អន្តរជាតិ
អ៊ុយក្រែន៖ សាកសពយ៉ាងហោចណាស់១,២២២នាក់ត្រូវរកឃើញនៅជិតក្រុងកៀវ រណ្ដៅសាកសពរួមមួយនៅទីក្រុង Bucha ក្បែររដ្ឋធានីកៀវ។ រូបថត AFP
× រដ្ឋអាជ្ញាអ៊ុយក្រែន លោកស្រី Iryna Venediktova នៅថ្ងៃទី១០ ខែមេសា បានបញ្ជាក់ថា សាកសពមនុស្សយ៉ាងហោចណាស់ ១ ២២២នាក់ ត្រូវបានរកឃើញ នៅក្បែរទីក្រុងកៀវ។ លោកស្រីក៏បញ្ជាក់ថា មន្ត្រីរុស្ស៊ីជាន់ខ្ពស់ប្រមាណ៥០០នាក់ ដែលរួមទាំងប្រធានាធិបតី វ៉្លាឌីមៀ ពូទីន ផង កំពុងស្ថិតក្រោមការស៊ើបអង្កេត ចំពោះឧក្រិដ្ឋកម្មសង្គ្រាមនៅអ៊ុយក្រែន។
ការលុកលុយលើអ៊ុយក្រែនពីសំណាក់រុស្ស៊ី ឈានដល់ប្រាំបីសប្ដាហ៍មកហើយ ចំណែកឯការប្រយុទ្ធ នៅតែបន្តនៅឡើយ ទោះបីជាសហគមន៍អន្តរជាតិ ព្យាយាមដាក់សម្ពាធជាច្រើនលើក្រុងមូស្គូក្ដី។ ក្រុងមូស្គូ រងការរិះគន់យ៉ាងខ្លាំង ចំពោះសោកនាដកម្មដែលកើតឡើងនៅ Bucha និងតំបន់ក្បែររដ្ឋធានីកៀវ ដែលជាសមរភូមិប្រយុទ្ធក្ដៅ មុនកងទ័ពរុស្ស៊ីប្ដូរទិសដៅទៅភាគខាងកើត។ នៅភាគខាងកើតនេះ មីស៊ីលរុស្ស៊ីបានវាយប្រហារ មកលើស្ថានីយ៍រថភ្លើងទីក្រុង Kramatorsk ដែលសម្លាប់ប្រជាជនយ៉ាងហោចណាស់៥៧នាក់។
អំឡុងបទសម្ភាសន៍ជាមួយទូរទស្សន៍ Sky News របស់ចក្រភពអង់គ្លេស លោកស្រី Iryna Venediktova រដ្ឋអាជ្ញាអ៊ុយក្រែនបានបញ្ជាក់ថា មកទល់បច្ចុប្បន្នសាកសពរហូតដល់ ១ ២២២ នាក់ ត្រូវបានរកឃើញ នៅតំបន់ក្បែររដ្ឋធានីក្រុងកៀវ។ យ៉ាងណាក៏ដោយ លោកស្រីមិនបានបញ្ជាក់ថា សាកសពដែលរកឃើញនោះ សុទ្ធតែជាជនស៊ីវិល ឬយ៉ាងណាឡើយ។
លោកស្រីក៏សង្កត់ធ្ងន់ថា អ៊ុយក្រែនកំពុងតែពិនិត្យមើលការចោទប្រកាន់ លើមន្ត្រីរុស្ស៊ីជាន់ខ្ពស់ចំនួន ៥០០ នាក់ រួមទាំងប្រធានាធិបតីរុស្ស៊ីលោក វ្ល៉ាឌីមៀ ពូទីន សម្រាប់ឧក្រិដ្ឋកម្មសង្គ្រាម នៅអ៊ុយក្រែននេះ។ លើសពីនេះ ការស៊ើបអង្កេតចំនួន ៥ ៦០០ ករណី ត្រូវបានដំណើរការ សម្រាប់ស្វែងរកព័ស្តុតាងពេញលេញ ចាប់តាំងពីការលុកលុយរបស់រុស្ស៊ីនៅខែកុម្ភៈមក។
ទាក់ទងការវាយប្រហារនៅ Kramatorsk លោកស្រីរដ្ឋអាជ្ញារូបនេះអះអាងថា ជាស្នាដៃរបស់រុស្ស៊ី ហើយអ៊ុយក្រែនក៏មានព័ស្តុតាងបញ្ជាក់ដែរ។ លោកស្រីលើកឡើងថា ប្រជាជនទាំងនោះ គ្រាន់តែចង់រស់រានមានជីវិត និងចង់ភៀសខ្លួនតែប៉ុណ្ណោះ តែរុស្ស៊ីបាន វាយប្រហារពួកគេ។
«ពូទីនជា ឧក្រិដ្ឋជនសង្គ្រាមដ៏អាក្រក់់មួយក្នុងសតវត្សរ៍ទី២១នេះ»។ រដ្ឋអាជ្ញារូបនេះ ក៏បានរិះគន់លោកពូទីនចំៗបែបនេះ។
គួរបញ្ជាក់ថា អង្គការសហប្រជាជាតិ (UN) នៅថ្ងៃទី១០ ខែមេសា បានបញ្ជាក់ថា ជនស៊ីវិល សរុបចំនួន ៤ ២៣២នាក់ បានរងផលប៉ះពាល់ពីសង្គ្រាមនៅអ៊ុយក្រែន ក្នុងនោះប្រជាជន ១ ៧៩៣នាក់ បានស្លាប់ និង២ ៤៣៩នាក់បានរងរបួស៕
© រក្សាសិទ្ធិដោយ thmeythmey.com