ ក៏ដូចជាអត្ថបទជាច្រើនអំពីកម្ពុជា។ ពេលបម្រើការនៅស្ថានទូតក្នុងនាមជាសិក្ខាកាមភាសាខ្មែរ លោក អ៊ីម៉ាហ្គាវ៉ា បានជួបសម្តេចព្រះវររាជបិតា លើកដំបូងនៅឆ្នាំ១៩៥៧។
យោងតាមសម្តីដែលដកស្រង់ក្នុងអត្ថបទមួយរបស់កាសែតភ្នំពេញ ប៉ុស្តិ៍ កាលពីឆ្នាំ១៩៩៥ លោក អ៊ីម៉ាហ្គាវ៉ា បានរំលឹកថា៖ «សម្តេច សីហនុ បានសួរពីបំណងខ្ញុំថាចង់ធ្វើអ្វី។ ខ្ញុំបានតបទៅព្រះអង្គវិញថា ខ្ញុំចង់រៀនភាសាខ្មែរ និងច្បាប់កម្ពុជា។ ព្រះអង្គបានទតមើលខ្ញុំ ហើយនិយាយថា លោកជាទូតជប៉ុនដំបូងដែលសិក្សាពីកិច្ចការនៅក្នុងប្រទេសខ្ញុំ និងព្រះអង្គបានលើកទឹកចិត្តខ្ញុំជារៀងរហូតមក»។
លោក អ៊ីម៉ាហ្គាវ៉ា បានតាំងចិត្តពង្រឹងទំនាក់ទំនងមិត្តភាពកម្ពុជា-ជប៉ុន ដោយសារតែលោកស្រឡាញ់កម្ពុជា ជាពិសេសរាជធានីភ្នំពេញ ដែលលោកមើលឃើញថា មានភាពស្រស់ស្អាត និងសុវត្ថិភាព។
ក្រៅពីបានធ្វើការពិភាក្សា យ៉ាងស្វិតស្វាញជាមួយ ព្រះករុណាព្រះបាទសម្តេច នរោត្តម សីហនុ លោកក៏មានទំនាក់ទំនងយ៉ាងជិតស្និទ្ធជាមួយសម្តេចនាយករដ្ឋមន្ត្រី ហ៊ុន សែន និងភាគីពាក់ព័ន្ធដ៏ទៃទៀត ផងដែរ។ លោកបានធ្វើជាសហប្រធានគណៈកម្មាធិការទី៣ នៃសន្និសិទអន្តរជាតិស្តីពីកម្ពុជានៅទីក្រុងប៉ារីសក្នុងឆ្នាំ១៩៨៩ ដើម្បីសម្រេចបាននូវសន្តិភាពនៅកម្ពុជា។
ក្នុងឋានៈជាឯកអគ្គរាជទូតប្រចាំកម្ពុជា លោក អ៊ីម៉ាហ្គាវ៉ា បានជួយសំរបសំរួលក្នុងការទទួលកងកម្លាំងរក្សាសន្តិភាពជប៉ុនស្ថិតក្រោមអាជ្ញាធរបណ្តោះអាសន្នរបស់អង្គការសហប្រជាជាតិប្រចាំកម្ពុជា (អ៊ុនតាក់) ដែលបន្ទាប់មកមានការបោះឆ្នោតសកលជាលើកដំបូង និងដំណើរការកសាងកម្ពុជាឡើងវិញ។
កាលពីខែតុលា ឆ្នាំ២០១៦ លោក អ៊ីម៉ាហ្គាវ៉ា បានមកជួប និងសម្តែងការគួរសម ក៏ដូចជាពិភាក្សាការងារជាមួយសម្តេចនាយករដ្ឋមន្ត្រី ហ៊ុន សែន ក៏ជាជាមួយរដ្ឋមន្ត្រីការបរទេស លោក ប្រាក់ សុខុន ផងដែរ។ នាខែមេសា ឆ្នាំ២០១៨ លោកស្ថិតចំណោមអតីតឥស្សរជនជប៉ុន ដែលបានជួបពិភាក្សាការងារជាមួយលោក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ៕