ភ្នំឱរ៉ាល់ជាភ្នំខ្ពស់ជាងគេក្នុងប្រទេសកម្ពុជា។ ភ្នំនេះជាទិសដៅ ទេសចរណ៍បែបផ្សងព្រេង ដ៏ល្បីល្បាញមួយក្នុងប្រទេសកម្ពុជា។ ទេសចរខ្លះត្រូវចំណាយពេល ២ថ្ងៃទើបឡើងដល់កំពូលភ្នំ និងភ្ញៀវខ្លះទៀតប្រើពេលតិចជាងនេះតាមបទពិសោធ និងកម្លាំង។ ប្រជាជនក្នុងសហគមន៍ភ្នំឱរ៉ាល់ បានទន្ទឹងរង់ចាំភ្ញៀវទេសចរក្រោយកូវីដ-១៩ស្ងប់ស្ងាត់។ ផ្ទុយទៅវិញជំងឺកូវីដ-១៩ធូរស្រាល តែបញ្ហាអាកាសធាតុបានរាំងស្ទះការដើរកម្សាន្តរបស់ទេសចរទៅវិញ។
 

ភ្ញៀវទេសចរឡើងភ្នំឱរ៉ាល់ថយចុះខ្លាំងចាប់តាំងពីខែមេសា ពោលបន្ទាប់ពីពិធីបុណ្យចូលឆ្នាំខ្មែររួច។ លោក ឈឺន ឈីម ប្រធានសហគមន៍ភ្នំឱរ៉ាល់  បានប្រាប់សារព័ត៌មានថ្មីៗ២៥ តាមទូរស័ព្ទថា រៀងរាល់ចុងសប្តាហ៍មានទេសចរប្រហែលមួយក្រុមប៉ុណ្ណោះ ដែលបានឡើងភ្នំឱរ៉ាល់។ ទេសចរខ្លះទៅដល់សហគមន៍ តែឡើងភ្នំមិនកើត ហើយត្រឡប់ទៅភ្នំពេញវិញ ព្រោះភ្លៀងធ្លាក់ខ្លាំងពេក។

 

យោងតាមរបាយការណ៍ពី លោក ឈឺន ឈីម ប្រធានសហគមន៍ភ្នំឱរ៉ាល់ ចាប់ពីខែមករា ដល់មិថុនា ឆ្នាំ២០២២ ទេសចរឡើងភ្នំឱរ៉ាល់ចំនួន ៣៥៥នាក់ ក្នុងនោះទេសចរអន្តរជាតិ ៧៥នាក់។ ទិន្នន័យនេះថយចុះយ៉ាងគំហុក បើធៀបនឹងរយៈពេលដូចគ្នាកាលពីឆ្នាំ ២០២១ ដែលមានទេសចរឡើងភ្នំឱរ៉ាល់ ២ ៧៥៣នាក់ ក្នុងនោះទេសចរអន្តរជាតិ ១១៥នាក់។
 

លោក ឈឺន ឈីម ពន្យល់ពីមូលហេតុនៃការថយចុះចំនួនភ្ញៀវទេសចរដូច្នេះ៖ «ភ្លៀងធ្លាក់ខ្លាំងជាបន្តបន្ទាប់។ ភ្ញៀវខ្លះកក់ហើយ តែអត់បានឡើងវិញ ហើយខ្លះទៀតបានមកដល់សហគមន៍តែអត់បានឡើងភ្នំទេព្រោះភ្លៀងធ្លាក់។ ហើយផ្លូវពីសហគមន៍ទៅភ្នំប្រមាណ ៨គីឡូម៉ែត្រក៏ពិបាកធ្វើដំណើរដែរ គឺខូចខ្លាំងក្នុងរដូវវស្សា»។
 

កត្តាភ្លៀងធ្លាក់ញឹកញាប់ពេកបានធ្វើឱ្យស្ពានឈើក្នុងសហគមន៍មួយកន្លែងបានបាក់ផងដែរ។ មិនត្រឹមតែទេសចរ ប្រជាជននៅទីនោះក៏ពិបាកធ្វើដំណើរ ទៅមកដែរ។ បើតាមលោក ឈឺន ឈីម សហគមន៍បានស្នើឱ្យអាជ្ញាធរឱ្យជួសជុលស្ពាននេះ ហើយអាជ្ញាធរបានចុះពិនិត្យ តែមិនទាន់បានជួសជុល៕