ក្នុងវគ្គទី១ ក្រុមកីឡាការិនីកីឡាហុកគីកម្ពុជា ធ្វើបានល្អដោយបាននាំមុខសិង្ហបុរី ១-០។ ចូលដល់វគ្គទី២ កម្ពុជាបន្តវាយសម្រុករហូតដល់រកបាន ២គ្រាប់បន្ថែមទៀត។ បញ្ចប់ការប្រកួតកម្ពុជាយកឈ្នះលើក្រុមនារីសិង្ហបុរី ក្នុងលទ្ធផល ៣-០។

 

កីឡាការិនីកម្ពុជា អៀង ចរិយា ជាប់ជាកីឡាការិនីល្អសម្រាប់ការប្រកួត។ កីឡាការិនីកម្ពុជារូបនេះ បានបញ្ជាក់ក្នុងសន្និសីទកាសែតថា៖«ថ្ងៃនេះខ្ញុំពិតជាមានអារម្មណ៍ថាសប្បាយចិត្តខ្លាំងមែនទែន ដែលខ្ញុំធ្វើថ្ងៃនេះបានល្អ ខ្ញុំនឹងខិតខំធ្វើនៅថ្ងៃក្រោយទៀត និងធ្វើដើម្បីកម្ពុជានឹងធ្វើឲ្យបានល្អជាងឆ្នាំនេះ ឬក៏រហូតដល់ស៊ីហ្គេមឆ្នាំ២០២៣»។

 

គួររំឭកថា កម្ពុជា បានបញ្ជូនអត្តពលិកកីឡាហុកគី ២១នាក់ ក្នុងនោះមាននារី១២ នាក់ ដឹកនាំដោយប្រធានប្រតិភូ លោក កាំង សុធា អគ្គលេខាធិការសហព័ន្ធកីឡាហុកគីកម្ពុជា ក្នុងដំណើរចូលរួមប្រកួតពានរង្វាន់ Indoor Asia Cup2022 នាទីក្រុងបាងកក ប្រទេសថៃ ដែលការប្រកួតចាប់ផ្តើមពីថ្ងៃទី៨ ដល់ទី១៥ ខែសីហា ឆ្នាំ២០២២៕