«លោក Shehbaz Sharif ត្រូវបានជ្រើសតាំងជានាយករដ្ឋមន្រ្តីប៉ាគីស្ថាន»។ ប្រធានសភាស្តីទី លោក Sardar Ayaz Sadiq បានបញ្ជាក់បែបនេះ។ ក្នុងសុន្ទរកថានៅក្នុងសភាលើកដំបូង បន្ទាប់ពីក្លាយជានាយករដ្ឋមន្រ្តីប៉ាគីស្ថាន លោក Sharif បានសន្យាបង្កើនប្រាក់ខែ ប្រាក់សោធននិវត្តន៍ និងកំណត់ប្រាក់អប្បបរមាសម្រាប់ពលករ។ 

 

ទន្ទឹមនេះ នាយករដ្ឋមន្រ្តីប៉ាគីស្ថាន បានអះអាងថា លោកនឹងពន្លឿនគម្រោងច្រកសេដ្ឋកិច្ចប៉ាគីស្ថាន-ចិន (CPEC) រួមទាំងរៀបចំទំនាក់ទំនងឡើងវិញជាមួយប្រទេសសម្ព័ន្ធមិត្ត និងដៃគូ ក្នុងនោះរួមទាំងឥណ្ឌាផង។ បើតាមលោក Sharif ប៉ាគីស្ថាន ចង់បានទំនាក់ទំនងល្អជាមួយឥណ្ឌា ប៉ុន្តែទំនាក់ទំនងប្រកបដោយសន្តិភាព មានបានលុះត្រាតែបញ្ហាកាស្មៀរ ត្រូវបានដោះស្រាយ។ 

 

មុនការបោះឆ្នោតសភានៅថ្ងៃទី១១ ខែមេសា សមាជិកសភាមកពីបក្ស Tehreek-e-Insaf ដែលជាបក្សរបស់លោក Imran Khan លាលែងពីតំណែងទ្រង់ទ្រាយធំ។ លោក Sharif ត្រូវបានសភាបោះឆ្នោតគាំទ្រ ១៧៤សំឡេង។ រដ្ឋាភិបាលថ្មីរបស់លោក Sharif នឹងមានអាណត្តិរហូតដល់ខែសីហា ឆ្នាំ២០២៣ ខាងមុខ។ 

 

លោក Sharif ជាប្អូនប្រុសរបស់លោក Nawaz Sharif អតីតនាយករដ្ឋមន្រ្តីប៉ាគីស្ថាន។ នៅក្នុងឆ្នាំ២០១៨ លោកបានក្លាយជាសមាជិកសភា និងជាប្រធានបក្សសម្ព័ន្ធមូស្លីម-ណាវ៉ាស (PML-N) បន្ទាប់ពីបងប្រុសរបស់លោក ត្រូវបានហាមឃាត់មិនឱ្យកាន់តំណែងក្នុងរដ្ឋាភិបាលមួយជីវិត ដោយសាររកឃើញកំហុសប្រព្រឹត្តអំពើពុករលួយ។ 

 

គួររម្លឹកថា ក្នុងរយៈពេល ៧៥ឆ្នាំមកហើយ គ្មាននាយករដ្ឋមន្រ្តីប៉ាគីស្ថានរូបណា អាចកាន់តំណែងបានពេញមួយអាណត្តិរយៈពេល ៥ឆ្នាំឡើយ។ នីតិវិធីដកតំណែងលោក Imran Khan មានចាប់តាំងពីដើមខែមីនា មកម្លេះ ដោយសារតែលោកដោះស្រាយបញ្ហាអំពើពុករលួយ ជំងឺឆ្លងសកល និងអតិផរណាមិនបានល្អ៕