តាមរយៈទំព័រហ្វេសប៊ុករបស់ខ្លួន សា្ថនទូតជប៉ុន បានប្រកាសទទួលសាធារណជន ដែលមានបំណងចង់ចូលរួមសរសេរសាររំលែកទុក្ខក្នុងសៀវភៅក្រាំងមាស ចំពោះមរណភាពរបស់ ស៊ិនហ៊្សូ អាបេ ចាប់ពីថ្ងៃទី១៣ ដល់ថ្ងៃទី១៦ ខែកក្កដា ឆ្នាំ២០២២។ ចំពោះសម្តេចនាយករដ្ឋមន្រ្តី ហ៊ុន សែន សម្តេច បានដឹកនាំប្រតិភូ ទៅគោរពវិញ្ញាណក្ខន្ធលោក អាបេ និងសរសេរសាររំលែកទុក្ខ ក្នុងថ្ងៃ១១កក្កដានេះ។ 

 

លោក អាបេ ត្រូវបានខ្មាន់កាំភ្លើងបាញ់សម្លាប់ កាលពីថ្ងៃទី៨ ខែកក្កដា ឆ្នាំ២០២២ នាអំឡុងពេលដែលលោក ឈរនិយាយក្នុងយុទ្ធនាការឃោសនារកសំឡេងឆ្នោត សម្រាប់ការបោះឆ្នោតសភាជាន់ខ្ពស់នៅជប៉ុន។ មេដឹកនាំកម្ពុជា បានបង្ហាញសមានចិត្តយ៉ាងជ្រាលជ្រៅក្នុងការចូលរួមរំលែកទុក្ខចំពោះមរណភាពរបស់លោក អាបេ រហូតដល់ប្រកាសឲ្យប្រជាជនកម្ពុជា ចូលរួមកាន់ទុក្ខទូទាំងប្រទេស រួមទាំងបង្គាប់ឲ្យគ្រប់ស្ថាប័នរដ្ឋ និងឯកជន ទម្លាក់ទង់ជាតិត្រឹមពាក់កណ្តាលដងរយៈពេល១ថ្ងៃ ក្នុងថ្ងៃ១០កក្កដា ដើម្បីបង្ហាញពីការកាន់ទុក្ខនេះ។ 
 

ប្រមុខរដ្ឋាភិបាលកម្ពុជា ក៏បានផ្ញើលិខិតរំលែកទុក្ខជូនទៅលោក ហ្វូមិអូ គិស៊ិដា (Fumio Kishida) នាយករដ្ឋមន្រ្តីជប៉ុនផងដែរ ខណៈព្រះមហាក្សត្រកម្ពុជា ទ្រង់បានប្រទានព្រះរាជសាររំលែកទុក្ខទៅអធិរាជជប៉ុន៕