នាអំឡុងពេលរាតត្បាតជំងឺកូវីដ-១៩ ធ្ងន់ធ្ងរនៅកម្ពុជានោះ រដ្ឋាភិបាល បានសម្រេចផ្ដល់ប្រាក់ឧបត្ថម្ភ ៤០ដុល្លារ ដល់កម្មករនិយោជិត ដែលព្យួរការងារក្នុងវិស័យទេសចរណ៍ ដើម្បីជួយសម្រួល និងដោះស្រាយជីវភាពរបស់ពួកគេ។ ប៉ុន្តែពេលនេះ រដ្ឋាភិបាល សម្រេចបញ្ចប់វិធានការផ្ដល់ប្រាក់៤០ដុល្លារ ដល់កម្មករ និយោជិត ក្នុងវិស័យទេសចរណ៍នេះហើយ ចាប់ពីថ្ងៃទី១៤ មិថុនា តទៅ លើកលែងតែកម្មករ និយោជិត បម្រើការងារផ្នែកសណ្ខាគារ នៅខេត្តសៀមរាប ដែលអាចបន្តទទួលបានប្រាក់ឧបត្ថម្ភនេះ។

 

បើតាមក្រសួងការងារ មូលហេតុរដ្ឋ បញ្ចប់វិធានការនេះ ដោយសារការឆ្លងរីករាលដាលជំងឺកូវីដ-១៩ មានការថមថយ ខណៈបណ្ដារោងចក្រ និងសហគ្រាសនានា មានការគ្រប់គ្រង និងទប់ស្កាត់ការឆ្លងជំងឺកាចសាហាវនេះ ប្រកបដោយប្រសិទ្ធភាពខ្ពស់។ ចំណែកអាជីវកម្មក្នុងវិស័យទេសចរណ៍ ក៏ដូចជា សណ្ឋាគារផ្ទះសំណាក់ ភោជនីយដ្ឋាន និងភ្នាក់ងារទេសរណ៍ នៅក្នុងរាជធានីខេត្ត ក៏បានបើកដំណើរការជាបណ្ដើរៗឡើងវិញ។
 

ដោយឡែកម្ចាស់ ឬនាយកសហគ្រាស គប្បីអនុវត្តការព្យួរកិច្ចសន្យាការងារ ស្របតាមការព្រមព្រៀងគ្នារវាងនិយោជិត ឲ្យបានខ្ជាប់ខ្ជួនតាមការកំណត់របស់ក្រសួងការងារ៕