សៀមរាប៖ សម្ដេចនាយករដ្ឋមន្រ្តី ហ៊ុន សែន បានថ្លែងកោតសរសើរ និងអរគុណប្រទេសបារាំង និងជប៉ុន សម្រាប់ការបន្តអាណត្តិរបស់ខ្លួនរយៈពេល១០ឆ្នាំទៀត ក្នុងនាមជាសហប្រធាននៃគណៈកម្មាធិការអន្តរជាតិសម្របសម្រួល កិច្ចគាំពារ និងអភិរក្សតំបន់រមណីយដ្ឋានប្រវត្តិសាស្រ្ដអង្គរ ហៅកាត់ថា អាយស៊ីស៊ី-អង្គរ (ICC-Angkor)។
«យើងគួរតែអរគុណជាមួយនឹង ICC-Angkor ដែលបានចូលរួមនៅក្នុងការអភិរក្សតំបន់ក្នុងក្រុងសៀមរាប ក៏ដូចជាអភិរក្សជាមួយនឹងបេតិកភណ្ឌប្រវត្តិសាស្រ្ដរបស់យើង គឺអង្គរវត្ត។ យើងពិតជាអរគុណចំពោះបារាំង ជប៉ុន ដែលជាសហប្រធាននៃ អាយស៊ីស៊ី រួមជាមួយអង្គការយូណេស្គូ ដែលអាចហៅថា នៅទីនេះជានិច្ចកាល យើងប្រើយន្តការត្រីភាគី គឺកម្ពុជាជាម្ចាស់ផ្ទះ បូកជាមួយសហប្រធានទាំងពីរ គឺបារាំង និងជប៉ុន ដែលបានចូលរួម ប៉ុន្តែយើងក៏មានដៃគូសំខាន់មួយទៀត គឺយូណេស្គូ គឺយើងមានយន្តការសហប្រតិបត្តិការត្រីភាគី និងសហប្រតិបត្តិការចតុភាគី»។ នេះជាប្រសាសន៍របស់សម្ដេច ហ៊ុន សែន ក្នុងពិធីសម្ពោធដាក់ឱ្យប្រើប្រាស់ជាផ្លូវការ ផ្លូវ៣៨ខ្សែ ក្នុងក្រុងសៀមរាប នាព្រឹកថ្ងៃទី៤ មេសា។
បន្ថែមពីនេះ ប្រមុខរាជរដ្ឋាភិបាល ក៏បានអរគុណចំពោះប្រទេសសហប្រធានទាំងពីរ ដែលសម្រេចបន្តអាណត្តិរយៈពេល១០ឆ្នាំទៅមុខទៀត ក្នុងនាមជាសហប្រធាន ដើម្បីចូលរួមអភិរក្ស និងអភិវឌ្ឍន៍រមណីយដ្ឋានអង្គរ។ សម្ដេច ហ៊ុន សែន លើកឡើងថា កម្រមានគណៈកម្មាធិការណា ដែលមានអាយុច្រើនឆ្នាំ យ៉ាងដូច្នេះណាស់ ក្នុងការចូលរួមអភិរក្សប្រាង្គប្រាសាទខ្មែរ។ សម្ដេច ហ៊ុន សែន៖ « ខ្ញុំសូមអរគុណពីចម្ងាយ ជូនចំពោះដៃគូរបស់យើង គឺបារាំង និងជប៉ុន និងអង្គការយូណេស្គូ ហើយសង្ឃឹមថា នឹងចូលរួមសហប្រតិបត្តិការក្នុងតំបន់នេះ ហើយអាយស៊ីស៊ី-អង្គរ ក៏ទទួលបន្ទុកក្នុងការចូលរួមអភិរក្ស និងតាមដានពិនិត្យទៅលើការអភិវឌ្ឍន៍រមណីយដ្ឋានសម្បូរព្រៃគុកផងដែរ»។
នៅក្នុងកិច្ចប្រជុំពេញអង្គលើកទី២៨ របស់គណៈកម្មាធិការ អាយស៊ីស៊ី-អង្គរ នៅថ្ងៃទី២៥ មីនា កន្លងទៅ នាសណ្ឋាគារ សូហ្វីតែល អង្គរភូគីត្រា បារាំង និងជប៉ុន បានប្រកាសពីការបន្តអាណត្តិរបស់ខ្លួនរយៈពេល១០ឆ្នាំទៀត (អាណត្តិទី៤) ក្នុងនាមជាសហប្រធាន ដើម្បីគាំទ្រលើការងារអភិរក្សរមណីយដ្ឋានអង្គរបន្តទៀត។ ការសម្រេចនេះ មានការសាទរពីភាគីពាក់ព័ន្ធ ដោយបញ្ជាក់ថា គណៈកម្មាធិការនេះនឹងបន្តអាយុរហូត៤០ឆ្នាំ នៅឆ្នាំ២០៣៣ ក្រោយត្រូវបានបង្កើតពីខែធ្នូ ឆ្នាំ ១៩៩៣។ គណៈកម្មាធិការនេះ បង្កើតឡើងមួយឆ្នាំ ក្រោយរមណីយដ្ឋានអង្គរ ត្រូវបានចុះបញ្ជីក្នុងសម្បត្តិបេតិកភណ្ឌរបស់អង្គការយូណេស្គូ នៅខែធ្នូ ឆ្នាំ ១៩៩២។
សហប្រធាន បារាំង និងជប៉ុន ក្នុងកិច្ចប្រជុំអាយស៊ីស៊ី-អង្គរ ថ្ងៃទី២៥ មីនា ឆ្នាំ២០២២។ រូបភាព៖ អាជ្ញាធរជាតិអប្សរា
សម្រាប់អាណត្តិថ្មីនេះ សហប្រធានអាយស៊ីស៊ី-អង្គរ ប្រកាសថា នឹងផ្តោតលើការងារបេតិកភណ្ឌ និងសហគមន៍ ដើម្បីផ្សារភ្ជាប់ទំនាក់ទំនងរវាងបេតិកភណ្ឌ និងសហគមន៍ ដើម្បីជួយឱ្យកិច្ចការអភិរក្ស និងអភិវឌ្ឍន៍រមណីយដ្ឋានអង្គរកាន់តែល្អប្រសើរ។
ក្នុងសន្និសីទសារព័ត៌មានក្រោយចប់កិច្ចប្រជុំនៅពេលនោះ រដ្ឋមន្រ្តីក្រសួងវប្បធម៌ និងវិចិត្រ សិល្បៈ លោកស្រី ភឿង សកុណា បានរីករាយចំពោះការបន្តអាណត្តិទី៤របស់ បារាំង និងជប៉ុន។ លោកស្រីថា វាជាមោទកភាពមួយ ហើយមោទកភាពនេះបានដោយសារការបំពេញភារកិច្ចដោយភាពច្បាស់លាស់ មត់ចត់ និងភាពជឿជាក់ពីគ្នាទៅវិញទៅមក ទាំងអ្នកជំនាញការជាតិ និងអន្ដរជាតិ ទើបមានការគាំទ្រពីសហប្រធាន រួមនិងអង្គការយូណេស្គូ។ មួយទៀត ដោយសារកម្ពុជាមានសុខសន្ដិភាព និងភាពជោគជ័យនៃនយោបាយចាក់វ៉ាក់សាំងរបស់រាជរដ្ឋាភិបាល។
ក្នុងពិធីសម្ពោធហេដ្ឋារចនាសម្ព័ន្ធផ្លូវ ៣៨ខ្សែ នោះដែរ សម្ដេចនាយករដ្ឋមន្រ្តី បានសុំឱ្យប្រជាពលរដ្ឋក្នុងខេត្តសៀមរាប បន្តគោរពគោលការណ៍ការពារបេតិកភណ្ឌតំបន់ប្រវត្តិសាស្រ្ដអង្គរ ដើម្បីឱ្យរមណីយដ្ឋាអង្គរ មានតម្លៃជានិរន្ត។ សម្ដេច ហ៊ុន សែន លើកឡើងថា៖« ត្រង់នេះហើយដែលខ្ញុំគួរតែនិយាយ ទៅកាន់ប្រជាពលរដ្ឋយើង ដែលរស់នៅក្នុងខេត្តសៀមរាប ឱ្យបន្តរក្សានូវរបៀបរៀបរយ គោរពទៅតាមគោលការណ៍ដែលការពារបាន នូវបេតិកភណ្ឌប្រវត្តិសាស្រ្ដ។ ទឹកដីសៀមរាប ពិតជាមានប្រាង្គប្រាសាទច្រើនពេកហើយ ដែលយើងត្រូវគោរព»។
សម្ដេច បាននិយាយដល់ទីតាំងសាងសង់ព្រលានយន្តហោះអន្តរជាតិថ្មី នៅស្រុកសូទ្រនិគម ដែលសម្ដេច បានទៅត្រួតពិនិត្យនៅថ្ងៃទី៣ ខែមេសា ដោយបញ្ជាក់ថា ទម្រាំរកដីសាងសង់បាន គឺប្រើពេលយូរ ដោយធ្វើយ៉ាងណា ជៀសឱ្យឆ្ងាយពីតំបន់បេតិកភណ្ឌ៕