ជាតិ
ព្រំដែន
ក្រសួងការពារជាតិកម្ពុជា-វៀតណាម បន្តសហការគ្នា ដើម្បីកសាងព្រំដែនសន្តិភាព ស្ថិរភាព និងការអភិវឌ្ឍ សម្តេច ទៀ បាញ់ រដ្ឋមន្រ្តីការពារជាតិកម្ពុជា និង លោក ហ្វាន វ៉ាន់ហ្សាង រដ្ឋមន្រ្តីការពារជាតិវៀតណាម ធ្វើជាអធិបតីក្នុង «ជំនួប_ប្រាស្រ័យ_មិត្តភាព_ការ_ពារ_ជាតិ_ព្រំដែ_ន_គោក_
×
ដោយ៖ ទេពញាណ
ក្រសួងការពារជាតិកម្ពុជា និងក្រសួងការពារជាតិវៀតណាម បានរៀបចំពិធីមួយរួមគ្នា ហៅថា «ជំនួបប្រាស្រ័យមិត្តភាពការពារជាតិព្រំដែនគោកកម្ពុជា-វៀតណាម ថ្នាក់រដ្ឋមន្ត្រីការពារជាតិលើកទី១» កាលពីថ្ងៃទី១៥ ខែឧសភា ឆ្នាំ២០២២ នៅមជ្ឈមណ្ឌលបំពាក់បំប៉នផ្នែកនយោបាយ ក្នុងស្រុកឡុកនិញ ខេត្តប៊ិញភឿក ប្រទេសវៀតណាម។ សម្តេច ទៀ បាញ់ ឧបនាយករដ្ឋមន្រ្តី-រដ្ឋមន្រ្តីក្រសួងការពារជាតិកម្ពុជា និងលោកនាយឧត្តមសេនីយ៍ ហ្វាន វ៉ាន់ហ្សាង (Phan Van Giang) រដ្ឋមន្រ្តីក្រសួងការពារជាតិវតៀតណាមិ ចូលរួមធ្វើជាអធិបតីក្នុងជំនួបលើកទី១នេះ។
ក្រសួងការពារជាតិកម្ពុជា ផ្សាយលើគេហទំព័រថា ក្នុងជំនួបនោះ ក្រសួងការពារជាតិកម្ពុជា និងក្រសួងការពារជាតិវៀតណាម សម្រេចជាមួយគ្នា ក្នុងការបន្តពង្រឹងកិច្ចសហប្រតិបត្តិការ ដើម្បីកសាងខ្សែព្រំដែនសន្តិភាព មិត្តភាព ស្ថិរភាព និងការអភិវឌ្ឍ។ សម្តេច ទៀ បាញ់ បានវាយតម្លៃខ្ពស់ ចំពោះកិច្ចសហប្រតិបត្តិការរវាងក្រសួងការពារជាតិកម្ពុជា និងក្រសួងការពារជាតិវៀតណាម ដែលសម្រេចបានសមិទ្ធផលនានាក្នុងឆមាសទី១ ឆ្នាំ២០២២។ សម្តេច បន្តថា ឆ្នាំ២០២២នេះ ក្រសួការពារជាតិទាំង២ បានធ្វើការជាមួយគ្នាយ៉ាងជិតស្និត។
ចំណែក លោក ហ្វាន វ៉ាន់ហ្សាង ក៏បានវាយតម្លៃខ្ពស់ដែរ ចំពោះការរៀបចំ «ជំនួបប្រាស្រ័យមិត្តភាពការពារជាតិព្រំដែនគោកកម្ពុជា-វៀតណាម ថ្នាក់រដ្ឋមន្ត្រីការពារជាតិលើកទី១» នេះឡើង។ លោក អះអាងថា វៀតណាម នឹងចូលរួមសហការរៀបចំជំនួបនេះជារៀងរាល់ឆ្នាំ។ លោក ថែមទាំងបានវាយតម្លៃខ្ពស់ថា ទោះបីជួបប្រទះនឹងជំងឺកូវីដ-១៩ រួមទាំងការវិវត្តស្ថានភាពស្មុគស្មាញទាំងក្នុងតំបន់ និងពិភពលោកក្តី ប៉ុន្តែកម្ពុជា-វៀតណាម នៅតែបន្តកិច្ចសហប្រតិបត្តិការលើវិស័យការពារជាតិបានរឹងមាំ។
ក្នុងជំនួបជាមួយប្រជាពលរដ្ឋខ្មែរនៅលើទឹកដីអាម៉េរិក នាអំឡុងខែឧសភា ឆ្នាំ២០២២នេះ ប្រមុខរដ្ឋាភិបាលកម្ពុជា សម្តេច ហ៊ុន សែន បានបញ្ចេញព័ត៌មានថា កម្ពុជា-វៀតណាម បោះបង្គោលព្រំដែនបាន៦ភាគរយបន្ថែមទៀត ដែលធ្វើឲ្យការបោះបង្គោលព្រំដែននៃប្រទេសទាំង សម្រេចបាន៩០ភាគរយហើយ។ ប្រមុខរដ្ឋាភិបាលកម្ពុជា ទៅអាម៉េរិក ដើម្បីចូលរួមកិច្ចប្រជុំកំពូលអាស៊ាន-អាម៉េរិក ពីថ្ងៃទី១២ ដល់ថ្ងៃទី១៣ ខែឧសភា ឆ្នាំ២០២២។
មេដឹកនាំកម្ពុជា ថ្លែងដូច្នេះថា៖«បើគង់តែឲ្យដីគេដដែល ចាំបាច់ចរចាយូរឆ្នាំម្ល៉េះ និយាយឲ្យច្បាស់នៅកន្លែងហ្នឹង ចាំបាច់អីទៅចុះហត្ថលេខាម្តង បាន៨៤ភាគរយ ឥឡូវសម្រេចបាន៦ភាគរយទៀត ហើយឯកភាពគ្នាថា នឹងទៅចុះហត្ថលេខាក្នុងឆ្នាំ២០២២ [លើ] អា៦ភាគរយ ដោយយើង បានត្រួតពិនិត្យបានច្បាស់លាស់ ហើយត្រូវបោះបង្គោលឲ្យត្រឹមត្រូវ ហើយបង្គោលនីមួយៗ សុទ្ធតែមានចាប់តាមផ្កាយរណបាន។ អ៊ីចឹង គេ ចេះតែថា ហ៊ុន សែន លក់ដី ហ៊ុន សែន លក់ដី ឥឡូវដីនៅកន្លែងណា ដែលហ៊ុន សែន លក់? បើគង់តែថាឲ្យដីគេដដែល ចាំបាច់ទៅចរចាមួយតឹងមួយផឹង មួយតឹកមួយផឹងធ្វើអី»។
បច្ចុប្បន្ន ខ្សែបន្ទាប់ព្រំដែនកម្ពុជា-វៀតណាម នៅសល់តែ១០ភាគរយទៀតប៉ុណ្ណោះ ដែលមិនទាន់ត្រូវបានបោះបង្គលគោល៕
Tag:
កម្ពុជា-វៀតណាម
ព្រំដែន
© រក្សាសិទ្ធិដោយ thmeythmey.com