តាមរយៈសារលិខិតនោះ លោកនាយឧត្តមសេនីយ៍ នេត សាវឿន បានលើកទឹកចិត្តឲ្យកងកម្លាំងនគរបាលជាតិទាំងអស់ បន្តប្រឹងប្រែងបំពេញភារកិច្ច ដើម្បីបុព្វហេតុជាតិ សាសនា ព្រះមហាក្សត្រ។ លោក ថែមទាំងបានប្រាប់ឲ្យកងកម្លាំងនគរបាលជាតិទាំងអស់ បន្តបម្រើប្រជាពលរដ្ឋដោយភាពអត់ធ្មត់ ប្រកាន់ខ្ជាប់វិន័យ សីលធម៌ អាកប្បកិរិយាថ្លៃថ្នូរ ម៉ឺងម៉ាត់ និង មនសិការវិជ្ជាជីវៈខ្ពស់។ 
 

ជាមួយគ្នានេះ លោកនាយឧត្តមសេនីយ៍ បានសរសើរកងកម្លាំងនគរបាលជាតិថា កន្លងមក បានសម្រេចស្នាដៃធំៗជាច្រើន ដោយបានប្រកៀកស្មាយ៉ាងជិតស្និទ្ធជាមួយកងយោធពលខេមរភូមិន្ទ ការពារបូរភាពទឹកដី អធិបតេយ្យជាតិ ទប់ស្កាត់បទល្មើសគ្រប់ប្រភេទនៅតាមព្រំដែន ចូលរួមចំណែកកសាងព្រំដែនសន្តិភាព និងការអភិវឌ្ឍ។ លោក បន្តថា កងកម្លាំងនគរបាលជាតិ បានទប់ស្កាត់អំពើភេរវកម្ម បង្ក្រាបឧក្រិដ្ឋនកម្មឆ្លងដែនគ្រប់ប្រភេទបានទាន់ពេលវេលា ធានាបាននូវសន្តិសុខ និងរក្សាបាននូវប្រក្រតីភាពសង្គម។
 

លោក លើកទឡ្ហីករណ៍ជាក់ស្តែងថា ក្នុងឆ្នាំ២០២១ កន្លងទៅ គ្រប់គោលដៅនយោបាយ ការទូត សេដ្ឋកិច្ច វប្បធម៌ ទេសចរណ៍ ព្រះរាជបេសកកម្មរបស់ព្រះមហាក្សត្រ ព្រះមហាក្សត្រី បេសកកម្មរបស់ឥស្សរជនជាតិ-អន្តរជាតិ និងព្រឹត្តការណ៍ជាតិ-អន្តរជាតិសំខាន់ៗ ដែលសរុបមានជាង១,២ម៉ឺនលើក ត្រូវបានធានាសុវត្ថិភាពទាំងស្រុង៕