ក្រសួងការពារជាតិ បានសរសេរក្នុងសេចក្តីប្រកាសព័ត៌មានថា៖«ចាប់ពីពេលនេះតទៅ ការធ្វើទំនើបកម្មកងយោធពលខេមរភូមិន្ទ គឺជាអាទិភាពចម្បងមួយ នៅក្នុងដំណើរការកែទម្រង់យោធា។ សមត្ថភាពកងយោធាកម្ពុជា នឹងមិនត្រូវបានចាប់បង្ខំឲ្យស្ថិតនៅក្នុងសភាពចាស់គំរឹល តោកយ៉ាក ឬដើរថយក្រោយនោះឡើយ»។
 

ក្រសួងការពារជាតិ បន្តថា កម្ពុជា មិនមែនធ្វើទំនើបកម្មយោធាត្រឹមតែមូលដ្ឋានកងទ័ពជើងទឹករាមប៉ុណ្ណោះទេ តែនឹងធ្វើទំនើបកម្មក្នុងផ្នែកផ្សេងៗទៀត ដូចជា ការពារដែនអាកាស អាវុធធុនធ្ងន់ ការជួយសង្គ្រោះ ការរក្សាសន្តិភាព និង ការប្រឆាំងអំពើភេរវកម្ម ជាដើម។ ក្រសួងការពារជាតិ បន្ថែមថា ការធ្វើទំនើបកម្មយោធានេះ មិនមែនដើម្បីបង្កការគំរាមកំហែងដល់ប្រទេសណាមួយនោះទេ តែដើម្បីការពារខ្លួន និងរួមចំណែកក្នុងការថែរក្សាសន្តិភាព-ស្ថិរភាពក្នុងតំបន់។ 
 

ក្រសួងការពារជាតិ បានស្រង់ប្រសាសន៍របស់សម្តេច ទៀ បាញ់ ដែលថ្លែងក្នុងពិធីផ្សព្វផ្សាយសៀវភៅសការពារជាតិឆ្នាំ២០២២ ទៅសរសេរក្នុងសេចក្តីប្រកាសព័ត៌មានថា សៀវភៅនេះ គឺជាត្រីវិស័យ និងជាគោលការណ៍សម្រាប់ការរៀបចំផែនការ ការធ្វើកំណែទម្រង់យោធា និងការកសាងសមត្ថភាពកងយោធពលខេមរភូមិន្ទ។ សេចក្តីប្រកាសព័ត៌មាន សរសេរពីប្រសាសន៍របស់សម្តេចរដ្ឋមន្រ្តីទៀតថា សៀវភៅនេះ ក៏ជាឧបករណ៍ដ៏សំខាន់ក្នុងទំនាក់ទំនងអន្តរជាតិផងដែរ ជាពិសេសសុឆន្ទៈរបស់កម្ពុជា ក្នុងការកសាងទំនុកចិត្តជាមួយបណ្តាប្រទេសក្នុងតំបន់៕