ជាតិ
កុមារម្នាក់ និងគោ១ក្បាលបាត់បង់ជីវិត ដោយសារផ្ទុះមីនតោននៅស្រុកគាស់ក្រឡ សពកុមារដែលស្លាប់ដោយសារផ្ទុះមីនតោន។ រូបភាពពីហ្វេសប៊ុកលោក ហេង រតនា
× ភ្នំពេញ៖ កុមារម្នាក់បានស្លាប់ និងគោ១ក្បាលបានងាប់ ដោយសារផ្ទុះមីនតោន នៅក្បែរវត្តស្លាក ស្ថិតក្នុងឃុំឆ្នាស់មាន់ ស្រុកគាស់ក្រឡ ខេត្តបាត់ដំបង។ នេះបើតាមហ្វេសប៊ុកលោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC)។
កាលពីល្ងាចថ្ងៃទី៨ មីនា មានករណីគោមួយក្បាលដើរជាន់គ្រាប់មីនតោន បានបណ្ដាលឱ្យកុមារម្នាក់ស្លាប់ និងគោមួយក្បាលងាប់។ ករណីផ្ទុះមីនតោននេះ កើតឡើងនៅក្បែរវត្តស្លាក ក្នុងឃុំឆ្នាស់មាន់ ស្រុកគាស់ក្រឡ ខេត្តបាត់ដំបង។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) បានចូលរួមមរណទុក្ខជាមួយគ្រួសារសព ដែលបាត់បង់សមាជិកដោយសារគ្រាប់មីង។ លោក ហេង រតនា សរសេរលើហ្វេសប៊ុកយ៉ាងដូច្នេះ៖ «នេះជាមរតកនៃសង្គ្រាម ដែលប្រជាពលរដ្ឋកម្ពុជាកំពុងឆ្លងកាត់ជាមួយសំណល់គ្រាប់មីននិងយុទ្ធភណ្ឌសង្គ្រាមជាច្រើនទៀត ដែលស្ថិតនៅក្នុងទឹកដីសុវណ្ណភូមិ និងបន្តគំរាមកំហែងដល់សេចក្តីសុខសុវត្ថិភាពប្រជាជនកម្ពុជាឥតស្រាកស្រាន្តឡើយ ទោះបីសង្គ្រាមត្រូវបានបញ្ចប់ជាង២០ឆ្នាំមកហើយក៏ដោយចុះ»។
សូមបញ្ជាក់ថា កម្ពុជាត្រូវបោសសម្អាតផ្ទៃដីដែលមានមីន និងសំណល់ជាតិផ្ទុះពីសង្គ្រាម រួមទាំងគ្រាប់បែកចង្កោម ជាង២ ០០០គីឡូម៉ែត្រការ៉េទៀត ដើម្បីសម្រេចបាននូវចក្ខុវិស័យ តាមផែនការយុទ្ធសាស្ត្រជាតិ «កម្ពុជាមួយគ្មានមីនឆ្នាំ២០២៥»។ ក្នុងចំណោមផ្ទៃដីទាំងនោះ ផ្ទៃដីមានមីន ដែលត្រូវបោសសម្អាតមានចំនួន ៧៩៤គីឡូម៉ែត្រការ៉េ និងសំណល់ជាតិផ្ទុះពីសង្គ្រាម រួមទាំងគ្រាប់បែកចង្កោមចំនួន ១ ២៤០គីឡូម៉ែត្រការ៉េ៕
© រក្សាសិទ្ធិដោយ thmeythmey.com