ជាតិ
យូនីសេហ្វបើកយុទ្ធនាការ «ខ្ញុំធូរចិត្ត ពេល…» ដើម្បីលើកកម្ពស់សុខភាពផ្លូវចិត្តដល់យុវជននៅកម្ពុជា រូបតំណាងពី យូនីសេហ្វ
× ភ្នំពេញ៖ អង្គការយូនីសេហ្វបានបើកយុទ្ធនាការ «ខ្ញុំធូរចិត្ត ពេល…» គឺលើកកម្ពស់ការយល់ដឹងអំពីសុខភាពផ្លូវចិត្ត ដើម្បីជួយដល់អ្នកមានវិបត្តិផ្លូវចិត្ត ពិសេសយុវជនដែលប្រឈមនឹងសុខភាពផ្លូវចិត្តខ្លាំង។ យុទ្ធនានេះ ធ្វើឡើងរយៈពេល៣ទៅ៦ខែ សម្រាប់ជួយដល់យុវជន ក្រោយពីស្ថានភាពកូវីដ-១៩ធូរស្បើយឡើងវិញ។
អង្គការយូនីសេហ្វបានរកឃើញថា ជំងឺរាយត្បាតកូវីដ-១៩ បានធ្វើឲ្យមានវិបត្តិសុខភាពផ្លូវចិត្ត ដែលកំពុងមានរួចជាស្រេច កាន់តែមានសភាពធ្ងន់ធ្ងរនិងបង្កផលប៉ះពាល់ដល់យុវជននៅទូទាំងពិភពលោក រួមទាំងកម្ពុជាផងដែរ។ ដូច្នេះទើបអង្គការនេះ ធ្វើយុទ្ធនាការលើកកម្ពស់សុខភាពផ្លូវចិត្តឡើង ដើម្បីបញ្ឈប់ការរើសអើង ការសើចចំអក ហើយងាកមករួមគ្នាយកចិត្តទុកដាក់ដោះស្រាយវិបត្តិនេះវិញ។
លោក មាស ប៊ុនលី មន្រី្តទំនាក់ទំនងនៃអង្គការយូនីសេហ្វសង្កេតឃើញថា បញ្ហាផ្លូវចិត្តក្នុងសង្គម មិនទាន់បានបើកការជជែកឲ្យទូលំទូលាយនោះទេ ហើយក៏គ្មានការគាំទ្រលើផ្នែកសុខភាពផ្លូវចិត្តឲ្យខ្លាំងខ្លាដែរ។ «ដូច្នេះ ទើបយើងរៀបចំឲ្យមានយុទ្ធនាការនេះ (ខ្ញុំធូរចិត្ត ពេល..) ដើម្បីបញ្ជ្រាបការយល់ រួមទាំងបញ្ឈប់ការរើសអើង ខណៈអ្នកមានវិបត្តិផ្លូវចិត្តរៀបរាប់ពីទុក្ខសោកក្នុងចិត្ត»។ នេះបើតាមលោក ប៊ុនលី ថ្លែងប្រាប់សារព័ត៌មានថ្មីៗ តាមប្រព័ន្ធទូរស័ព្ទនៅថ្ងៃទី១៧មិថុនា ហើយបានឲ្យដឹងថា យុទ្ធនាការខាងលើ គ្រោងនឹងរៀបចំឡើងក្នុងរយៈពេល៣ទៅ៦ខែ។
លោក អានៀរបាន ឆាតឺរជី នាយករងយូនីសេហ្វទទួលបន្ទុកផ្នែកកម្មវិធី ក៏បានលើកឡើងដែរថា កុមារមានវិបត្តិសុខភាពផ្លូវចិត្តរួចហើយ ប៉ុន្តែការរាតត្បាតជំងឺកូវីដ-១៩នេះធ្វើឲ្យស្ថានភាពនេះកាន់តែអាក្រក់ឡើង។ លោកសង្កត់ធ្ងន់ថា៖ «យូនីសេហ្វកំពុងធ្វើការងារ ដើម្បីដាក់បញ្ហានេះនៅជួរមុខនៃរបៀបវារៈស្ដារឡើងវិញពីជំងឺកូវីដ-១៩។ ការពង្រឹងសុខភាពផ្លូវចិត្តនឹងត្រូវការចំណាត់ការនៅគ្រប់កម្រិតរបស់រដ្ឋាភិបាល និងសង្គម រួមទាំងយុវជនផងដែរ»។ ជាមួយគ្នាដែរ លោកបន្ថែមថា យុទ្ធនាការនេះ ត្រូវបានរៀបចំឡើងដើម្បីជួយពួកគេជម្នះលើការមាក់ងាយ និងផ្ដល់ដល់ពួកគេនូវឧបករណ៍ចាំបាច់បំផុតដើម្បីផ្តល់អាទិភាពលើសុខុមាលភាពរបស់ខ្លួន។ នេះបើតាមសេចក្ដីប្រកាសព័ត៌មានរបស់អង្គការ យូនីសេហ្វចេញកាលពីថ្ងៃទី១៥មិថុនា។
យុទ្ធនាការថ្មីនេះ មានការគាំទ្រពីទីភ្នាក់ងារសហរដ្ឋអាមេរិកសម្រាប់អភិវឌ្ឍន៍អន្តរជាតិ (USAID) ប្រចាំកម្ពុជា និងសហការជាមួយអង្គការចិត្តសង្គម អន្តរវប្បធម៌ (TPO) កម្ពុជា និងបណ្តាញទូរសព្ទជំនួយកុមារកម្ពុជា។ គម្រោងនេះ បានរៀបចំវីដេអូបង្ហាញពីយុវជនកម្ពុជា ដោយប្រើប្រាស់យន្តការដោះស្រាយបែបវិជ្ជមានដូចជា កីឡា មិត្តភាព និងសកម្មភាពច្នៃប្រឌិតដើម្បីពង្រឹងសុខភាពផ្លូវចិត្ត ជាមួយនឹងសកម្មភាពអនទ្បាញជាប្រចាំដើម្បីផ្ដល់គន្លឹះ និងសេចក្ដីណែនាំដល់យុវជន។
យុវវ័យម្នាក់ ក្នុងចំណោម៧នាក់នៅទូទាំងសកលលោកត្រូវបានគេរកឃើញថាកំពុងរស់នៅជាមួយវិបត្តិផ្លូវចិត្ត។ ចំណេក នៅកម្ពុជាការសិក្សារបស់យូនីសេហ្វ និងដៃគូស្ដីពីផលប៉ះពាល់សេដ្ឋកិច្ចសង្គម បានរកឃើញថា៤៥ភាគរយ នៃយុវវ័យដែលបានចូលរួមនៅក្នុងការអង្កេត បង្ហាញថាពួកគេព្រួយបារម្ភអំពីសុវត្ថិភាព ក្នុងអំឡុងរាតត្បាតកូវីដ-១៩។ រីឯ ១៦ភាគរយទៀត មានអារម្មណ៍ថប់បារម្ភ ឬធ្លាក់ទឹកចិត្ត ចាប់តាំងពីពេលចាប់ផ្ដើមនៃវិបត្តិកូវីដ-១៩។ នេះបើយោងតាមរបាយការណ៍យូនីសេហ្វស្ដីពីស្ថានភាពពិភពលោកនៅឆ្នាំ២០២១ ហើយបានវាយម្លៃថា ៥៨ភាគរយ នៃសិស្សមធ្យមសិក្សាបានជួបប្រទះនឹងបញ្ហាផ្លូវចិត្តក្នុងកម្រិតនៃប្រភេទផ្លូវចិត្តណាមួយ៕
© រក្សាសិទ្ធិដោយ thmeythmey.com