តាមការបញ្ជាក់ពីលោក ប៉ែន ចំរ៉ុង នេះជាកិច្ចសហការលើកដំបូងហើយ ដែលសារមន្ទីរបានរៀបចំឱ្យមានការយកបដិមា ដែលបានជួសជុលរួចចេញពីអភិរក្សដ្ឋានអង្គរ ដើម្បីដាក់បង្ហាញក្នុងសាលពិព័រណ៍នៃសារមន្ទីរព្រះនរោត្តមសីហនុ-អង្គរ។ លោក ចំរ៉ុង ប្រាប់ទៀតថា កាលនៅអភិរក្សដ្ឋានអង្គរ រូបទាំងនេះមិនត្រូវបានអនុញ្ញាតឱ្យទស្សនាដោយសេរីទេ ដ្បិតជាកន្លែងថែរក្សា ដូច្នេះចាប់ពីពេលនេះតទៅ សាធារណជនអាចមកទស្សនាបដិមា ក៏ដូចជាព្រះបាតដ៏ធំទាំងនេះបាន នៅសារមន្ទីរនៅរៀងរាល់ម៉ោងធ្វើការ។

 

មគ្គុទ្ទេសក៍សារមន្ទីរព្រះនរោត្តមសីហនុ-អង្គរ លោក គុន ផល្លី បានឱ្យដឹងថា បដិមាចំនួន៦អង្គគឺធ្វើពីឈើគគីរ ដែលគេនិយមយកធ្វើព្រះ ដោយសារវារឹងមាំ និងងាយឆ្លាក់។ លោកបន្តថា បដិមាទាំងអស់មានទម្រង់អភ័យមុទ្រៈ ដោយមានលម្អដោយលាបម្រក្សណ៍ពណ៌ខ្មៅ ក្រហម និងទឹកមាស។

 

បច្ចុប្បន្ននេះ ក្រុមការងារនៃសារមន្ទីរព្រះនរោត្តមសីហនុ-អង្គរ កំពុងសិក្សា និងស្រាវជ្រាវរកប្រវត្តិលម្អិតនៃបដិមាទាំង៦ ថាតើ ត្រូវបានគេនាំចេញពីរួតព្រះពាន់នៃអង្គរវត្តតាំងពីពេលណា។ល។ លោក គុន ផល្លី បញ្ជាក់ថា សូម្បីខាងអភិរក្សដ្ឋានអង្គរ និងសាលាបារាំងចុងបូព៌ា ក៏មិនមានឯកសារលម្អិត ចំពោះបដិមាទាំងនេះដែរ។ ចំណែកព្រះបាតដែលធ្វើពីថ្មភក់ ក្រុមការងារកំពុងរៀបចំឆ្លងសំណេរឯកសារ ទៅថ្នាក់លើដើម្បីសម្រេចជាផ្លូវការ៕