ភ្នំពេញ៖ បន្ទាប់ពីអនុវត្តកម្មវិធី ASPIRE អស់រយៈពេលជាង ៦ឆ្នាំកន្លងមក លោក វេង សាខុន ជឿជាក់ថារាជរដ្ឋាភិបាលកម្ពុជា និងអង្គការ IFAD នឹងបន្តគាំទ្រកម្មវិធីនេះបន្តទៀត។ រដ្ឋមន្រ្តីកសិកម្ម លើកឡើងបែបនេះ ក្រោយការអនុវត្តកម្មវិធី ASPIRE ទទួលបានផលវិជ្ជមាន ដែលចូលរួមចំណែកយ៉ាងសកម្ម ក្នុងការកាត់បន្ថយភាពក្រីក្រ តាមរយៈការបង្កើនភាពធន់ទ្រាំនឹងការប្រែប្រួលអាកាសធាតុដល់គ្រួសារកសិករក្រីក្រ និងជនងាយរងគ្រោះ។
កម្មវិធីផ្សព្វផ្សាយបច្ចេកទេសកសិកម្មថ្មីដែលធន់នឹងការប្រែប្រួលអាកាសធាតុ (ASPIRE) ជាកម្មវិធីរបស់រាជរដ្ឋាភិបាលកម្ពុជា ដោយទទួលបានការគាំទ្រហិរញ្ញប្បទានពីមូលនិធិអន្តរជាតិសម្រាប់ការអភិវឌ្ឍកសិកម្ម (IFAD)។ កម្មវិធីនេះ មានរយៈពេល ៧ឆ្នាំ ដែលអនុវត្តដោយក្រសួងកសិកម្ម រុក្ខាប្រមាញ់ និងនេសាទ។
បើតាមហ្វេសប៊ុកផេកលោក វេង សាខុន រដ្ឋមន្រ្តីកសិកម្ម គោលដៅសំខាន់របស់ ASPIRE គឺកាត់បន្ថយភាពក្រីក្រ និងបង្កើនភាពធន់ទ្រាំនឹងការប្រែប្រួលអាកាសធាតុដល់គ្រួសារកសិករក្រីក្រ និងជនងាយរងគ្រោះចំនួន ១៤៤ ០០០គ្រួសារ។ តាមរយៈការអនុវត្តកម្មវិធីអស់រយៈពេលជាង ៦ឆ្នាំមកនេះ ASPIRE បានគាំទ្រគ្រួសារកសិករបានចំនួន ១៤៨ ២៣០ ស្មើនឹង ១០៣ភាគរយនៃគ្រួសារគោលដៅ។
រូបភាពពីហ្វេសប៊ុកលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ
ជាមួយគ្នានេះ ASPIRE បានបង្កើនតម្លៃទ្រព្យសម្បត្តិគ្រួសារកសិករគោលដៅពី ១,៤៥៣ដុល្លារ នៅឆ្នាំ២០១៨ ដល់ ២,០៥៥ដុល្លារ នៅឆ្នាំ២០២១ ពោលគឺកើនបាន ៤១ភាគរយ។ ក្រៅពីផលវិជ្ជមានខាងលើ ASPIRE ក៏បានបង្កើនតម្លៃផលិតកម្មកសិកម្មរបស់គ្រួសារកសិករគោលដៅពី ១,២០៦ដុល្លារ នៅឆ្នាំ២០១៨ ដល់ ១,៤៤៨ដុល្លារ នៅឆ្នាំ២០២១ ដោយកើនឡើង ១៨ភាគរយ។
របាយការណ៍ដែលផ្សព្វផ្សាយដោយ លោក វេង សាខុន បង្ហាញថា កម្មវិធី ASPIRE បានចងក្រងបណ្តុំអាជីវកម្មបានចំនួន ២ ៥៨៤បណ្តុំ និងសាងសង់ផ្ទះសំណាញ់បានចំនួន ៤១៦ សម្រាប់ដំណាំបន្លែសុវត្ថិភាព។ លើសពីនេះ បានសាង់សង់អគារប្រមូលផ្តុំ និងទុកដាក់កសិផលចំនួន ១៦៦អគារ និងបានគាំទ្រការសិក្សា និងរៀបចំឯកសារគោលនយោបាយជាច្រើនពាក់ព័ន្ធនឹងការអភិវឌ្ឍវិស័យកសិកម្ម។
ជុំវិញលទ្ធផលល្អខាងលើ លោក វេង សាខុន សរសេរលើហ្វេសប៊ុកផេកដូច្នេះ៖ «ពិតណាស់លទ្ធផលនៃកម្មវិធី បាន និងកំពុងចូលរួមចំណែកយ៉ាងសកម្មក្នុងការកាត់បន្ថយភាពក្រីក្រ តាមរយៈការបង្កើនភាពធន់ទ្រាំនឹងការប្រែប្រួលអាកាសធាតុដល់គ្រួសារកសិករក្រីក្រ និងជនងាយរងគ្រោះដែលបានប្រកាន់យករបរកសិកម្មជាការងារស្នូលប្រចាំគ្រួសារ ហើយក្រសួងសង្ឃឹម និងជឿជាក់ថារាជរដ្ឋាភិបាលកម្ពុជា និងអង្គការ IFAD នឹងបន្តគាំទ្រកម្មវិធីនេះ»។
ទន្ទឹមនឹងនេះ ក្រសួងកសិកម្ម រុក្ខាប្រមាញ់ និងនេសាទ ក៏បានសាទរ និងអរគុណរដ្ឋាភិបាលកម្ពុជា តាមរយៈក្រសួងសេដ្ឋកិច្ច និងហិរញ្ញវត្ថុ ដែលសហការជាមួយមូលនិធិអន្តរជាតិសម្រាប់ការអភិវឌ្ឍកសិកម្ម (IFAD) ដោយបានគាំទ្រហិរញ្ញប្បទានសម្រាប់អនុវត្តកម្មវិធី៕
រូបភាពពីហ្វេសប៊ុកលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ