អន្តរជាតិ
×![]()
ដោយ: ធីតា
ភ្ញៀវម្នាក់រងការព្រមានផ្លូវច្បាប់ពីសំណាក់សណ្ឋាគារមួយនៅខេត្ត Nakhon Ratchasima ដោយសារតែគាត់បានវាយតម្លៃទាបទាក់ទងនឹងសេវាកម្មសណ្ឋាគារ ដែលខ្លួនបានទៅស្នាក់នៅកាលពីឆ្នាំមុន។ យោងតាមការផ្សាយរបស់សារព័ត៌មាន Thai BPS World មេធាវីម្នាក់បានទទួលការពឹងពាក់លើករណីនេះ។
លោក Sittra Biabangkerd អគ្គលេខាធិការនៃមូលនិធិមេធាវីសម្រាប់ប្រជាជន បានបញ្ជាក់នៅលើហ្វេសប៊ុករបស់ខ្លួនថា ភ្ញៀវសណ្ឋាគារដែលរងពាក្យបណ្តឹង បានស្នើឲ្យខ្លួនជួយការពារក្តី។
កាលពីថ្ងៃទី១៩ ខែធ្នូ ឆ្នាំ២០២១ ស្ត្រីអតិថិជន បានវាយតម្លៃសណ្ឋាគារត្រឹម៦លើ១០ ចំពោះបទពិសោធន៍ដែលខ្លួនទទួលបានពីសេវាកម្មសណ្ឋាគារនៅស្រុក Khao Yai ខេត្ត Nakhon Ratchasima។ ការវាយតម្លៃគឺធ្វើនៅលើវ៉ិបសាយភ្នាក់ងារទេសចរណ៍មួយ។
ភាគីសណ្ឋាគារខឹងសម្បារយ៉ាងខ្លាំង ចំពោះការផ្តល់តម្លៃទាបដល់ខ្លួន ហើយបានទាមទារឲ្យអតិថិជនលុបសំណេរវាយតម្លៃរបស់ខ្លួនចេញ។ បន្ថែមពីលើនេះ សណ្ឋាគារប្តឹងទាមទារជំងឺចិត្ត៣លានបាត (ជិត៩ម៉ឺនដុល្លារ) និងទាមទារឲ្យសុំទោសជាសាធារណៈតាមរយៈសារព័ត៌មានជាភាសាថៃចំនួន៥ សម្រាប់រយៈពេល៧ថ្ងៃ។ ករណីស្ត្រីរូបនោះ មិនអនុវត្តតាម សណ្ឋាគារព្រមានទាមទារការពិន័យ៥ម៉ឺនបាត (ជិត១៥០០ដុល្លារ) ក្នុង១ថ្ងៃ។
ស្ត្រីជាភ្ញៀវ បានពឹងពាក់មេធាវី ក្រោមគោលការណ៍ស្ម័គ្រ ហើយគាត់មិនជឿថា សំណុំរឿងនេះ អាចឈានដល់ដៃតុលាការនោះឡើយ ព្រោះគាត់គ្រាន់តែបង្ហាញភាពស្មោះត្រង់របស់ខ្លួនលើការវាយតម្លៃសេវាកម្មសណ្ឋាគារតែប៉ុណ្ណោះ។
ក្រៅពីការវាយតម្លៃ ៦លើ១០ ស្ត្រីអតិថិជន បានត្អូញត្អែពីការស្នាក់នៅសណ្ឋាគារ ដែលមានតម្លៃខ្ពស់ជ្រុល មិនស៊ីគ្នានឹងសេវាកម្ម។ ទោះបីជាយ៉ាងណាក៏ដោយ ការវាយតម្លៃនេះ ត្រូវបានលុបចេញ។ មេធាវី បានអះអាងថា កូនក្តីខ្លួនមិនបានលុបនោះឡើយ ដែលទំនងជាខាងសណ្ឋាគារទាក់ទងនឹងទៅកាន់វ៉ិបសាយផ្ទាល់៕
© រក្សាសិទ្ធិដោយ thmeythmey.com
«ប្រទានកម្ម»មានន័យដូចម្តេច?
3 ថ្ងៃ
