ក្រុមថៃ មានកម្រិត ល្អជាងកម្ពុជា បើមើលតាមការប្រកួតនាថ្ងៃទី១១ ខែសីហានេះ។  TODKAEW Jiratchaya កីឡាការិនីថៃ រកបាន២គ្រាប់ផ្ទួនៗ នៅនាទី៨ និងនាទី៩ និង ១នាទីបន្ទាប់ កីឡាការីនី Sakulpithak Tikhamporn រកបាន១គ្រាប់ទៀត ឲ្យជម្រើសជាតិថៃ នាំមុខកម្ពុជា ក្នុងលទ្ធផល៣-០។ ក្រុមថៃ នៅតែបន្ដព្យាយាមរកពិន្ទុបន្ថែម បើទោះជាមាន៣គ្រាប់ក្នុងដៃ ក៏ដោយ។
 

លុះចូលដល់នាទី២០ កីឡាការិនី PATHUMPAIROT Chatchanan រកបានគ្រាប់ទី៤ ឲ្យក្រុមថៃ និងនៅនាទី២៤ មុននឹងកីឡាការិនី TODKAEW Jiratchaya រកបានគ្រាប់ទី៣របស់ខ្លួន ហើយក៏ជាគ្រាប់ទី៥ របស់ថៃផងដែរ។ បញ្ចប់ការប្រកួត ថៃ ឈ្នះ កម្ពុជា ក្នុងលទ្ធផល៥-០។
  

បើទោះជាមិនអាចប្រកួតនៅវគ្គផ្ដាច់ព្រ័ត្រក៏ដោយ តែកម្ពុជា នៅមានឱកាសប្រកួតខ្វែង ដើម្បីរកចំណាត់ថ្នាក់លេខ៥។ នោះ មានន័យថា លេខ៣ពូល A ត្រូវប្រកួតជាមួយ លេខ៤ពូលB ហើយលេខ៣ ពូលB ប្រកួតជាមួយ លេខ៤ពូល A។ កម្ពុជា ឈរលេខ៣ ក្នុងពូល B ដូចនេះ ត្រូវជួបជាមួយ ឆាយនីសតៃប៉ិ លេខ៤ នៅក្នុងពូល A។ ការប្រកួត នឹងចាប់ផ្ដើមនៅថ្ងៃទី១៣ ខែសីហា ឆ្នាំ២០២២ នៅកីឡដ្ឋាន Huanmark។
 

គួរបញ្ជាក់ផងដែរថា​ ក្រុមកីឡាការិនីហុកគីកម្ពុជា បានបង្ហាញខ្លួនក្នុងព្រឹត្តិការណ៍នេះ ៣លើក ដោយគិតចាប់ពីឆ្នាំ២០១៥ មក។ ក្រុមនេះ ក៏ធ្លាប់ទទួលបានជ័យលាភី លេខ៥ ម្ដងរួចមកហើយ ក្នុងព្រឹត្តិការណ៍នេះ កាលពីឆ្នាំ២០១៥។ តើកម្ពុជា អាចទទួលជ័យលាភីលេខ៥នេះ ជាលើកទី២បានទេ ដោយត្រូវប្រជែងជាមួយ៣ប្រទេសផ្សេងទៀត ដូចជា សិង្ហបុរី, ឆាយនីសតៃប៉ិ និងអឺរ៉ង់?