ពីថ្ងៃទី១៦ ដល់ថ្ងៃទី១៩ ខែឧសភា មន្ត្រីជំនាញរបស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) នៃក្រសួងពាណិជ្ជកម្ម រកឃើញស្ថានីយ/ដេប៉ូលក់ប្រេងឥន្ធនៈចំនួន១៩ទីតាំងទៀត ដែលកេងបន្លំបរិមាណ និងគ្មានគុណភាពឥន្ធនៈចំពោះអ្នកប្រើប្រាស់។

 

ក.ប.ប បានបញ្ជាក់នៅលើទំព័រហ្វេសប៊ុករបស់ខ្លួនថាដេប៉ូប្រេងឥន្ធនៈទាំង១៩កន្លែង ដែលមន្រ្តីជំនាញ ក.ប.ប រកឃើញមិនមានអនុលោមភាពចំពោះអតិថិជននោះ គឺមាន​នៅរាជធានីភ្នំពេញ ខេត្តសៀមរាប កំពង់ធំ កំពង់ចាម កំពង់ឆ្នាំង  ពោធិ៍សាត់ ព្រះសីហនុ ព្រៃវែង និងខេត្តបាត់ដំបង។ ​ក្រោយរកឃើញ បែបនេះ មន្ត្រីជំនាញក.ប.ប បានពិន័យអន្តរការណ៍ និងណែនាំឱ្យម្ចាស់ដេប៉ូឱ្យកែតម្រូវ និងឈប់ប្រព្រឹត្តល្មើសច្បាប់ស្ដីពីកិច្ចការពារអ្នកប្រើប្រាស់។

 

ក.ប.ប បានបញ្ជាក់ថា ក្នុងករណីស្ថានីយឬដេប៉ូប្រេងឥន្ធនៈដដែលនៅតែប្រព្រឹត្តិខុស នោះម្ចាស់ស្ថានីយ ឬដេប៉ូប្រេងឥន្ធនៈទាំងនោះ នឹងរងការកសាងសំណុំរឿងបញ្ជូនទៅតុលាការ។

 

សូមជម្រាបថា បច្ចុប្បន្ន សាំងធម្មតាមានសម្លៃ ៥៦០០រៀលក្នុងមួយលីត្រ ខណៈប្រងម៉ាស៊ូតបានធ្លាក់នៅត្រឹម៥៤០០រៀលវិញក្នុងមួយលីត្រវិញ។ តម្លៃនេះ ក្រសួងពាណិជ្ជកម្ម បានកំណត់ឱ្យម្ចាស់ស្ថានីយ/ដេប៉ូប្រេងឥន្ធនៈត្រូវអនុវត្តចាប់ពីថ្ងៃទី២១ឧសភា រហូតដល់ដំណាច់ខែនេះ៕