ចិន រុស្ស៊ី បារាំង អង់គ្លេស និងអាម៉េរិក ដែលជាមហាអំណាចនុយក្លេអ៊ែរទាំង៥ និងជាសមាជិកអចិន្រ្តៃយ៍នៃក្រុមប្រឹក្សាសន្តិសុខ នៅថ្ងៃទី៣ ខែមករា បានសេចក្តីថ្លែងការណ៍មួយ ជុំវិញការប្រើប្រាស់អាវុធនុយក្លេអ៊ែរ។ ប្រទេសទាំង ៥ បានឯកភាពលើការបញ្ចៀសសង្គ្រាមរវាងប្រទេសមានអាវុធនុយក្លេអ៊ែរ និងការកាត់បន្ថយហានិភ័យនៃការប្រើប្រាស់អាវុធប្រល័យលោក។ 

 

ទាក់ទិននឹងការប្តេជ្ញារបស់មហាអំណាចទាំង៥ រដ្ឋមន្រ្តីការបរទេសអាស៊ាន ក្នុងថ្ងៃទី១៧ ខែកុម្ភៈ ក្នុងសេចក្តីថ្លែងការណ៍រួមលើការរំសាយនុយក្លេអ៊ែរ បានស្វាគមន៍ការប្តេជ្ញារួមរបស់ចិន អាម៉េរិក អង់គ្លេស បារាំង និងរុស្ស៊ី និងរក្សាអាស៊ីអាគ្នេយ៍ ជាតំបន់គ្មានអាវុធនុយក្លេអ៊ែរ។ 

 

«យើងបន្តការប្តេជ្ញារក្សាអាស៊ីអាគ្នេយ៍ ជាតំបន់គ្មានអាវុធនុយក្លេអ៊ែរ និងអាវុធប្រល័យលោកផ្សេងទៀត»។ រដ្ឋមន្រ្តីការបរទេសអាស៊ាន បានសង្កត់ធ្ងន់បែបនេះ នៅក្នុងសេចក្តីថ្លែងការណ៍រួមចេញថ្ងៃទី១៧ ខែកុម្ភៈ ដោយបន្តថា ការបញ្ជាក់នោះ គឺមានចែងក្នុងសន្ធិសញ្ញាអាស៊ីអាគ្នេយ៍គ្មានអាវុធនុយក្លេអ៊ែរ (SEANWFZ) និងធម្មនុញ្ញអាស៊ាន។ 

 

ទន្ទឹមនេះ រដ្ឋមន្រ្តីការបរទេសអាស៊ាន ក៏បានបង្ហាញពីក្តីបារម្ភជុំវិញ ការគំរាមកំហែងលើមនុស្សជាតិ ដែលបង្កដោយអាវុធនុយក្លេអ៊ែរ និងការធ្វើទំនើបកម្មលើអាវុធមួយនេះដែរ។ បើតាមប្រមុខការទូតអាស៊ាន ការលុបបំបាត់អាវុធនុយក្លេអ៊ែរ ជាចំណាត់ការតែមួយគត់ក្នុងការធានាថា នុយក្លេអ៊ែរ នឹងមិនត្រូវបានប្រើប្រាស់។ 

 

ក្នុងសេចក្តីថ្លែងការណ៍ដដែល រដ្ឋមន្រ្តីការបរទេស បានអំពាវនាវឱ្យមហាអំណាចនុយក្លេអ៊ែរទាំង៥ បំពេញកាតព្វកិច្ចរបស់ខ្លួន ដែលមានចែងក្នុងសន្ធិសញ្ញាមិនរីកសាយអាវុធនុយក្លេអ៊ែរ និងទទួលស្គាល់ការលុបបំបាត់អាវុធនុយក្លេអ៊ែរទាំងស្រុង។ 

 

នៅចំណុចបញ្ចប់នៃសេចក្តីថ្លែងការណ៍ រដ្ឋមន្រ្តីការបរទេសអាស៊ាន បានបញ្ជាក់ពីការប្តេជ្ញាបន្តរក្សាទំនាក់ទំនងជាមួយមហាអំណាចនុយក្លេអ៊ែរទាំង៥ និងបង្កើនកិច្ចខិតខំក្នុងការដោះស្រាយបញ្ហាទាំងអស់ ដោយផ្អែកតាមសន្ធិសញ្ញាអាស៊ីអាគ្នេយ៍គ្មានអាវុធនុយក្លេអ៊ែរ៕