អន្តរជាតិ
ជំងឺកូវីដ-១៩ នៅកូរ៉េខាងជើង៖ លោក គីម ជុងអ៊ុន បញ្ជាកងទ័ពជួយផ្គត់ផ្គត់ថ្នាំ ឯកូរ៉េខាងត្បូងប្រកាសផ្ដល់ជំនួយ មេដឹកនាំកូរ៉េខាងជើង គីម ជុងអ៊ុន ចុះពិនិត្យឱសថស្ថានក្នុងរដ្ឋធានីព្យុងយ៉ាង ស្របពេលដែលជំងឺកូវីដ-១៩ ផ្ទុះខ្លាំង។ រូបថត KCNA
× មេដឹកនាំកូរ៉េខាងជើង គីម ជុងអ៊ុន បានដឹកនាំកិច្ចប្រជុំបន្ទាន់របស់ការិយាល័យនយោបាយបក្សពលករកូរ៉េ ដើម្បីពិភាក្សាស្ថានការណ៍ជំងឺកូវីដ-១៩ ដែលកាន់តែយ៉ាប់យ៉ឺន។ នេះបើតាមទីភ្នាក់ងារព័ត៌មានរដ្ឋកូរ៉េខាងជើង KCNA នៅថ្ងៃទី១៦ ខែឧសភា។ លោក គីម ក៏បានបញ្ជាឱ្យយោធាជួយផ្គត់ផ្គង់ថ្នាំព្យាបាលដោយមានស្ថិរភាពសម្រាប់ប្រជាជននៅក្នុងរដ្ឋធានីព្យុងយ៉ាង។ នៅកូរ៉េខាងត្បូងវិញ ប្រធានាធិបតីប្រទេសនេះ ក៏ប្រកាសជួយកូរ៉េខាងជើងផងដែរ។
អស់ពេលជិតមួយសប្ដាហ៍មកនេះ កូរ៉េខាងជើង កំពុងប្រឈមមុខនឹងការស្ទុះឡើងនៃករណីឆ្លងជំងឺកូវីដ-១៩ ក្នុងប្រទេស។ ស្របពេលគ្នានេះ ប្រទេសមួយនេះ ក៏មិនមានកម្មវិធីផ្ដល់វ៉ាក់សាំងបង្ការជំងឺកូវីដ-១៩ ហើយក៏ធ្លាប់បានបដិសេធមិនទទួលជំនួយវ៉ាក់សាំងរាប់លានដូសពីយន្តការ COVAX ដែលអាចធ្វើឱ្យពិបាកនឹងទប់ទល់នឹងការរីករាលដាលនៃជំងឺនេះ។
ខណៈស្ថានភាពមិនធូរស្រាល មេដឹកនាំកូរ៉េខាងជើង គីម ជុងអ៊ុន នៅថ្ងៃទី១៥ ខែ ឧសភា បានកោះប្រជុំការិយាល័យនយោបាយម្ដងទៀត ហើយបានរិះគន់ចំៗចំពោះការមិនទទួលខុសត្រូវ និងអសមត្ថភាពរបស់គណៈរដ្ឋមន្ត្រី និងមន្ត្រីសុខាភិបាលសាធារណៈ។ ក្នុងរបាយការណ៍របស់ប្រព័ន្ធផ្សព្វផ្សាយរដ្ឋ KCNA នៅថ្ងៃ ទី១៦ ខែឧសភា ទោះបីជារដ្ឋាភិបាលទីក្រុងព្យុងយ៉ាងបានបញ្ជាឱ្យប្រើប្រាស់ឱសថបម្រុងក្ដី លោក គីម លើកឡើងថា ឱសថទាំងនោះ មិនត្រូវបានបញ្ជូនដល់ប្រជាជនទាន់ពេល និងត្រឹមត្រូវតាមក្បួនខ្នាតនោះឡើយ។
«លោក គីម បានបញ្ជាឱ្យក្រុមពេទ្យរបស់កងទ័ពឱ្យជួយរក្សាស្ថិរភាពក្នុងការផ្គត់ផ្គង់ថ្នាំព្យាបាលសម្រាប់ប្រជាជនក្នុងទីក្រុងព្យុងយ៉ាង»។ ប្រព័ន្ធផ្សព្វផ្សាយរដ្ឋខាងលើដដែលសរសេរបែបនេះ។
បើតាម KCNA លោក គីម ក៏បានទៅមើលឱសថស្ថានដែលមានទីតាំងនៅជិតទន្លេ Taedong ក្នុងទីក្រុងព្យុងយ៉ាងដើម្បីស្វែងយល់អំពីការផ្គត់ផ្គង់ និងការលក់ថ្នាំ។ នៅទីនោះ មេដឹកនាំកូរ៉េខាងជើងរូបនេះក៏បានរិះគន់ពីឱសថស្ថានទាំងនោះដែលមិនមានឧបករណ៍គ្រប់គ្រាន់ដើម្បីបំពេញមុខងារដោយរលូន ហើយខ្វះកន្លែងស្តុកថ្នាំ ឯអ្នកលក់ក៏មិនមានសម្លៀកបំពាក់ប្រកបដោយអនាម័យត្រឹមត្រូវ។
ត្រឹមថ្ងៃទី១៦ ខែឧសភា អ្នកក្ដៅខ្លួនថ្មីមានរហូតដល់៣៩ម៉ឹននាក់ ខណៈមនុស្ស៨នាក់បន្ថែមទៀតបានស្លាប់។ ទោះជាយ៉ាងណា កូរ៉េខាងជើង មិនបានផ្ដល់តួលេខជាក់លាក់នៃករណីឆ្លងក្នុងប្រទេសឡើយ។
នៅទីក្រុងសេអ៊ូលវិញ ប្រធានាធិបតីកូរ៉េខាងត្បូង យូន សុកយ៉ល នៅថ្ងៃទី១៦ ខែឧសភា ក៏បានបោះដៃជួយកូរ៉េខាងជើងដោយសន្យាផ្ដល់វ៉ាក់សាំងបង្ការជំងឺកូវីដ-១៩ បរិក្ខារពេទ្យ និងព្រមទាំងបុគ្គលិកសុខាភិបាល ប្រសិនបើទីក្រុងព្យុងយ៉ាងបើកទទួលយកជំនួយទាំងនេះ។ ថ្លែងទៅកាន់កិច្ចប្រជុំសភា លោក យូន ដែលទើបឡើងកាន់តំណែងថ្មីៗអះអាងថា កូរ៉េខាងត្បូងនឹងខិតខំជួយកូរ៉េខាងជើងដោះស្រាយវិបត្តិនេះ៕
Tag:
កូរ៉េខាងជើង
កូរ៉េខាងត្បូង
© រក្សាសិទ្ធិដោយ thmeythmey.com