លោក ជា សុផារ៉ា ឱ្យពលរដ្ឋសង់សំណង់ខុសច្បាប់ស្ម័គ្រចិត្តរុះរើខ្លួនឯង

ជាតិ

សង្គមជាតិ

លោក ជា សុផារ៉ា ឱ្យពលរដ្ឋសង់សំណង់ខុសច្បាប់ស្ម័គ្រចិត្តរុះរើខ្លួនឯង

17, Aug 2022 , 3:59 pm

រូបភាព

លោក ជា សុផារ៉ា ក្នុងពិធីបើកយុទ្ធនាការចុះវាស់វែង កំណត់និយាមកាក្បាលដី និងអត្តសញ្ញាណអ្នកកាន់កាប់ដី និងសំណង់ខុសច្បាប់ ក្នុងតំបន់រមណីយដ្ឋានអង្គរ នាថ្ងៃទី១៧ ខែសីហា ឆ្នាំ២០២២។

ដោយ: អុីសា រ៉ហានី (Isa Rohany)

សៀមរាប៖ លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងារតម្រង់ទិសដោះស្រាយបញ្ហាសំណង់ខុសច្បាប់ក្នុងតំបន់អង្គរ បានលើកឡើងច្បាស់ៗពីវិធានការ និងការអនុវត្តរបស់លោក ក្នុងការដោះស្រាយបញ្ហាសំណង់ខុសច្បាប់ ដើម្បីការពារតម្លៃជាសកលនៃរមណីយដ្ឋានអង្គរ។ លោករដ្ឋមន្ត្រី ក៏បានលើកទឹកចិត្តឱ្យពលរដ្ឋ ដែលសង់សំណង់ខុសច្បាប់ទាំងអស់ គួរស្ម័គ្រចិត្តរុះរើដោយខ្លួនឯង។

តាមរបាយការណ៍ បច្ចុប្បន្នមានសំណង់ខុសច្បាប់ ជាង៨ពាន់ករណី នៅក្នុងតំបន់រមណីយដ្ឋានអង្គរ ក្នុងនោះត្រឹមរយៈពេល៦ខែដើមឆ្នាំ ២០២២នេះ សំណង់ខុសច្បាប់ កើតមានចំនួនជាង២ពាន់ករណី។ នេះជាបញ្ហាមួយដែលរដ្ឋមន្ត្រី ជា សុផារ៉ា លើកឡើងថា ជារឿងគួរឱ្យខ្មាសអៀនបំផុត និងមិនគួរឱ្យកើតមានទាល់តែសោះ។

ជាមួយគ្នានេះ រដ្ឋមន្ត្រីរៀបចំដែនដី ក៏បានលើកករណីលេចធ្លាយលិខិត របស់រដ្ឋបាលខេត្ត ចុះថ្ងៃទី២៧ ខែមិថុនា ដោយស្នើដល់អាជ្ញាធរជាតិអប្សរាផ្អាកការរុះរើសំណង់ខុសច្បាប់ ដែលបង្កឱ្យសំណង់ខុសច្បាប់ កើតថ្មីចំនួន ៣៩៨ករណី។ លោក ជា សុផារ៉ា ឱ្យអភិបាលខេត្ត ទៀ សីហា ប្រញាប់និរាករណ៍លិខិតនេះឱ្យបានលឿនបំផុត និងត្រូវទទួលខុសត្រូវករណីនេះ។

«លិខិតលេខ ៤១២ គឺលុចចោលឯកឧត្តម (អភិបាលខេត្តសៀមរាប) មិនអាចទុកទេ ទុកស្មើនឹងលើកទឹកចិត្ត ហើយជាក់ស្ដែងបានធ្វើឱ្យសំណង់នេះមានការរីករាលដាល និងមិនអាចគ្រប់គ្រងបាន។ ហើយគិត ប៉ាប៉ុណ្ណឹងទៅស្រាប់តែមានចលនា មានបាតុកម្ម ពូថៅ កាំបិត តវ៉ាលិចកើត ប៉ះត្រង់ណាយើងចាប់នៅហ្នឹងៗ ពីមុនកាំភ្លើងពេញភ្នំពេញ ប្រមូលច្រកបាវបាន ឥឡូវនេះប្រហែលជាអ្នកដែលក្លាហានមិនទាន់មានទេៗ។ ខ្ញុំមកឈរប្រឈមមុខនៅក្នុងការដោះស្រាយគ្រប់រូបភាពនៅក្នុងខេត្តសៀមរាប ហ្នឹងប្រកាសឱ្យហើយ»។ នេះជាការអះអាងរបស់លោក ជា សុផារ៉ា ក្នុងពិធីប្រកាសបើកយុទ្ធនាការចុះវាស់វែង កំណត់និយាមកាក្បាលដី និងអត្តសញ្ញាណអ្នកកាន់កាប់ដី និងសំណង់ខុសច្បាប់ក្នុងតំបន់រមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា។

ជាមួយគ្នានេះ លោករដ្ឋមន្ត្រី ជា សុផារ៉ា សុំឱ្យពលរដ្ឋ ដែលទើបសាងសង់សំណង់ថ្មីៗ ដោយមានការសម្របសម្រួលពីអាជ្ញាធរមូលដ្ឋាន ត្រូវស្ម័គ្រចិត្តរុះរើដោយខ្លួនឯង និងដោយសន្ដិវិធី។

ក្រុមការងារចម្រុះចូលរួមយុទ្ធនាការចុះវាស់វែង កំណត់និយាមកាក្បាលដី និងអត្តសញ្ញាណអ្នកកាន់កាប់ដី និងសំណង់ខុសច្បាប់ក្នុងតំបន់រមណីយដ្ឋានអង្គរ។

ចំពោះមុខមន្ត្រី និងក្រុមការងារចម្រុះជិត៨០០នាក់ នៅសាលសន្និសីទអង្គរ នៃអាជ្ញាធរជាតិអប្សរា លោក ជា សុផារ៉ា បញ្ជាក់ថា រមណីដ្ឋានអង្គរជាទ្រព្យសម្បត្តិសាធារណរបស់រដ្ឋ និងដែលរកចំណូលចូលជាតិប្រមាណ១០០លានដុល្លារជាប្រចាំឆ្នាំ ដូច្នេះចាំបាច់ត្រូវការការពារឱ្យខានតែបាន មិនអាចឱ្យសំណង់ខុសច្បាប់បំផ្លាញតំបន់បេតិកភណ្ឌទាំងនេះឡើយ។ ពីឆ្នាំ២០១៧ មក កម្ពុជាធ្លាប់ទទួលបានលិខិតព្រមាន២លើកមកហើយពីមជ្ឈមណ្ឌលបេតិកភណ្ឌអង្គការយូណេស្កូ ទាក់ទងនឹងបញ្ហាសំណង់ខុសច្បាប់នេះ។ តាមរយៈក្រុមការងារថ្នាក់ជាតិតម្រង់ទិសដោះស្រាយបញ្ហាសំណង់ខុសច្បាប់នៅពេលនេះ លោក ជា សុផារ៉ា មានសុទិដ្ឋនិយមថា នឹងបញ្ជៀសមិនឱ្យមានលិខិតជាលើកទី៣ឡើយ។

សូមបញ្ជាក់ថា យុទ្ធនាការចុះវាស់វែង កំណត់និយាមកាក្បាលដី និងអត្តសញ្ញាណអ្នកកាន់កាប់ដី និងសំណង់ខុសច្បាប់នេះ មានរយៈពេល១៥ថ្ងៃ ដោយចាប់ផ្តើមពីថ្ងៃទី១៨ ខែសីហា តទៅ។ ក្រុមការងារសរុបចំនួន ៣២ក្រុម មកពីក្រសួង ការិយាល័យជំនាញ ស្ថាប័នជំនាញ និងមន្ទីររៀបចំដែនដីខេត្តកំពង់ចាម កំពង់ធំ សៀមរាប បាត់ដំបង និងបន្ទាយមានជ័យ សរុបជិត៨០០នាក់។ ក្រុមការងារនេះ នឹងបែងចែកការងារចុះគ្រប់ខ្នងផ្ទះ និងទីតាំងដីទាំង៥ ក្រុង-ស្រុក ដែលស្ថិតនៅតំបន់រមណីយដ្ឋានអង្គរ មានក្រុងសៀមរាប ស្រុកបន្ទាយស្រី ស្រុកពួក ស្រុកប្រាសាទបាគង និងស្រុកអង្គរធំ ដែលសរុបមាន ១១២ភូមិ៕