អន្តរជាតិ
រុស្ស៊ីគំរាមថា ប្រទេសដែលបោះឆ្នោតព្យួររុស្ស៊ីពីក្រុមប្រឹក្សាសិទ្ធិមនុស្ស UN នឹងជួបបញ្ហា កិច្ចប្រជុំមហាសន្និបាតអង្គការសហប្រជាជាតិ។ រូបថត Xinhua
× តំណាងរុស្ស៊ីប្រចាំអង្គការសហប្រជាជាតិ (UN) បានព្រមានរដ្ឋសមាជិក UN ទាំងអស់ ពីផលវិបាកក្នុងទំនាក់ទំនងទ្វេភាគី ប្រសិនបើពួកគេនឹងបោះឆ្នោតយល់ព្រម ឬបោះឆ្នោតអនុបវាទលើសំណើរបស់អាម៉េរិក ដែលស្នើឱ្យព្យួរសមាជិកភាពរបស់រុស្ស៊ី ពីក្រុមប្រឹក្សាសិទ្ធិមនុស្ស។ នេះបើតាមការផ្សាយរបស់ ទីភ្នាក់ងារព័ត៌មាន Reuters នៅថ្ងៃនៅថ្ងៃទី៦ ខែមេសា ដោយយោងលិខិតមួយ របស់តំណាងរុស្ស៊ីនៅ UN ។
អាម៉េរិក បានដឹកមុខកិច្ចប្រឹងប្រែង ដើម្បីដកសមាជិកភាពរុស្ស៊ីនៅក្រុមប្រឹក្សាសិទ្ធិមនុស្សអង្គការសហប្រជាជាតិ ដោយយោងលើអ្វីដែលកើតឡើង នៅទីក្រុង Bucha ទីដែលសាកសាពមនុស្សជាង៣០០នាក់ ត្រូវបានរកឃើញរណូករណែលតាមផ្លូវ ក្រោយការចាកចេញរបស់យោធារុស្ស៊ី។ អាម៉េរិក ក៏បញ្ជាក់ព័ស្តុតាងដ៏រឹងមាំ ដែលបង្ហាញពីឧក្រិដ្ឋកម្មសង្រ្គាមនៅទីនោះ។ យ៉ាងណាមិញ រុស្ស៊ីនៅតែបដិសេធការចោទប្រកាន់នេះដាច់ខាត ហើយទម្លាក់កំហុសលើអ៊ុយក្រែន ជាអ្នកប្រឌិតរឿង។
មុនការបោះឆ្នោតនេះ រុស្ស៊ីក៏ចេញសារព្រមាន ប្រទេសដែលត្រូវបោះឆ្នោត។ ក្នុងឯកសារមួយ ដែលផ្សាយដោយទីភ្នាក់ងារព័ត៌មាន Reuters នៅថ្ងៃទី៦ ខែមេសា តំណាងរុស្ស៊ីនៅ UN បានព្យាយាមដាក់សម្ពាធ ឱ្យប្រទេសនានាប្រឆាំងសំណើអាម៉េរិក។ តំណាងរុស្ស៊ី បានព្រមានពីវិបាក ដែលនឹងកើតមានផងដែរ។
«គួរបញ្ជាក់ថា ប្រសិនជាប្រទេសណាមួយបោះឆ្នោតគាំទ្រគំនិតផ្ដួចផ្ដើមនេះ ឬអនុបវាទ ប្រទេសទាំងនោះ នឹងត្រូវចាត់ទុកថាបង្ហាញកាយវិការមិនរាក់ទាក់»។ តំណាងរុស្ស៊ីនៅ UN បានព្រមានបែបនេះរួចបន្តថា ជំហររបស់ប្រទេសនីមួយៗ នឹងកំណត់ទំនាក់ទំនងទ្វេភាគី ជាមួយរុស្ស៊ី និងកិច្ចការសំខាន់ៗទៀត ក្រោមក្របខ័ណ្ឌ UN ។
ជុំវិញរឿងនេះ អ្នកនាំពាក្យតំណាងអាម៉េរិកនៅ UN លោកស្រី Olivia Dalton នៅថ្ងៃទី៦ ខែមេសា បានចាត់ទុកឯកសារដែលបែកធ្លាយ ថាបានបង្ហាញពីការគំរាមដោយបើកចំហ ជាព័ស្តុតាងមួយទៀត សម្រាប់ឱ្យក្រុមប្រឹក្សា ព្យួរសមាជិកភាពរបស់រុស្ស៊ីជាបន្ទាន់។
គួរបញ្ជាក់ថា ដំណើរការព្យួររុស្ស៊ីចេញពីក្រុមប្រឹក្សាសិទ្ធិមនុស្ស តម្រូវឱ្យមានសំឡេងគាំទ្រ ២ភាគ៣ នៃសមាជិកមហាសន្និបាត UN ទាំង១៩៣ប្រទេស។ ចំពោះការបោះឆ្នោតអនុបវាទ នឹងមិនបូកបញ្ចូល ក្នុងសំឡេងគាំទ្រភាគច្រើន ដែលត្រូវការទេ។ សមាជិកមហាសន្និបាត១៩៣ប្រទេស នឹងបោះឆ្នោតនៅថ្ងៃទី៧ ខែមេសា៕
© រក្សាសិទ្ធិដោយ thmeythmey.com