អន្តរជាតិ
អធិការបតីអូទ្រីសប្រាប់លោក ពូទីន ថា ទណ្ឌកម្មនឹងកាន់តែខ្លាំង ដរាបណាមនុស្សបន្តស្លាប់នៅអ៊ុយក្រែន
× អធិការបតីអូទ្រីស Karl Nehammer នៅថ្ងៃទី១១ ខែមេសា បានជួបជាមួយប្រធានាធិបតីរុស្ស៊ី វ៉ា្លឌីមៀ ពូទីន នៅរដ្ឋធានីមូស្គូ ហើយបានប្រាប់ប្រធានាធិបតីរុស្ស៊ីពីការទទួលខុសត្រូវ និងការរកយុត្តិធម៌ សម្រាប់ជនរងគ្រោះក្នុងឧក្រិដ្ឋកម្មសង្គ្រាមនៅអ៊ុយក្រែន។ លោក Nehammer ក៏ព្រមានពីទណ្ឌកម្មរបស់លោកខាងលិចដែលអាចនឹងដាក់កាន់តែខ្លាំងជាងមុនដរាបណា មនុស្សនៅតែបន្តស្លាប់នៅអ៊ុយក្រែន។
ក្នុងសេចក្ដីថ្លែងការណ៍មួយក្រោយជំនួបផ្ទាល់ជាមួយប្រធានាធិបតីរុស្ស៊ី វ៉្លាឌីមៀ ពូទីន រយៈពេល៧៥នាទីនៅថ្ងៃទី១១ ខែមេសា អធិការបតីអូទ្រីសលោក Karl Nehammer បញ្ជាក់ថា ដំណើរទស្សនកិច្ចរបស់លោកទៅទីក្រុងមូស្គូមិនមែនជាដំណើរទស្សនកិច្ចមិត្តភាពនោះឡើយ ហើយអំឡុងកិច្ចពិភាក្សា ភាគីទាំងពីរបានជជែកគ្នាដោយចំៗ តឹងតែង ព្រមទាំងបើកចំហ។
«ខ្ញុំបានលើកឡើងពីឧក្រិដ្ឋកម្មសង្គ្រាមធ្ងន់ធ្ងរនៅទីក្រុង Bucha និងទីតាំងផ្សេងទៀត ហើយបាន សង្កត់ធ្ងន់ថា អ្នកដែលទទួលខុសត្រូវទាំងអស់ចំពោះរឿងនេះត្រូវតែទទួលទោស»។
លោក Nehammer បានសង្កត់ធ្ងន់បែបនេះ មុនក៏បន្តថា សាររបស់លោកដ៏សំខាន់សម្រាប់លោក ពូទីន អំឡុងជំនួបនេះ គឺការតម្រូវឱ្យសង្គ្រាមបញ្ចប់ជាបន្ទាន់ដោយសារភាគីទាំងសងខាងសុទ្ធតែខាតបង់ផលប្រយោជន៍។
បន្ថែមពីនេះ ក្នុងសន្និសីទកាសែតនៅល្ងាចថ្ងៃទី១១ ខែមេសា មេដឹកនាំអូទ្រីសរូបនេះ ក៏បញ្ជាក់ថាលោកបានប្រាប់មេដឹកនាំរុស្ស៊ីក្នុងករណីដែលសង្គ្រាមអូសបណ្ដាយពេលកាន់តែយូរទៅមុនទៀត និងបង្កឱ្យមានមនុស្សស្លាប់ជាបន្តបន្ទាប់ នោះទណ្ឌកម្មលោកខាងលិច ក៏នឹងបង្កើនច្រើនជាងមុនផងដែរ។
បើយោងតាមទូរទស្សន៍ CNN ដែលស្រង់មន្ត្រីអូទ្រីសម្នាក់ អំឡុងជំនួបដដែល លោក Nehammer ក៏បានលើកឡើងពីភាពត្រៀមខ្លួនជាស្រេចរបស់ប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី ក្នុងការពិភាក្សាផ្ទាល់ជាមួយលោក ពូទីន ។ យ៉ាងណាមិញ លោក ពូទីន មិនបានឆ្លើយតបអ្វីនោះឡើយ។
ចំណែកឯប្រព័ន្ធផ្សព្វផ្សាយរុស្ស៊ីវិញបានបញ្ជាក់ថា ជំនួបមេដឹកនាំទាំងពីរបានធ្វើឡើងនៅនិវេសនដ្ឋានផ្លូវការ Novo-Ogaryovo នៅជិតទីក្រុងមូស្គូ ក្នុងទម្រង់ជាកិច្ចចរចាបិទទ្វារតាមការចង់បានរបស់ភាគីអូទ្រីស។ ភាគីរុស្ស៊ីនៅតែបដិសេធដាច់ខាតចំពោះការចោទកងកម្លាំងរុស្ស៊ីបង្កឧក្រិដ្ឋកម្មសង្គ្រាមនៅអ៊ុយក្រែន៕
Tag:
អូទ្រីស
រុស្ស៊ី
អ៊ុយក្រែន
© រក្សាសិទ្ធិដោយ thmeythmey.com