អាជ្ញាធរជាតិព្រះវិហារ បន្តសហការជាមួយស្ថាប័នអន្តរជាតិលើការសិក្សាស្រាវជ្រាវពីបុរាណវិទ្យានៅ​ក្នុង​រមណីយដ្ឋាន​កោះកេរ។ នៅថ្ងៃទី១៩ មេសាកន្លងទៅ អាជ្ញាធរជាតិព្រះវិហារ និង​សាកលវិទ្យាល័យ The University of British Columbia បានចាប់ផ្ដើមចុះសិក្សាស្រាវជ្រាវលើវិស័យបុរាណវិទ្យា ដោយប្រើប្រាស់ឧបករណ៍ GPR ដើម្បីស្កេន។
 

ក្រុមអ្នកជំនាញ  នឹងស្កេននៅទីតាំងចន្លោះពីប្រាសាទធំ ដល់អណ្តូងព្រេង ឬរាជវាំងបុរាណ ដើម្បីសិក្សាស្វែងយល់ពីការតាំងទីរបស់មនុស្សនាសម័យបុរាណ និងរចនាសម្ព័ន្ធសំណង់បុរាណមួយចំនួនដែលកប់បាត់ក្នុងស្រទាប់ដី។ គម្រោងកិច្ចសហការស្រាវជ្រាវនេះ មានរយៈពេល១០ថ្ងៃ ដើម្បីប្រមូលទិន្នន័យនៅទីតាំងដែលបានកំណត់ខាងលើ។ 
 

បើតាម​អាជ្ញាធរជាតិព្រះវិហារ​ លក្ខណៈពិសេសនៃការប្រើប្រាស់ម៉ាស៊ីនស្កេននេះ គឺប្រើរលកវិទ្យុកម្មចាក់ចូលទៅក្នុងដី ដែលអាចដឹងពីរចនាសម្ព័ន្ធគ្រឹះសំណង់ផ្សេងៗដោយមិនចាំបាច់កាយដីចេញ។ គួរ​បញ្ជាក់ថា រមណីយដ្ឋានប្រាសាទកោះកេរ មានផ្ទៃដីទំហំជាង ៨,៧០០ហិកតា ស្ថិតនៅក្នុងស្រុកគូលែន ឃុំស្រយង់ ដោយគ្របដណ្ដប់ភូមិ៣ គឺភូមិរំចេក ភូមិកោះកេរ និងភូមិស្រយង់ជើង នៃខេត្តព្រះវិហារ៕