អន្តរជាតិ
ព្រឹទ្ធសភាអាម៉េរិកបោះឆ្នោតឲ្យលោកស្រី Jackson ក្លាយជាចៅក្រមស្រ្តីស្បែកខ្មៅដំបូងនៅតុលាការកំពូល
× វ៉ាស៊ីនតោន - លោកស្រី Ketanji Brown Jackson ត្រូវបានព្រឹទ្ធសភាអាមេរិកបោះឆ្នោតគាំទ្រកាលពីថ្ងៃព្រហស្បតិ៍ ឲ្យក្លាយជាចៅក្រមស្ត្រីស្បែកខ្មៅដំបូងគេនៅតុលាការកំពូលអាមេរិកដែលជាព្រឹត្តិការណ៍មួយដ៏សំខាន់របស់សហរដ្ឋអាមេរិក និងជាជោគជ័យមួយរបស់ប្រធានាធិបតីអាមេរិកលោក Joe Biden ដែលបានធ្វើទៅតាមការសន្យារបស់លោកក្នុងអំឡុងពេលនៃការបោះឆ្នោតប្រធានាធិបតីអាមេរិកដែលលោកធ្លាប់បានសន្យាថា នឹងដាក់បញ្ជូលចៅក្រមដែលមានប្រវត្តិផ្សេងៗគ្នាទៅក្នុងប្រព័ន្ធតុលាការសហព័ន្ធអាមេរិក។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។
ការបោះឆ្នោតគាំទ្រលោកស្រីចៅក្រមតុលាការឧទ្ធរណ៍ដែលមានវ័យ៥១ឆ្នាំរូបនោះដើម្បីឲ្យក្លាយជាចៅក្រមតុលាការកំពូលអាមេរិកដែលមានអាណត្តិមួយជីវិតនេះ ត្រូវបានធ្វើឡើងដោយមានការគាំទ្រពីសមាជិកព្រឹទ្ធសភាអាមេរិកក្នុងសំឡេងឆ្នោត៥៣ទល់នឹង៤៧សំឡេង។
សមាជិកព្រឹទ្ធសភាអាមេរិក៣រូបនៃគណបក្សសាធារណរដ្ឋដែលមានលោកស្រី Susan Collins លោកស្រី Lisa Murkowski និងលោក Mitt Romney បានបោះឆ្នោតគាំទ្រចៅក្រមរូបនេះជាមួយបណ្តាសមាជិកព្រឹទ្ធសភាអាមេរិកទាំងអស់មកពីខាងគណបក្សប្រជាធិបតេយ្យរបស់លោក Joe Biden។
ការបោះឆ្នោតនេះ ត្រូវការសំឡេងគាំទ្រភាគច្រើន៥០% បូកមួយ ហើយលោកស្រី Jackson បានយកឈ្នះលើការប្រឆាំងរបស់សមាជិកព្រឹទ្ធសភាអាមេរិកភាគច្រើននៃគណបក្សសាធារណរដ្ឋនៅក្នុងដំណើរការអនុម័តលើការតែងតាំងចៅក្រមតុលាការកំពូលរបស់លោកស្រីដែលនៅតែមានការបែងចែកប្រកាន់គណបក្សយ៉ាងខ្លាំងនោះ៕
© រក្សាសិទ្ធិដោយ thmeythmey.com