អាម៉េរិក រុស្ស៊ី បារាំង ចិន និងអាល្លឺម៉ង់ ជាប្រទេសចំនួន៥ ដែលនាំចេញអាវុធច្រើនជាងគេបំផុត នៅចន្លោះឆ្នាំ ២០១២-២០១៦ និង ២០១៧-២០២១។ ក្នុងចំណោមប្រទេសធំៗទាំង៥ នេះ ការនាំចេញអាវុធអាម៉េរិក និងបារាំង បានកើនឡើងជាលំដាប់ ខណៈរុស្ស៊ី ចិន និងអាល្លឺម៉ង បានធ្លាក់ចុះ។ ចំណែកអង់គ្លេស ក៏ធ្លាក់ចុះដែរ។ 

 

ការនាំចេញអាវុធអាម៉េរិក បើធៀបនឹងឆ្នាំ២០១២-២០១៦ ជាមួយឆ្នាំ២០១៧-២០២១ បានកើនឡើងចំនួន១៤ភាគរយ។ ទំហំនាំចេញអាវុធសរុបរបស់អាម៉េរិកក្នុងទីផ្សារអាវុធសកល បានកើនពី៣២ភាគរយ (ឆ្នាំ២០១២-២០១៦) ទៅ៣៩ភាគរយ (ឆ្នាំ២០១៧-២០២១)។ 

 

នៅចន្លោះឆ្នាំ ២០១៧ ដល់ ២០២១ អាម៉េរិក បាននាំចេញអាវុធច្រើនជាងរុស្ស៊ី លើសពីពីរដង។ តំបន់មជ្ឈិមបូព៌ា ជាទីផ្សារដ៏ធំមួយរបស់អាម៉េរិកក្នុងការនាំចេញអាវុធ និងមានទំហំប្រមាណ៤៣ភាគរយនៃការនាំចេញអាវុធសរុបរបស់អាម៉េរិក។ ការនាំចេញអាវុធរបស់អាម៉េរិកទៅអារ៉ាប៊ីសាអូឌីត បានកើនឡើងចំនួន១០៦ភាគរយ។

 

រុស្ស៊ី ជាប្រទេសនាំចេញអាវុធច្រើនជាងគេទីពីរ មានទំហំ ១៩ភាគរយ នៃការនាំចេញអាវុធសរុបរបស់ពិភពលោក នៅចន្លោះឆ្នាំ២០១៧ ដល់២០២១។ យ៉ាងណាមិញ បើធៀបឆ្នាំ២០១២-២០១៦ ជាមួយឆ្នាំ ២០១៧-២០២១ ការនាំចេញអាវុធរុស្ស៊ីបានធ្លាក់ចុះប្រមាណ ២៦ភាគរយ។ ហេតុផលនៃការធ្លាក់ចុះនេះ គឺដោយសារការបញ្ជាទិញអាវុធរបស់ឥណ្ឌា និងវៀតណាមថយចុះ។ ប៉ុន្តែនៅប៉ុន្មានឆ្នាំខាងមុខ រុស្ស៊ីនឹងដឹកជញ្ជូនអាវុធឱ្យឥណ្ឌាដ៏ច្រើន។ 

 

ចំណែកបារាំងវិញ មានទំហំនៃការនាំចេញអាវុធសរុបនៅក្នុងទីផ្សារសកលចំនួន ១១ភាគរយ ក្នុងចន្លោះឆ្នាំ២០១៧ ដល់ ២០២១។ បើធៀបនឹងឆ្នាំ២០១២-២០១៦ ជាមួយ ២០១៧-២០២១ ការនាំចេញរបស់បារាំងបានកើនឡើងចំនួន ៥៩ភាគរយ។ 

 

បើធៀបនឹងឆ្នាំ ២០១២-២០១៦ ជាមួយឆ្នាំ ២០១៧-២០២១ ចិន ដែលជាប្រទេសនាំចេញអាវុធទី៤ បានថយចុះ ក្នុងការនាំចេញអាវុធចំនួន ៣១ភាគរយ ខណៈអាល្លឺម៉ង់ ប្រទេសនាំចេញអាវុធលំដាប់ទី៥ ធ្លាក់ចុះ ១៩ភាគរយ។ ដោយឡែកអង់គ្លេសវិញ បានធ្លាក់ចុះ ៤១ភាគរយ នៅចន្លោះឆ្នាំដូចគ្នានេះ។ អង់គ្លេសមានទំហំនាំចេញ ២,៩ភាគរយ នៅក្នុងទីផ្សារលក់អាវុធសកល។ ទន្ទឹមនេះ អ៊ីតាលី មានទំហំនាំចេញអាវុធចំនួន ៣,១ភាគរយ នៅក្នុងឆ្នាំ២០១៧-២០២១៕