អន្តរជាតិ
ប្រទេសទាំង១០ ត្រៀមខ្លួនបានល្អបំផុត ដើម្បីជួយបរិស្ថាននាពេលអនាគត រូបភាព៖ AFP
× របាយការណ៍ស្ថិតិអនាគតបៃតងឆ្នាំ ២០២២ បានធ្វើចំណាត់ថ្នាក់ប្រទេសចំនួន ៧៦ ដែលមានសេដ្ឋកិច្ចសមស្របនឹងដំណើរកាត់បន្ថយកាបូនឱ្យនៅកម្រិតទាប នាថ្ងៃអនាគត។ ក្នុងនោះ ប្រទេសកំពូលចំនួន ១០ ទទួលបានការវាយតម្លៃរៀបចំប្រទេសបានល្អបំផុត ក្នុងការជួយវិស័យបរិស្ថានប្រកបដោយនិរន្តរភាព ដែលភាគច្រើនគឺជាប្រទេសនៅប៉ែកអឺរ៉ុប។
របាយការណ៍ស្ថិតិអនាគតបៃតងឆ្នាំ ២០២២ ត្រូវបានចេញផ្សាយដោយទស្សនាវដ្តីបច្ចេកវិទ្យារបស់វិទ្យាស្ថានបច្ចេកវិទ្យា Massachusetts (MIT)។ ការធ្វើចំណាត់ថ្នាក់នេះបានធ្វើឡើងលើប្រទេសចំនួន ៧៦ ដែលត្រូវបានមើលឃើញថាមានសេដ្ឋកិច្ចសមស្របនឹងដំណើរកាត់បន្ថយកាបូនឱ្យនៅកម្រិតទាបថ្ងៃអនាគត។ អ្នកជំនាញបានវាយតម្លៃប្រទេសនីមួយៗពីវិធី និងកម្រិតនៃការកាត់បន្ថយការបញ្ចេញកាបូន ការអភិវឌ្ឍថាមពលស្អាត និងគំនិតច្នៃប្រឌិតក្នុងវិស័យបរិស្ថាន។ ការសិក្សាក៏បានពិនិត្យមើលការការពារបរិស្ថាន និងគោលនយោបាយអាកាសធាតុរបស់រដ្ឋាភិបាលដែរ។
ជាលទ្ធផល គេបែងចែកបាន៤កម្រិតផ្អែកលើសមត្ថភាពដែលបណ្ដាប្រទេសធ្វើបាន។ ទី១គឺក្រុមប្រទេសចំនួន២០ ដែលមានដំណើរការ និងការតាំងចិត្តបានល្អបំផុតកាត់បន្ថយកាបូនឱ្យនៅកម្រិតទាបនៅថ្ងៃអនាគត។ ក្រុមទី២ មានប្រទេសចំនួន២០ ដែលមានដំណើរការ និងការតាំងចិត្តល្អ ដើម្បីឱ្យប្រទេសមានពណ៌បៃតង។ ក្រុមទី៣ ជាក្រុមប្រទេសចំនួន២០ ដែលមានដំណើរការយឺត និងមិនសូវមានការតាំងចិត្តដើម្បីឱ្យប្រទេសមានពណ៌បៃតង។ ចុងក្រោយគឺក្រុមប្រទេសចំនួន ១៦ ដែលមិនមានគោលដៅជួយបរិស្ថាននៅថ្ងៃអនាគត ដោយសារកង្វះខាតការតាំងចិត្តអភិវឌ្ឍវិស័យបរិស្ថាន និងគំនិតច្នៃប្រឌិតផ្នែកសេដ្ឋកិច្ច។
តាមរបាយការណ៍ឆ្នាំ២០២២ ប្រទេសចំនួន ១០ដែលមានដំណើរការ និងការតាំងចិត្តល្អបំផុតក្នុងគម្រោងជួយបរិស្ថានដោយកាត់បន្ថយកាបូនឱ្យនៅកម្រិតទាបនាពេលអនាគតរួមមាន៖
១, អ៊ីស្លង់
២, ដាណឺម៉ាក
៣, ហូឡង់
៤, អង់គ្លេស
៥, ន័រវែស
៦,ហ្វាំងឡង់
៧, បារាំង
៨, អាល្លឺម៉ង់
៩,ស៊ុយអែត
១០,កូរ៉េខាងត្បូង។
ក្នុងចំណោមប្រទេសដែលធ្វើបានល្អផ្នែកបរិស្ថានភាគច្រើនជាប្រទេសអឺរ៉ុប គឺមានតែកូរ៉េខាងត្បូងប៉ុណ្ណោះជាប្រទេសអាស៊ីស្ថិតក្នុងតារាងលំដាប់ទី១០ ខណៈជប៉ុនស្ថិតនៅលំដាប់ទី១៩។
គួរបញ្ជាក់ថា អ៊ីស្លង់បានជាប់ចំណាត់ថ្នាក់លេខ ១ ព្រោះប្រទេសនេះបានផលិតថាមពលអគ្គិសនីចេញពីប្រភពកកើតឡើងវិញ ខណៈការផលិតទទួលបានច្រើនជាងការប្រើប្រាស់ទៅទៀត៕
© រក្សាសិទ្ធិដោយ thmeythmey.com