លោក នូ ចំរើន អគ្គលេខាធិការសហព័ន្ធខ្មែរកីឡាទោចក្រយាន បានលើកឡើងនៅក្នុងសន្និសីទសារពត៌មាន នៅរសៀលថ្ងៃទី៦ ខែមករា ឆ្នាំ២០២២ នៅទីស្នាក់ការគណៈកម្មាធិការជាតិអូឡាំពិកកម្ពុជាថា ការប្រកួតជើងឯកថ្នាក់ជាតិ មិនត្រឹមតែជម្រុះរក កីឡាករ និងកីឡាការិនីជម្រើសជាតិនោះទេ ប៉ុន្តែវាសម្រួចសមត្ថភាព និងបច្ចេកទេសប្រកួតរបស់កីឡាករ ។ ទន្ទឹមគ្នានេះដែរ មន្ដ្រីបច្ចេកទេសរៀបចំការប្រកួត ក៏មានឱកាសអនុវត្តជាក់ស្ដែង  ដើម្បីត្រៀមខ្លួនរៀបចំការប្រកួតនានា ជាពិសេសស៊ីហ្គេម ដែលកម្ពុជាធ្វើជាម្ចាស់ផ្ទះ ។ 
 

គោលដៅមួយទៀតនោះ គឺសហព័ន្ធ សង្ឃឹមថា តាមរយៈការប្រកួតនេះ កីឡាករ និងកីឡាការិនី ដែលចូលរួមទាំងអស់ នឹងអាចបញ្ចេញសមត្ថភាព របស់ខ្លួនអស់ពីកម្លាំងកាយចិត្ត ជាពិសេសទទួលបានបទពិសោធន៍ពីការប្រកួតនេះ ។
 

អគ្គលេខាធិការរូបនេះ បានបញ្ជាក់ប្រាប់សារពត៌មាន Thmey Thmeyថា៖« ការប្រកួតថ្នាក់ជាតិ គឺជាការប្រកួតកម្រិតខ្ពស់ ។ កីឡាករ និងកីឡាការិនី ដែលជាប់ចំណាត់ថ្នាក់ គឺត្រូវបានប្រមូលផ្តុំចូលក្រុមជម្រើសជាតិ និងប្រកួតតំណាងជាតិ »។
 

គួរបញ្ជាក់ថា ការប្រកួតនេះ ត្រូវបានពន្យាពេលដោយសារបញ្ហាកូវីដ-១៩កន្លងមក។ ក្រោយស្ថានការណ៍ជំងឺកាចសាហាវនេះថមថយ ទើបសហព័ន្ធកំណត់ប្រារព្វការប្រកួត នៅដើមខែមករា ឆ្នាំ២០២២ ក្រោមជំនួយឧបត្ថម្ភរបស់ ក្រសួងអប់រំ យុវជន និងកីឡា ។ ព្រឹត្តិការណ៍ប្រចាំឆ្នាំនេះ មានអ្នកចូលរួម ប្រមាណ២០០ នាក់ ក្នុងនោះមានកីឡាការិនី ២០នាក់ ។