ជាតិ
អគ្គិភ័យ បំផ្លាញផ្ទះពលរដ្ឋ ១៨ខ្នងនៅសង្កាត់ច្រាំងចំរេះ១ កាលពីយប់មិញ អគ្គិភ័យឆាបឆេះផ្ទះនៅសង្កាត់ច្រាំងចំរេះ១ កាលពីយប់ថ្ងៃទី៦ ឧសភា។ រូបភាពពីហ្វេសប៊ុកនាយកដ្ឋាននគរបាលបង្ការពន្លត់អគ្គិភ័យ។
× ភ្នំពេញ៖ ផ្ទះពលរដ្ឋចំនួន ១៨ខ្នងនៅសង្កាត់ច្រាំងចំរេះ១ ខណ្ឌឫស្សីកែវ ត្រូវបានអគ្គិភ័យឆាបឆេះ កាលពីម៉ោង១១យប់ថ្ងៃទី៦ ឧសភា។ ចំពោះមូលហេតុដែលបង្កឱ្យមានគ្រោះអគ្គិភ័យនេះ នាយកដ្ឋាននគរបាលបង្ការពន្លត់អគ្គិភ័យ និងសង្រ្គោះ នៃអគ្គស្នងការដ្ឋាននគរបាលជាតិ កំពុងបន្តការស្រាវជ្រាវ។
កាលពីយប់ម៉ោង១១:១០នាទី ថ្ងៃទី៦ ឧសភា មានគ្រោះអគ្គិភ័យមួយ បានឆាបឆេះលំនៅដ្ឋានរបស់ពលរដ្ឋដែលរស់នៅភូមិ២ ក្រុម៤ សង្កាត់ច្រាំងចំរេះ១ ខណ្ឌឫស្សីកែវ រាជធានីភ្នំពេញ។ គ្រោះអគ្គិភ័យនេះ បានបំផ្លាញផ្ទះថ្មក្រោមឈើលើចំនួន ១៨ខ្នង ដោយមិនបង្កឱ្យមនុស្សស្លាប់ ឬរបួសឡើយ។
បើតាមនាយកដ្ឋាននគរបាលបង្ការពន្លត់អគ្គិភ័យ កម្លាំងអន្តរាគមន៍ បានប្រើប្រាស់រថយន្តការិយាល័យអគ្គិភ័យចំនួន ២១គ្រឿង និងប្រើប្រាស់ទឹកអស់ ៤២រថយន្ត។ ក្រៅពីប្រើប្រាស់រថយន្តការិយាល័យអគ្គិភ័យ ក៏បានប្រើប្រាស់រថយន្តសាលាខណ្ឌឫស្សីកែវ ចំនួន១ គ្រឿង ប្រើទឹកអស់ចំនួន២រថយន្ត, រថយន្តក្រុមហ៊ុន OCIC ទីក្រុងជ្រោយចង្វារ ចំនួន៧ គ្រឿង ប្រើទឹកអស់ចំនួន ៧ រថយន្ត និងរថយន្តក្រុមហ៊ុនស្រាបៀរកម្ពុជាចំនួន១ គ្រឿង ប្រើប្រាស់ទឹកចំនួន១ រថយន្ត។
គ្រោះអគ្គិភ័យនេះ ត្រូវបានកម្លាំងអន្តរាគមន៍ពន្លត់ចប់ នៅម៉ោង១នាទីរំលងអធ្រាត្រថ្ងៃទី៧ ឧសភា។ ចំពោះមូលហេតុដែលបង្កឱ្យមានគ្រោះអគ្គិភ័យនេះ នាយកដ្ឋាននគរបាលបង្ការពន្លត់អគ្គិភ័យ កំពុងបន្តការស្រាវជ្រាវ៕
Tag:
អគ្គិភ័យ
ឫស្សីកែវ
ច្រាំងចំរេះ
© រក្សាសិទ្ធិដោយ thmeythmey.com