រថយន្តអគ្គិសនី(EV) ចំនួន១៥៥គ្រឿង ត្រូវបានចុះបញ្ជី នៅក្រសួងសាធារណការ និងដឹកជញ្ជូន នារយៈពេល៧ខែមកនេះ។ បើតាមលោក ស៊ុន ចាន់ថុល រដ្ឋមន្ត្រីក្រសួងសារធារណការ ចំនួនរថយន្តដែលអ្នកប្រើប្រាស់យកមកចុះបញ្ជីនេះ បានកើនរហូតដល់ ១៣០០ភាគរយ បើធៀបរយៈពេលដូចគ្នាកាលឆ្នាំ២០២១មានត្រឹម១១គ្រឿងប៉ុណ្ណោះ។
កំណើនដ៏ល្អខ្ពស់នេះ គឺជាចរន្តមួយដែលធ្វើឱ្យពលរដ្ឋកម្ពុជាមានការចាប់អារម្មណ៍កាន់តែច្រើនក្នុងការប្រើប្រាស់រថយន្តអគ្គិសនី ដើម្បីចូលរួមកាត់បន្ថយឧស្ម័នបំពុលនៅកម្ពុជា ក៏ដូចនៅលើពិភពលោក ស្របពេលនឹងប្រេងឥន្ធនៈមានតម្លៃខ្ពស់។ ដើម្បីឆ្លើយតបនឹងកំណើននៃការប្រើរថយន្តអគ្គិសនីនេះ បច្ចុប្បន្ន ក្រសួងសាធារណការ និងដឹកជញ្ជូន បានដំឡើងស្ថានីយបញ្ជូលថាមពលអគ្គិសនីសម្រាប់រថយន្តអគ្គិសនី នៅតាមរាជធានី និង ខេត្តគោលដៅមួយចំនួន។
ពីកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆមាសទី១ និងលើកទិសដៅការងារឆមាសទី២ ឆ្នាំ២០២២ នៅទីស្តីការក្រសួងសាធារណការ និងដឹកជញ្ជូន នាថ្ងៃទី១៨សីហា លោក ស៊ុន ថាន់ថុល បានរៀបរាប់ថា ក្រសួងបានដំឡើងស្ថានីយបញ្ជូលថាមពលអគ្គិសនីនេះ នៅខេត្តព្រះសីហនុមួយគ្រឿង, នៅបាត់ដំបងមួយគ្រឿង, នៅសៀមរាបមួយគ្រឿង និងនៅក្រសួងផ្ទាល់មួយគ្រឿង ផងដែរ។ លោក បានបញ្ជាក់ថា កន្លែងបញ្ជូលថាមពលឡាននិងម៉ូតូអគ្គិសនីទាំងនេះ គឺជាជំនួយរបស់អង្គការកម្មវិធីអភិវឌ្ឍន៍សហប្រជាជាតិ(UNDP) ប្រចាំកម្ពុជា។
រដ្ឋមន្ត្រីក្រសួងសាធារណការរូបនេះបន្តនិយាយដូច្នេះ៖ « បន្ថែមលើជំនួយមួយគ្រឿងរបស់UNDP យើងខ្ញុំបានដំឡើងស្ថានីយបញ្ជូនរថយន្តអគ្គិសនីចំនួនបីគ្រឿងទៀត នៅក្រសួងសាធារណការ និងដឹកជញ្ជូន ដែលដំណើរដោយថាមពលសូឡាតែម្តង»។
បើតាមលោក ស៊ុន ចាន់ថុល អ្នកប្រើប្រាស់រថយន្តអគ្គិសនីនេះ មិនត្រឹមជួយសម្អាត ឬជួយកាត់ការបំពុលបរិស្ថានដោយប្រេងឥន្ធនៈទេ តែថែមទាំងចំណេញថវិកាបានច្រើនទៀត។ លោកបញ្ជាក់ថា អ្នកប្រើប្រាស់រថយន្តអគ្គិសនី គឺចំណេញពន្ធលើការនាំចូល ដោយរដ្ឋបានបញ្ចុះអត្រាពន្ធនេះ នៅត្រឹម៦៣ភាគរយប៉ុណ្ណោះ ខណៈការនាំចូលរថយន្តដែលប្រើប្រាស់ឥន្ធនៈវិញ មានអត្រាពន្ធដល់១២០ភាគរយ។
ក្រៅពីនេះ អ្នកប្រើប្រាស់ក៏នឹងចំណេញលើការចំណាយនៃថ្លៃអគ្គិសនី ដែលមានតម្លៃអាចនឹងថោកជាង ៣ដង បើធៀបនឹងការប្រើប្រាស់រថយន្តដំណើរការដោយប្រេងឥន្ធនៈ។ ជាមួយគ្នានេះ ការចំណាយសម្ភារ ឬគ្រឿងបង្គុំរថយន្តអគ្គិសនី ក៏មានតម្លៃតិចជាងរថយន្តដែលប្រើដោយប្រេងឥន្ធនៈដែរ។ នេះជាការបញ្ជាក់បន្ថែមរបស់លោក ស៊ុន ចាន់ថុល។
វត្តមានរថយន្តអគ្គិសនីនៅកម្ពុជា គឺមានការកើនពីមួយឆ្នាំទៅមួយគួរឱ្យគត់សម្គាល់ ត្បិតវត្តមាននេះមានចំនួនតិចតួចក៏ដោយ។ បច្ចុប្បន្ន នៅកម្ពុជា មានក្រុមហ៊ុនផ្គត់ផ្គង់ទោចក្រយានយន្តអគ្គិសនីចំនួន៩ និង១ក្រុមហ៊ុន ផ្គត់ផ្គង់នូវត្រីចក្រយានយន្តអគ្គិសនី។
លោក ស៊ុន ចានថុល រដ្ឋមន្រ្តីក្រសួងសាធារណការ និងដឹកជញ្ជូន។ រូបថត៖ MPWT
កន្លងមក រាជរដ្ឋាភិបាល បានដាក់ចេញនូវគោលនយោបាយ ក្នុងការបញ្ចេញឧស្ម័នពុល ឱ្យស្មើនឹងសូន្យ ហើយនឹងជំរុញនូវការប្រើប្រាស់រថយន្តអគ្គិសនី ឱ្យបាន៤០ភាគរយ និងម៉ូតូអគ្គិសនីឱ្យបាន៧០ភាគរយ នៅឆ្នាំ២០៥០៕