អភិបាលរងខេត្តរូបនេះ បានប្រាប់សារព័ត៌មានថ្មីៗបន្ថែមថា មន្ទីរពេទ្យមិត្តភាពកម្ពុជា-ចិនត្បូងឃ្មុំនេះ ត្រូវបានបំពាក់ដោយបរិក្ខារទំនើបៗ រួមនឹងអគារព្យាបាលសំខាន់ៗដូចជា អគារវះកាត់ អគារព្យាបាលជំងឺទូទៅ អគារព្យាបាលជំងឺកុមារ និងអគារជំងឺឆ្លងជាដើម។ លោកបន្តថា មន្ទីរពេទ្យនេះ មានកម្ពស់២៤ម៉ែត្រ ចែកជា៥ជាន់ និងមានគ្រែសរុបចំនួន៣០០គ្រែផងដែរ។ បើតាមការចេញផ្សាយរបស់ក្រសួងមហាផ្ទៃ មន្ទីរពេទ្យនេះ មានទំហំ ៥៥ ៨១៤ម៉ែត្រការ៉េ និងក្រឡាផ្ទៃអគារទំហំ ២៤ ៣០០ម៉ែត្រការ៉េ ។ 
 

មន្ទីរពេទ្យមួយនេះ នឹងជាមន្ទីរពេទ្យប្រចាំតំបន់ភូមិភាគផងដែរ។ នេះជាការលើកឡើងរបស់ លោក កេង ប៊ុនណា ដោយពន្យល់បន្ថែមដូច្នេះ៖ «ជាគោលដៅអនាគតនេះ មន្ទីរពេទ្យមិត្តភាពកម្ពុជា-ចិនត្បូងឃ្មុំយើងនេះ នឹងប្រែក្លាយជាមន្ទីរពេទ្យភូមិភាគហើយ គឺជាមន្ទីរតំបន់ សម្រាប់តំបន់ក្បែរៗ អាចជាក្រចេះ ស្វាយរៀង ស្ទឹងត្រែង មណ្ឌលគិរី គឺខេត្តជាប់ៗហ្នឹង»។ 
 

បើតាមអភិបាលរងរូបនេះ ក្រៅពីបើកសម្ពោធមន្ទីរពេទ្យហើយ ក៏នឹងមានដាក់ដំណើរការសាលាបឋមសិក្សា-វិទ្យាល័យតេជោសែនត្បូងឃ្មុំជាមួយគ្នាផងដែរ ក្រោមអធិបតីភាពនាយករដ្ឋមន្ត្រីកម្ពុជា។ យោងតាមក្រសួងមហាផ្ទៃសាលារៀននេះ មានអគារសិក្សាចំនួន២ខ្នង កម្ពស់៣ជាន់ មាន៣៦បន្ទប់, អាគារស្នាក់នៅគ្រូ២ខ្នង ស្មើនឹង៤០បន្ទប់ មានសិស្សសិក្សា ៥៥៧នាក់ និងគ្រូបង្រៀនសរុប ១៨នាក់៕