ជាតិ
×![]()
ភ្នំពេញ៖ រដ្ឋបាលខេត្តកំពង់ធំ នឹងរៀបចំពិធីអុំទូកឡើងវិញនៅសប្ដាហ៍ទី២ នៃខែតុលា ក្រោយខកខានដោយសារវិបត្តិកូវីដ-១៩។ នេះបើតាមសេចក្ដីជូនដំណឹងដែលចុះហត្ថលេខាដោយលោក ងួន រតនៈ អភិបាលខេត្តកំពង់ធំកាលពីថ្ងៃទី២៤ មិថុនា។
ក្នុងឆ្នាំ២០២២នេះ រដ្ឋបាលខេត្តកំពង់ធំ នឹងរៀបចំពិធីអុំទូកឡើងវិញ បន្ទាប់ពីខកខានដោយសារបញ្ហាកូវីដ-១៩។ បើតាមរដ្ឋបាលខេត្តកំពង់ធំ កម្មពិធីអុំទូក នឹងរៀបចំនៅក្នុងសប្ដាហ៍ទី២ នៃខែតុលា ឆ្នាំ២០២២។ ក្នុងសេចក្ដីជូនដំណឹងលោក ងួន រតនៈ អភិបាលខេត្តកំពង់ធំ បញ្ជាក់ពីគោលបំណងនៃការរៀបចំពិធីអុំទូកដូច្នេះ៖ «ការរៀបចំនៅឆ្នាំនេះ ក្នុងស្មារតីថែរក្សាទំនៀមទម្លាប់ប្រពៃណីដ៏ល្អ និងដើម្បីបង្កបរិយាកាសរីករាយជូនសាធារណជន និងប្រជាពលរដ្ឋបានកម្សាន្តសប្បាយ»។
ពាក់ព័ន្ធនឹងពិធីអុំទូកនេះ រដ្ឋបាលខេត្តកំពង់ធំ អំពាវនាវឱ្យតាមវត្តអារាមដែលមានទូក ត្រូវចុះឈ្មោះទូកនៅមន្ទីរធម្មការ និងសាសនាខេត្ត ចាប់ពីថ្ងៃជូនដំណឹងនេះតទៅ។ ជាមួយគ្នានេះ គណៈកម្មការគ្រប់គ្រងទូកទាំងអស់ គួរត្រៀមលក្ខណៈសម្បត្តិ ពិនិត្យស្ថានភាពទូក និងជួសជុល លាបលនថ្នាំថ្មី។ លើសពីនេះ ត្រូវត្រៀមហ្វឹកហាត់កីឡាករ កីឡាការិនី និងដាក់ពាក្យចុះឈ្មោះចូលរួមក្នុងពិធីអុំទូកឱ្យបានច្រើនកុះករ។
គួរបញ្ជាក់ថា ពិធីបុណ្យអុំទូក មានដើមកំណើតតាំងពីរជ្ជកាលព្រះបាទជ័យវរ្ម័នទី៧មកម្លេះ។ ក្នុងអំឡុងឆ្នាំ ១១៧៧ ពួកចាមបានលើកទ័ពមកធ្វើការលុកលុយ និងត្រួតត្រាប្រទេសកម្ពុជាអស់រយៈពេលប្រមាណ៤ឆ្នាំ។ គ្រានោះព្រះបាទជ័យវរ្ម័នទី៧ បានបង្រួបបង្រួមជាតិ និងចំណាយពេលវេលារៀបចំយុទ្ធសាស្ត្រកងទ័ព ដើម្បីប្រយុទ្ធប្រឆាំងចំពោះពួកចាម រហូតទទួលបានជ័យជម្នះ ហើយព្រះអង្គបានឡើងគ្រងរាជសម្បត្តិដឹកនាំប្រទេសជាតិ នៅឆ្នាំ១១៨១ និងបានធ្វើឱ្យប្រទេសជាតិមានការរីកចម្រើន រុងរឿងដល់កម្រិតកំពូលថែមទៀត។
ប្រវត្តិសាស្ត្រត្រង់នេះហើយ ទើបនាំឲ្យប្រជាពលរដ្ឋកម្ពុជា ប្រារព្ធពិធីបុណ្យនេះឡើង ដើម្បីរម្លឹកដល់គំរូវីរភាពដ៏អង់អាចក្លាហានរបស់កងទ័ពជើងទឹករបស់ខ្មែរ ដែលបានរំដោះទឹកដី ឲ្យរួចផុតពីការជិះជាន់របស់ពួកចាម ដែលជាខ្មាំងសត្រូវរបស់ខ្មែរនាសម័យនោះ៕
Tag:
អុំទូក
កំពង់ធំ
© រក្សាសិទ្ធិដោយ thmeythmey.com
