ជាតិ
សេដ្ឋកិច្ច
វៀតណាមបង្កើនការនាំចូលម្រេចពីកម្ពុជា រូបថត ៖ ម្រេចប្រជាកសិករត្បូងឃ្មុំ
×
ដោយ ៖ ធន់ សេងហុង
៥ខែនេះ ការនាំចេញម្រេចរបស់វៀតណាមបានធ្លាក់ចុះប្រហែល ១៧ភាគរយ ខណៈការនាំចូលពីកម្ពុជា កើនឡើងខ្ពស់។ ក្រៅពីម្រេចនេះ វៀតណាមក៏នាំចូលកសិផលកម្ពុជា ជាច្រើនទៀតដែរ ។ នេះបើយោងតាមការចុះផ្សាយរបស់កាសែតវៀតណាម Thanh Nien នាថ្ងៃទី១៣ មិថុនា ឆ្នាំ២០២២ ។
ការិយាល័យពាណិជ្ជកម្មវៀតណាមប្រចាំកម្ពុជា បានប្រាប់កាសែត Thanh Nien ថា ការនាំចេញម្រេចរបស់កម្ពុជា កើនឡើងជាង ៧៩ភាគរយ ក្នុងរយៈពេល៤ខែដំបូង ឆ្នាំនេះ។ ទិសដៅនៃការនាំចេញសំខាន់នៃផលិតផលម្រេចរបស់កម្ពុជា គឺប្រទេសវៀតណាម។ កម្ពុជានាំចេញម្រេចបានសរុប ៣.៨៣៤ តោន ក្នុងនោះការនាំចេញទៅវៀតណាម ៣.៥៤០ តោន ស្មើនឹង ៩២ភាគរយនៃទិន្នផលសរុប ខណៈអាឡឺម៉ង់ជាប់ចំណាត់ថ្នាក់លេខ២ ដែលនាំចូលម្រេចកម្ពុជា ២៥៥តោន ក្នុងឆ្នាំ២០២២នេះ ។
ម្រេចកម្ពុជាចាប់ផ្តើមប្រមូលផលដោយដៃចាប់ពីខែមករា ដល់ខែឧសភា ដែលទទួលបានទិន្នផលខ្ពស់ ប៉ុន្តែតម្លៃម្រេចបានធ្លាក់ចុះមកនៅត្រឹម ៣,២ដុល្លារក្នុងមួយគីឡូក្រាម ដែលប្រហាក់ប្រហែល ៧៤.០០០ ដុង។ តម្លៃនេះ គឺប្រហាក់ប្រហែលនិងតម្លៃនៅដើមខែមិថុនា នៃចម្ការម្រេច ធំៗក្នុងប្រទេសវៀតណាម។ បច្ចុប្បន្ននេះ សកម្មភាពនាំចេញម្រេចរបស់វៀតណាម បានជួបការលំបាកជាច្រើនផងដែរ។
បើតាមអាជីវករលក់ដូរនៅទីក្រុងហូជីមិញ ផលិតផលម្រេចរបស់កម្ពុជាមានគុណភាពល្អ និងសុវត្ថិភាពខ្ពស់ចំពោះសុខភាព ដោយសារដំណើរការកសិកម្មប្រើប្រាស់ជីគីមីតិចតួច។ ដោយឡែកការនាំចូលម្រេចពីកម្ពុជា មិនប៉ះពាល់ផលិតផលក្នុងស្រុកវៀតណាមឡើយ។
នេះបើតាមកាសែតវៀតណាម Thanh Nien ។
គិតត្រឹមដំណាច់ខែឧសភា វៀតណាមបាននាំចេញម្រេចគ្រប់ប្រភេទចំនួន ១០១.០០០ តោន ដែលសម្រេចបានទឹកប្រាក់ ៤៦៨ លានដុល្លារ។ ទំហំនៃការនាំចេញថយចុះជិត ១៧ភាគរយ ស្មើនឹង ២០.៦០០ តោន ប៉ុន្តែចំណូលបានកើនឡើងជិត ២៣ភាគរយស្មើនឹង ៨៦ លានដុល្លារ បើធៀបនឹងរយៈពេលដូចគ្នាក្នុង ២០២១។
ចំពោះការនាំចេញម្រេចរបស់វៀតណាម ទៅកាន់បណ្តាប្រទេសនៅអាស៊ីបានធ្លាក់ចុះជិត ២៨ភាគរយ ។ ក្នុងការនោះការនាំចេញទៅប្រទេសចិន ថយចុះ៨៩ភាគរយ និងប៉ាគីស្ថាន ថយចុះ៦១ភាគរយ ៕
© រក្សាសិទ្ធិដោយ thmeythmey.com