ចាប់តាំងពីអង្គការសហប្រជាជាតិបង្កើតនៅឆ្នាំ ១៩៤៥ មកទល់ពេលនេះ ក្រុមប្រឹក្សាសន្តិសុខនៅតែមានសមាជិក ១៥ប្រទេសដដែល ដោយ ៥ប្រទេស ជាសមាជិកអចិន្រ្តៃយ៍ និង១០ប្រទេស ជាសមាជិកមិនអចិន្រ្តៃយ៍។ កន្លងមក សមាជិកអចិន្រ្តៃយ៍ទាំង ៥ប្រទេស​ តែងប្រើសិទ្ធិវេតូ ដើម្បីការពារផលប្រយោជន៍ផ្ទាល់ខ្លួន និងធ្វើឱ្យបញ្ហាមួយចំនួន ត្រូវជាប់គាំង។ 

 

ពាក់ព័ន្ធនឹងបញ្ហាខាងលើ បារាំង កន្លងមក បានស្នើឱ្យកាត់បន្ថយសិទ្ធិអំណាចវេតូ របស់សមាជិកអចិន្រ្តៃយ៍ទាំង ៥ប្រទេស ក្នុងករណីមានហិង្សាទ្រង់ទ្រាយធំ។ មិនតែប៉ុណ្ណោះ ឥណ្ឌា និងជប៉ុនជាដើម ក៏ចង់ឱ្យមានការធ្វើកំណែទម្រង់សមាជិក ដើម្បីឱ្យខ្លួនក្លាយជាសមាជិកអចិន្រ្តៃយ៍នៃក្រុមប្រឹក្សាសន្តិសុខផងដែរ។ 

 

ក្នុងដំណើរទស្សនកិច្ចមកកម្ពុជា នៅថ្ងៃទី២០ ខែមីនា ប្រមុខរដ្ឋាភិបាលជប៉ុន និងកម្ពុជា បានជជែកពីបញ្ហាធ្វើកំណែទម្រង់ក្រុមប្រឹក្សាសន្តិសុខ ដែលមិនអាចដោះស្រាយបញ្ហា ឬជម្លោះធំៗបាន។ ជុំវិញបញ្ហាអ៊ុយក្រែន នៅចុងខែកុម្ភៈ រុស្ស៊ីបានប្រើសិទ្ធិវេតូលើសេចក្តីសម្រេចមួយ ដែលទាមទារឱ្យក្រុងមូស្គូផ្អាកសកម្មភាពយោធា។

 

«ស្ថានការណ៍នៅអ៊ុយក្រែនបានបង្ហាញថា ការសម្រេចបាននូវកំណែទម្រង់ក្រុមប្រឹក្សាសន្តិសុខឱ្យបានឆាប់រហ័ស ជាកិច្ចការចាំបាច់ ដើម្បីដោះស្រាយបញ្ហាធ្ងន់ធ្ងរ»។ សម្តេច ហ៊ុន សែន នាយករដ្ឋមន្រ្តីកម្ពុជា និងសមភាគីជប៉ុន លោក គីស៊ីដា ហ្វូមីអូ បានបញ្ជាក់បែបនេះ នៅក្នុងសេចក្តីថ្លែងការណ៍រួម ដោយបន្តថា ថ្នាក់ដឹកនាំទាំងពីរ នឹងបន្តកិច្ចសហប្រតិបត្តិការ ដើម្បីសម្រេចកំណែទម្រង់មួយនេះ។ 

 

ទន្ទឹមនេះ នាយករដ្ឋមន្រ្តីជប៉ុន ក៏បានថ្លែងអំណរគុណកម្ពុជា ចំពោះការគាំទ្រមិនផ្លាស់ប្តូរលើកំណែទម្រង់ក្រុមប្រឹក្សាសន្តិសុខ រួមទាំងគាំទ្រជប៉ុនឱ្យក្លាយជាសមាជិកអចិន្រ្តៃយ៍ថែមទៀត។ 

 

ក្នុងសន្និសីទសារព័ត៌មាន នៅយប់ថ្ងៃទី២០ ខែមីនា អ្នកនាំពាក្យក្រសួងការបរទេសជប៉ុន លោកស្រី Ono Hikariko បានលើកឡើងថា វាគ្មានការផ្លាស់ប្តូរអ្វីឡើយនៅក្នុងរចនាសម្ព័ន្ធក្រុមប្រឹក្សាសន្តិសុខក្នុងពេលបច្ចុប្បន្ន។ បើតាមអ្នកនាំពាក្យរូបនេះ ពិភពលោក គួរតែធ្វើឱ្យក្រុមប្រឹក្សាសន្តិសុខខ្លាំងជាងមុន ដើម្បីដោះស្រាយបញ្ហាសហគមន៍អន្តរជាតិ។ 

 

គួររម្លឹកថា នាយករដ្ឋមន្រ្តីជប៉ុន នៅថ្ងៃទី១៤ ខែមីនាកន្លងទៅ បានថ្លែងប្រាប់សភាជប៉ុនថា ការឈ្លានពានរបស់រុស្ស៊ីលើអ៊ុយក្រែន បានបង្ហាញពីតម្រូវការសណ្តាប់ធ្នាប់អន្តរជាតិថ្មីមួយ។ បើតាមលោក គីស៊ីដា ជប៉ុន នឹងបន្តកិច្ចសហការជាមួយបណ្តាប្រទេសមួយចំនួន ដូចជាបារាំង ដើម្បីធ្វើកំណែទម្រង់ក្រុមប្រឹក្សាសន្តិសុខ៕