កីឡាជាតិ
ជាតិ
លោក មិត្ត សំអែល អតីតកីឡាករបាល់ទាត់ គ្រូបង្វឹក និងជាអតីតមន្ត្រីទ័ពអាកាស ទទួលមរណភាព mith samel
×
ដោយ៖ហៀក ឆក
លោក មិត្ត សំអែល អតីតខ្សែប្រយុទ្ធជម្រើស គ្រូបង្វឹក និងជាអ្នករួមចំណែកអភិវឌ្ឍន៍បាល់ទាត់ ក្រោយសម័យសង្គ្រាម បានទទួលមរណភាព ក្នុងអាយុ៨៤ឆ្នាំ ដោយរោគាពាធកាលពីថ្ងៃទី១៦ ខែសីហា។ លោកក៏ជាឪពុកបង្កើតរបស់អតីតខ្សែប្រយុទ្ធល្បីល្បាញ សំអែល ណាសា ផងដែរ។ ក្រៅពីលោកក៏ធ្លាប់ជាមន្ត្រីបម្រើការនៅមូលដ្ឋានទ័ពអាកាសពោធិ៍ចិនតុង ថែមទៀតផង។
លោក មិត្ត សំអែល(ស្តាំ) គ្រូបង្វឹកក្រុមបាល់ទាត់គ្រុឌបៃតង។ រូបពី Rith Dika
«ជាអតីតគ្រូបង្ហាត់ក្លឹបបាល់ទាត់គ្រុឌបៃតង ចាប់ពីឆ្នាំ១៩៩៧-២០០៧ ដែលបច្ចុប្បន្នក្លឹបបានប្តូរឈ្មោះមកជា ក្លឹបកីឡាបាល់ទាត់ ព្រះខ័នរាជ ស្វាយរៀង។ បេសកកម្មបាល់ទាត់ស្ទើរពេញមួយជីវិតមុននឹងចាប់ផ្តើមជាគ្រូ លោកក៏ជាអតីតកីឡាករជម្រើសជាតិក្នុងទស្សវត្សរ៍៦០-៧០ និងបានបណ្តុះបណ្តាលដល់ថ្នាលយុវជនជាច្រើនក្រោយរបបខ្មែរក្រហម»។ ក្លិបព្រះខ័នរាជស្វាយរៀង បានរំលឹកត្រួសៗពីគុណបំណាច់របស់លោក មិត្ត សំអែល នៅក្នុងទំព័រហ្វេសប៊ុករបស់ខ្លួន។
បើតាមជីវប្រវត្តិសង្ខេបរបស់លោក មិត្ត សំអែល ដែលចុះផ្សាយដំបូងនៅ
គេហទំព័រសប្បាយ កាលពីខែតុលា ឆ្នាំ២០១៤ លោកស្ថិតក្នុងចំណោមស្ថាបនិកដែលបានរៀបចំក្រុមបាល់ទាត់យុវជនឡើងវិញ ក្រោយសម័យសង្គ្រាម។
លោក មិត្ត សំអែល កើតនៅឆ្នាំ១៩៤០ នៅស្រុកពញាឮ ខេត្តកណ្តាល ហើយមាននិស្ស័យជាមួយកីឡាបាល់ទាត់តាំងពីក្មេង។ ចំណងអាពាហ៍ពិពាហ៍ជាមួយអ្នកស្រី លី សាវី បង្កើតបានកូនប្រុស៤នាក់ ដែលក្នុងនោះមានអតីតខ្សែប្រយុទ្ធជម្រើសជាតិ សំអែល ណាសា ពីឆ្នាំ២០០០ ដល់២០១១ ជាកូនពៅ។
បើតាមការចុះផ្សាយរបស់សារព័ត៌មានសប្បាយដដែល លោក មិត្ត សំអែល ក៏មានប្រវត្តិការងារនៅមូលដ្ឋានទ័ពអាកាសចរពោធិ៍ចិនតុងផងដែរនៅមុនរបបប៉ុល ពត ហើយលោកមានតួនាទីជាភ្នាក់ងារការិយាល័យទី២ សេនាធិការទ័ពអាកាសខ្មែរប្រចាំការនៅអាកាសយានដ្ឋានស៊ីវិលយោធាពោធិចិនតុង ពីឆ្នាំ១៩៧០ដល់ឆ្នាំ១៩៧៥៕
លោក មិត្ត សំអែល ជាមួយកូនសិស្សក្រុមបាល់ទាត់ជម្រើសជាតិកម្ពុជា។ រូបពី Rith Dika
លោក មិត្ត សំអែល(ស្តាំ) គ្រូបង្វឹកក្រុមបាល់ទាត់គ្រុឌបៃតង។ រូបពី Rith Dika
Tag:
បាល់ទាត់
មិត្ត សំអែល
© រក្សាសិទ្ធិដោយ thmeythmey.com